42
Iakob obampa waaubamodio Isibtiwa antoi
Iakob wandie nana wit debama Isibtiwa winedia umanawa etene obampa diamone wanase, “E dima enakoaitilana?” Ita me wanase, “Asisuneana, ne nana Isibt bedewe winedia umanawa etana. E sape aitane nana wit gimaraitane winleno nate tounawe wanta ita mai bontata, dia.” Aposel 7.12
Sa baiwa Iosep tatatawa 10 nana gimarantopua baiwa Isibtiwa iane antoiena. Tane Iakob otopa Beniamin, me ipa Iosep wamba mai wapaaubepono tatatawa do antopona, dia. Ipawa me nuawa inguguralen naita kadiwa donsapia sawa. Kanaan bolawa bedewe omana segaleno baiwa Iakob obampa apana isiwa do iane Isibtiwa antoiena nana gimarantopua baiwa.
Tane Iosep bola sa uduudu atowesane oniedio apana me mampe wimoie nana gimarantoie. Sa baiwa tatatawa me mampe wimone imimpu emmisintone dunentone dogo osowe nambu udanadodeiena. Iosep tatatawa ewamone atenmon tane dewalena ewaewawa abo me apana da nambea rua. Sa baiwa aiawa badowa mampe diamone wanase, “E mida, naepeinta wilen?”
Ita mo leusane waienase, “No bola Kanaan bedewe wainite nana gimarawa awa winetana.”
Iosep mo ewamone atenmon tane mo mai me atensapona, dia. Tane me tatatawa auenmona insene ita diamone wanase, “E ipa iwu apanawa! Mape wilene no bolamba ewaitusailana, awopawa dainea obasa winedia bedewe odane kadinena baiwa.” Bumpai 37.5-10
10 Tane mo me sipoasane waienase, “Dia, debamamba! No e nolaa dewalala os, nana gimarawa winen.”
 
21 Tauma mo muba gagalontone waienase, “Ulaipa, no wainimba matangelawa donsaitana. Mapo no wainimba poka etene sau umanawa wadio mai nuaparewantepe sausapona, dia. Sa baiwa no tauma sai ema donsaitana.”
22 Mo epe waio Ruben wanase, “Ne bauta dialena, oto mampe mai kadiwa dewasata eta, tane e mai ne aiana etape ruawaitapona, dia. Tauma no me bosatana malesawa donsaitana.” Bumpai 37.21,22 23 Tane Iosep Isibt aiawa mampe gagaloleidio sauwa apanawa aia sa leusadie mo aiauwo diamodie. Iosep tatatawa dima waia me etedie atenleidie. Tane mo dima waio me etedie atenleidia mo mai atentoipe, dia.
Iosep tatatawa me mampe wimone wit gimarantone awanene leuntone Kanaan bedewe anton mambu mampe. Tane muriwa mo osowe leuntone wimoiena wit gimarawa baiwa.

42:2: Aposel 7.12

42:9: Bumpai 37.5-10

42:22: Bumpai 37.21,22