8
Iesu, me ipa Pirisimba ionoidoa
Sam 110.1Insena, gagalo ema ipawaida ema epe: No Pirisimba ionoidoa ipa debamawaida, me uboo God mukawaaida kolaiwatawa witapa on deneuwe winedia osowe wande. Do me sape bola kakaiwaida bedewe pirisi nolawa dewasade. Bola sa ipa God duwa kakaiwaida God eindodeno badowa enede, mai apana witapo dewasapona, dia. Israel bedewe pirisi ionoidoa sonabamoie amona daitada ita do pue pulowa God mampe itumpaa baiwa. Sa baiwa no Pirisimba ionoidoa Iesu ideita deawaa God mampe nitu da pulolepi. Tane no Pirisimba Iesu tawo osowe wainipono me mai pirisi nolawa da wadapona, ipawa apana isiwa Moses anaanawa wadia rua nola sa wadeie amonau itui. Tane du kakaiwa bedewe pirisi nolantoia, sa ipa dima uboo ipawaida winedia eueuwa, ba aleupa rua. Ne epe wadina, ipawa Moses God duwa kakaila rialala wadawada baiwaleidio God me diene wanase,
“Ewadewaitaa, du kakaila ema aleupa wadi iwa osowe euwaeno ewaana ruawaida dewasaa.”
Tane tauma Iesu pirisi nolawa eudida waden, mai pirisi tawo osowe nolantoia rua.
Deawaa, God sauawa gagalowa sanaa dima Iesu meba ipawanasana ipa eudida, mai saua gagalowa tontawa rua. Ipawa gagalo sanaa ema bedewe God sauawa eudida itun, mai bauta wana rua. God sauawa gagalowa tontawa noladewaleipono ando mai saua sanaa da segalepona, dia.
Ierima 31.31-34Tane God apana mampo kadi donsana baiwa epe wane wanase:
“Ne, e Tatala, wadina. Walama iedia ando wisepio ne sauana gagalowa sanaa Israel ita Iuda apanawa baibu itupa.
Saua sanaa ema ipa mai gagalo tontawa ne mo nosinosiu mampo ituna rua. Ne bautantene mo witapu wadane Isibt bedewe banlamono nomone antoiena walamawe ne sauana gagalowa tontawa ituna. Tane saua ne wane ituna mo mai ruawantope wankasantopona, sa baiwa ne emone adiananamona. Ne, e Tatala, wadina.
10  Ando walama iediawo ne saua gagalowa sanaa Israel apanawa baibu wape itupa. Walama sawo ne anaanana mo insaisau bedewe itupa, ita do nuau bedewe girumanteapa. Ne mo Godiu wananteapa ita mo ne apananaida wanantopu. Ne, e Tatala, ema epe wadina.
11 Walama sawo apana uduudu, kerakera ita debama ne ateineapu. Sa baiwa mai mida me sowa ando waeuwasapie wapiase, ‘Tatamba God ateitaa!’
12  Ne mo nuapareuntape mo dewau kiokiou inse padabuasapa, ita do mo kadiu ando mai insepa, dia.”
13 Gagalo ema bedewe God sauawa sanaa umanawa wade. Sa baiwa God sauawa tontawa ipasiasan. Ita dima ipasialene tontalena, sa ipa kerauda os dialepi.

8:1: Sam 110.1

8:8: Ierima 31.31-34