1 Saua gagalowa tontawa bedewe God simbiawa dewawa anaanawa wineie. Ita do saua gagalowa tontawa wadia rua Israel apanawa du kakaila tawo ema mampea wadeiena. 2 Du sa rialala bedewe bola empuempulala nata winei. Bola kakaila du nopea bedewe siwa endola nepa ita bured amonantoia watawa winei. 3 Bola ema adiwe du bedeweido sape ipa bola kakaiwaida gara mampe seunabodeiena. 4 ✡Ekisod 25.10-16; Ekisod 25.16Bola kakaiwaida sa bedewe ipa piupiu suia watawa gold mampe rupulala enede. Do sape bokis dea onapea ita bedewea gold mampe rupulala enede. Tane bokis kakaila, sa ipa God sauawa eueuwawa. Bokis sa bedewe Aron koinawa bauta inilene seuseulena, ita do onta moawa ambodalala winamoi. Onta sa gold mampe dewala bedewe ipa nana ebowa Manna waia winei. Tane do bokis kakaila bedewe God anaanawa uduudu 10 seu tabataba nata osowe girumalena winamoi.

5 ✡Ekisod 25.18-22Bokis iwa osowe nitu nata ewaewau apana rua mabupu dolala waimoi. Mo ipa God sapawaida eueuwawa. Bokis iwa mo mabupu mampe itubodasai. Tane bokis iwa, sa ipa God apana kadiu insedidabuasadia eueuwawa. Nitu ema umanawa waeuwa uduudu no tauma mai wataa rua, dia. 6 Nitu ema uduudu intaweintawe winamoio pirisi walama ruawantoie du kakaila bola du nopea bedewe odeie simbia nolawa dewasai. 7 Tane bola du bedeweido pirisi ionoidoa me os ena dea bedewe walama dea os odedi aleide. Me mai di odeipona, tane pue osinawa wadedie do odedi aleide. Osina sa me du bedeweido meba baiwa ita do kadi apana insakoa mampe dewasaiena baiwa amonaleide.

8 Ema mampe Aleu kakaiwa sabamosadie no epe waeuwanede: Walamaipa du kakaila tontawa bedewe simbia nolawa winediawo bola kakaiwaida uboo awa intawa mai wadapaaubepona, dia. 9 Dewa ema uduudu ipa eueuwa ande walamawa baiwa. Eueuwa ema epe sabamosade: Nana ita pue pulowa God mampe amonantoia mai mukawa da wineipona ita apana God duwa bedewe odedia nuawa insaisawa dodomanasapi sapaidasapia rua, dia. 10 Nana idilala, ba nanalala, do mitamita dewawa, sa ipa eueuwa onapea os dewasai. Tane God tauma inta sanaa ituno winede. Ita inta sanaa ema dewa onapea umanawa waitana ipasiasadie diasade.

11 Tane Keriso no Pirisimba ionoidoa wisen ita nitu uduudu eubu intawa aitamana sabamosan. Me God duwa kakaiwaida eudida bedewe odene alene simbialeide. Du debama uboa, sa ipa eudida mai du kakaila tawo ema mampea apana witapo wadeiena rua, dia. 12 Keriso God duwa kakaiwaida uboa bedeweido walama dea os deasane me meba osinawa mampe odene alen. Ita me no baimba malesa itune inawinakasala intawa wadenauben. Me mai pue gote, ba kau sanaa osinau wadape do odape alepona, dia. 13 Israel bedewe pirisi ionoidoa gote ita kau mona osinau, ita do kau otopa iwoa suieno intuwana isanawa otedie apana osouwo weisade. Mo mida mira do odeia inta ema bedewe etepu euleide.

14 Gagalo ema ipa ulaipa: Pue osinawa apana etepu mirawa nambesan, tane Iesu osinawa ipa mukawa debamaia, mai pue osinawa rua, dia. Iesu bedewe mai wawu da do, ita me Aleu wanwankasalala mukawa mampe meba etepa pulolene amona eudida God mampe itun. Ema mampe me no nuamba insaisawa dewawa bobopa mitedie eusadia, no God wanwankasalala simbiasantaa baiwa. 15 Dewa ema uduudu mampe God sauawa sanaa apana me do deantopua baiwa wane ituna Keriso ipawanasan. Iesu meba bowa mampe apana God sauawa tontawa walamawe dewa kadiwa dewamoiena malesawa itune inamon. Sa baiwa mo mida God apamodia me amonawa euwa winakasala wadapu, me saualena rua.

16 Tane saua gagalowa umanawa ema do insena. Apana e sauaepie wapiase, “Ne bonteapo aupanawo dima ne mainawoa edina e wadaa.” Tane apana sa waimpaa walamawe dima me sauawalena e mai wadaa rua, dia. 17 Saua me gagalowalena wandia walamawe ipasia, tane bolepio aupe saua sa ulaipalepi. 18 Ipawa ema baiwa God sauawa gagalowa tontawa pue osinawa mampe os ulaipalen.

19 ✡Ekisod 24.6-8Inta ema rua Moses bauta dima uduudu anaana bedewe girumaleno winedia Israel apanawa diamon. Ema aupe me kau sanaau ita gote osinau wadene esa do deasane. Tauma me sipsip imba bumawa nitu inilala wasidawasida osowe taumone osina bedewe aine anaana bukawa ita apana uduudu sape eneia do osouwo uwakokosan. 20 Me dewa ema dewasadie wane wanase, “Osina ema ipa God sauawa gagalowa e baila ituno winedia ipawanasade.” 21 Dewa ipa deawaa Moses pue osinawa sa wadene God duwa kakaila rialala ita do nitu uduudu simbia nolawa baiwa du bedewe wineia osouwo weisane eumon. 22 ✡Liwai 17.11Ulaipa, kerauda os nitu uduudu osina memaaubala mampe euntoie Moses anaana wadia rua. Tane osina diaewo apana kadiu mai insepadabuasapona, dia.

23 Gagalo ema baiwa no epe ewate atenten: God duwa kakaila ita do dima bedewe wineia uduudu pue osinawa mampe euntoiena. Tane nitu sa tawo osowea ipa dima uboo wineia eueuwawa aleupa os. Nitu ipauida uboa mai pue osinawa mampe euntopua rua, dia, tane mo nitu eudida mampe os euntopu. 24 Keriso mai du kakaila apana witapo wadeiena bedewe odape alepona, dia. Du kakaila sa ipa dima uboo winedia aleupa os. Tane Keriso ubaida bedewe odene alene ita tauma wisedie no baimba God danawe enede. 25 Israel pirisiu ionoidoa ena ruawaleidie mai me meba osinawa, tane pue osinawa wadedie do God duwa bedeweido bola kakaiwaidawo odede aleide. Tane Keriso me mai meba osoweosowe puloleipona, dia. 26 Me epe dewalepono me tawo segalena walamawe ita tauma ideita osoweosowe poka etapona. Tane me tauma walama ompa osowe walama dea os deasane wisene me meba osinawa mampe pulo itun, kadi riasapie diasapia baiwa.

27 God insaisawa ituno winedia rua apana uduudu mo walama dea os bontopue ita aupe God danawe enapu kotu baiwa. 28 ✡Aisaia 53.12Deawaa Keriso do walama dea os meba etepa pulolene ituna, apana uara kadiu awanepiaubepia baiwa. Ita me awa natawa wisepia, sa ipa mai kadi da awanepiaubepia baiwa, dia. Tane me wisepie mo mida me inta ewaewawantoie onioniawaidantoie waimoia inamopia baiwa.