1 Iawe God Moses mampe wane wanase, 2 “Uaboa dea ita walama dea bumpe e Iawe God donsampa apewa kakaiwa wadaa. 3 Tane e saua badowa bokisiwa bedewe saua anaanawa 10 wineia wadee ape kakaiwa bedewe itua ita gara mampe seuabodaa. 4 Ita wata wadee wine itue ita nitu uduudu wata mebaawa otee osowe teaa, ita do siwa nepa endowa wadee wine osowe siwa sumpa ote teaa.

5 Tane e wata gold mampe dewalala piupiu sumpa baiwa wadee saua badowa bokisiwa danawe simampe enadodepi, ita ape kakaiwa moawa gara mampe seuabodaa. 6 Ita pulo sumpa watawa wadee ape kakaiwa moape odeiawo enadodepi. 7 Ita e wau ita witapu mitompa abomawa wadee pulo sumpa watawa ita ape kakaiwa bedewe odaodawa intawa sawanauwo enadodepi. Tane aboma sa bedewe esa memewo nope wisepio ea. 8 E ape kakaiwa ita pulo sumpa watawa gonaite gara mampe intawa moa seuabodaa.

9 Ita e mena wadee ape kakaiwa ita bedewe nitu uduudu wineia osouwo memamoa ita nitu sa uduudu enapune awowasaa, ita nitu kakaiwa segantopu. 10 Tane mena wadee pulo sumpa watawa ita nituwa uduudu osouwo memamoa ita nitu sa uduudu enapune awowasaa, ita nitu kakaiwa segantopu. 11 Ita do mena wadee witapu ita wau mitompa abomawa ita itumpa bolawa enapune nambemoe kakaimoa.

12 Tane Aron ita me obampa do otamoe ape kakaiwa moape ita esa mampe duadimoa. 13 Ita Aron gara kakaiwa mampe benasaa ita mena me osowe memea ita me enapune nambesawo pirisilepie ne simbianeampa. 14 Tane me obampa otamoe wine pirisi garawa mampe benamoa. 15 Ita mo mambu osowe mena memeana rua mo osouwo memea ita mo ne simbianeampe pulo sumpa apanawa wanantopu. Tane mena sa mo osouwo memeana mo nosinosiu do pulo sumpa apanawa wanantopue wankasantompa.”

16 Iawe God wana rua Moses dewa uduudu dewasantuwan. 17 Ita ena nata bedewe uaboa dea ita walama dea bumpe mo ape kakaiwa dewasaiena. 18 Moses unsia endolepia bolawa dewamone*Unsia endolepia bolawa dewamona sa ipa; mai dogo bedewe don tomopona, dia, tane nitu da dewasane osowe endolena umanawa wade. ita bedeuwo endolen ita kambara ita rou teeno alen ape wadepidodepia baiwa. 19 Ita me ape sa dewasane aupe rupu isiwa otene teabodalen tane osowesane onapainta pue etepa mampe ape iwa ita belawa itunboden, Iawe God wana rua.

20 Ita Moses seu nata tabatabau otene saua badowa bokisiwa bedewe aimon ita bokisi sa wawa osouwo riniwa dola nagawa bedewe kewa neanamono waiwa dauwo nomoiena. Ita osowe kadi insadabua enabodawa itune boden. 21 Tauma me saua badowa bokisiwa wadene alene ape kakaiwaida bedewe itune ita ape bedewe gara seunboden, Iawe God me diena rua.

22 Ita do me wata awanene alene ape kakaiwa bedewe gara seudia danawe wita on deneuwe eindoden. 23 Ita do me parawa susula Iawe God mampe amonalene wata osowe itun, Iawe God me diena rua.

24 Tane me siwa endowa nepa wadene odene ape kakaiwa bedewe wita sen deneuwesane wata enedia waiwa dauwo eindoden 25 ita me Iawe God emawe siwa sumon, Iawe God me diena rua. 26 Me watawa gold mampe dewala osowe piupiu sumpo bonawa alempa wadene gara seuiena danawe itun 27 ita me piupiu sun Iawe God me diena rua.

28 Tane me gara wadene ape kakaiwa intawa moa seunboden. 29 Ita me pulo sumpaa watawa wadene ape kakaiwa danawe itun ita osowe me pulolepia baiwa pue bosan. Ita do me parawa pulolene sun, Iawe God me diena rua.

30 Ita me witapu ita wau mitompa abomawa wadene alene ape kakaiwa ita pulo sumpaa watawa sawanauwo itun ita aboma sa bedewe esa memeno nopelen duadi baiwa 31 ita sape Moses, Aron ita me obampa do witapu ita wau mitamoie 32 walamaipa mo ape kakaiwa bedewe odaodawa baiwa ita do pulo sumpaa watawa mampe antompa mo bauta duadintoi, Iawe God me diena rua.

33 Ita me ape kakaiwa ita pulo sumpaa watawa gonaalene gara mampe intawa moawa seunboden. Ita mape me nola uduudu diasan.

34 Tane giou iene ape kakaiwa lolenboden ita Iawe God sapawa debamaia iene ape sa nopesan.✡1 Kin 8.10,11; Aisaia 6.4; Gagalo 15.8 35 Giou iene ape kakaiwa lolenbodae winedie ita Iawe God sapawa debamaia nopesano baiwa Moses mai ape bedewe odapona rua, dia.

36 Tane giou ape kakaiwa osowe iedie winedia punwadie ape iwa ediiedia walamawe Israel apanawa eie bola da bedewe antoi. 37 Tane giou mai pundepi alepia mo mai nomopue antopu, dia, ideita giou punwapie ape iwa epiiepia walamawe mo nomopue antopu. 38 Sa baiwa mo au antoia bedewe walamo giou eweiena ita Iawe God giou sa bedewe wandie, ape kakaiwa osowe ita do tadino giou bedewe ia bumedio eweie.