5
Elaisa Naeman tawo Siria warerewa sorodia debama inasan
1 Naeman ipa tawo Siria apanawa warereu me sorodia uwauleidia apanawa debama. Iawe God Naeman sausano Siria apanawa mo mida onau eneia nanaumone aimon. Sa baiwa Siria warerewa insedia Naeman apana debama ita wiwirawaleidie. Naeman ona debama dewasadia apanawa ita me kero kadiwaida kito waden.
2 Bautamampe Siria apanawa sorodiau anton apana do onantopua baiwa ita Israel tawowa bedewe mo Israel iwa sanaa bodane wadeiena. Ita i sa Naeman manainapa nolawa dewalala wanalen. 3 I sa Naeman manainapa diene wanase, “Ne menanedia debamana Naeman peroweta Samaria tawowa bedewe wandia mampe alepi. Peroweta sa ne debamana kero kito wadena inasapi.”
9 Sa baiwa Naeman oas ita turaka pue mampe teiteinala osowe waine Samaria tawowa bedewe alen ita Elaisa duwa moape enen. 10 Tane Elaisa gagalowa benemala wanaubeno Naeman mampe alen diepi wapiase, “E esa Ioadan bedewe aite walama 7 duaditaa. Ita e etea inalepio*Moses anaanawa wadiase, kero ema apana dewasadio miramiraleide (Liwai Damba Nolau 13.3). euitaa.”
11 Tane Naeman nuawa kadileno ene aleidie wanase, “Ne insaisana badowa itunaa peroweta du bedewee nosepe mainawoido enape me Godiwa Iawe mampe rauparilepona. Ita me witapa kito osowe itupe inaneapona. 12 Ne bolana debama Damaskas esawa Abana ita Papa esau ipa eubuida tane Israel tawowa esawa mai eubu. Ne bola debama Damaskas esawa bedewe duadintape inanteapona.” Me epe insedie nuawa kadileno ene alen.
13 Naeman nolawa dewalala wimone me diane waienase, “Debamamba, e peroweta nola da debama dewasapona baiwa dieeipono dewasapona. Sa baiwa e peroweta dima dieena rua dewasaa, ‘Aite duadite euitaa.’ ” 14 Ita Naeman alene Ioadan esawa bedewe iena walama 7 God perowetawa wana rua ita etepa uduudu eulen, oto gegela etepa rua.✡Luk 4.27
15 Ita Naeman apanawa uduudu do leuntone God perowetawa Elaisa mampe anton. Naeman Elaisa danawe enene mukalene wanase, “Tauma ne atenten Israelwa Godiu tawo uduudu osowe me os God wande! Sa baiwa ne nolaa dewalala menanedia amonana ema e wadaa.”
16 Tane Elaisa me sipoasane wanase, “Ulaipa Iawe God ipa wanwankasalala mida ne simbiasadina, me ebowe ne wadina amona sa ne mai wadapa, dia.” Naeman aiawa badowa mampe me iririsana amona wadapona, tane me mai wadapona.
17 Tane Naeman wanase, “Ne tauma ita ando pulona Iawe God os mampe dewasapina mai god isiwa lagawau mampo. Tauma ne pue bosape Iawe God mampe pulontapa. Sa ide, pulo mai wadaa tane menaidanedia Israel dogowa saiwa pue ema nata awanepu.†Naeman insedia Israel apanawa Godiu Israel bolawa os bedewe wadaposisai. Apana inseia Israel tawowa bola euda kakaiwa. Ita Naeman bolawe leulene wisene Iawe God mampe wata dewasan. Naeman tawowa Siria ipa Israel tawowa onape winede. Me mai menasapona apana insepuase me dogo poilen ita me peroweta iririmona dogo moa me wanapu. 18 Ne ipa e nolaa dewalala rua, tane ne warerena alepie Saidon apanawa godiu ebowa Rimon duwa bedewe pulo watawa osowe sape wadaposilempa. Me ne mabuna osowe dodanalempo nata sape wadaposintonta. Epe dewantepino Iawe God ide kadina insadabuamopi?”
19 Ita Elaisa Naeman diene wanase, “Wanwan euda obasa e bedeawolepio aitaa.”‡Elaisa sumanaileidia Iawe God Naeman kadiwa insepidabuasapi sa baiwa Elaisa saua euda wane me osowe ituno ita alen. Ita me ene alen.
Israelwa warereu Eiab 851 B.C bedewe bolen. Me aupe Israel apanawa warereu isiwa seganton. Mo Samaria bolawa debama bedewe waimoio Osia warerelen. Tane aupe 724 B.C bedewe tawo Asaria apanawa sorodiau Israelwa onau eneiena.
*5:10: Moses anaanawa wadiase, kero ema apana dewasadio miramiraleide (Liwai Damba Nolau 13.3).
†5:17: Naeman insedia Israel apanawa Godiu Israel bolawa os bedewe wadaposisai. Apana inseia Israel tawowa bola euda kakaiwa. Ita Naeman bolawe leulene wisene Iawe God mampe wata dewasan. Naeman tawowa Siria ipa Israel tawowa onape winede. Me mai menasapona apana insepuase me dogo poilen ita me peroweta iririmona dogo moa me wanapu.
‡5:19: Elaisa sumanaileidia Iawe God Naeman kadiwa insepidabuasapi sa baiwa Elaisa saua euda wane me osowe ituno ita alen.