24
Israel apanawa sauantona Iawe God nolawa dewasapu
1 Ema aupe Iosua Israel damba uduudu diamono bola debama Sikem bedewe wimone auweiena. Ita mo sape wimoieno me apana eiau, uaula apanawa, kotu wadawadalala ita nola deadea wadeia apanawa uduudu God danawe enapua baiwa diamono eneiena.
2 Iosua apana sa uduudu diamone wanase, “Iawe, Israel apanawa Godiu wadiase,
‘Mapoido e nosinosila Tera ita me obampa Abraam ita Nao✡ Bumpai 11.27 esa Eupirates waiwa dauwo waine god da wadaposimoie. 3 Tane e nosila Abraam bola sawo wandio ne wadane banleno Kanaan bolawa uduudu bedeweinta alen.✡ Bumpai 12.1-9 Ne me otopa Aisak bedewee nosinosiwa uara wanana.✡ Bumpai 21.1-3
13 E Ioadan elee bautala Kanaan bedewe odalano ne tawo irai dola enalena, sape e mai iraitapona, dia. Ita do bola debamau enaleno bedewe tauma wainilana, bola sa e mai witalawo dewasapona, dia. Ita do e wain ita olib iawa mai aimopona ipawa naumoio naile wainilana.’ ”
14 Tane Iosua Israel apanawa diamone wanase, “Sa baiwa e Iawe God sawaitonune nuala uduudu mampe simbiasanuna. E nosinosila esa Eupirates waiwa dauwo ita Isibtiwa waimoie god lagawau kokoitaubu wadaposimoia aubamone emonatuwapi. Tane e Iawe God os simbiasanune wanlempa. 15 Tane naita e Iawe God simbiawa dabuaitana, ande ema e godila dainea inseilana sonabene ita simbiasanuna. E nosinosila Eupirates waiwa dauwo waimoie bola sa godiu wadaposimoia ba Amoriwa mida bolau e tauma wadale wainilana godiu wadaposimoia wawoitana. Tane ne ita ne duna bedewe waimoia do Iawe God os wadaposisante simbiasante wainenta.”
16 Tane apana leusane waienase, “No mai Iawe God adiananasate ete god da wadaposimonta, dia. 17 Ipawa no nosinosimba do Isibt bedewe mo nolau dewalala wainitano Iawe God no inanen. Me dewa pokawaauida dewamodio emamboido ewatana. Tane no sala makowa bedewe uwa daitada apanawa bedeuwointa antitano me no oniadewasaneno anten. 18 Tane do Amori apanawa ita apana isiwa bola ema bedewe waimoia Iawe God tanamono antoiena. Sa baiwa Iawe God me os ipa no Godimba simbiasante wainenta.”