4
Seitan Iesu rubusade
(Mak 1.12-13; Luk 4.1-13)
1 ✡ Ibru 2.18; 4.15Ema aupe Aleu kakaiwa Iesu banleno sala makowa bedewe alen, kadi mamba Seitan me rubusapia baiwa. 2 Me nana mai napona walama 40 ita tadina 40 dialen, sa baiwa Iesu omanatoidasan. 3 Ita kadi mamba Seitan me mampe wisene diene wanase, “Naita e God Otopaida seu emanta diawo bured wanalepio nae nuaa topi.” 4 ✡ Diutor 8.3Tane Iesu leusane wanase, “Buka bedewe girumalene ema epe wade,
‘Apana mai bured os tounawe wampua rua, dia! Tane inawaa waimompaa baiwa apana ideita God aiawa dima uduudu me moawe wadio nosedia tounawe waimompa.’ ”
5 Ema aupe Seitan Iesu banlene wadi sa ene Ierusalemwa, sa ipa God bolawa kakaiwa, alene God duwa iwa ionoidolena osowe banleno alene enen. 6 Ita Seitan Iesu diene wanase, “Naita e God Otopaida mape eneianawoe eba aubaubaite iee aitaa! E mai kadiwa da donsaa, dia, ipawa buka bedewe girumalene ema epe wade,
‘God enseliwa e umanaa diamopio e oniadewasa- empo kadiwa mai donsaa, dia. Naita bagora da e manawolempa God enseliwa e waa seu osowe epamoa sawa awanaepue antopu.’ ”
7 Tane Iesu Seitan aiawa sipoa wabodasane wanase, “Buka bedewe do girumalene ema epe wade,
‘E Tataa God mai rubu osowe itue me mukawa ba ginasawa ewaa baiwaite diaa, diaida!’ ”
8 Iesu ema wano aupe Seitan me banlene wadi iwa osowe odene alene tawo mukawa ita tawo ewanuauwa daitada euwasano ewen. 9 Ita kadi mamba Seitan Iesu diene wanase, “Ne wana bumpe e imina emmisite ne wadaposinea dewa uduudu ema eweiana ne eneepatuwapi.” 10 Tane Iesu wabodasane diene wanase, “Seitan, nambe aitaa! Buka bedewe girumalene ema epe wade,
‘E Tataa God os mampe insaisaa itune wadaposi- sane simbiasane wanempa, mai mida da, dia!’ ”
11 Tauma Seitan Iesu eno aupe ensel nomone oniene simbiasaiena.
Iesu Galili bedewe nolawa uwaaleide
(Mak 1.14-15; Luk 4.14-15)
12 ✡ Matiu 14.3; Mak 6.17; Luk 3.19,20Ion Babatutu dibura bedewe ituieno umanawa Iesu etene Iudia ene leulene alen Galiliwa. 13 ✡ Ion 2.12Me mai Galili bolawa Nasaret bedewe wampona, dia, tane alene Kapeanaumwa wandie. Bola sa ipa doa Galili tampe Sebulun ita Napitali bedeuwo. 14 Iesu bola sawo wandia, sa ipa dima peroweta Aisaia wana ulaipalepia baiwa. Peroweta wane wanase,
15 ✡ Aisaia 9.1,2“Sebulun ita Napitali, e doa Galili tampe Ioadan esawa waiwa dawo wineilana. E ipa bola debamau Galili bedewe naepe Iuswa ita uwa daitada apanawa do waimoia. E Galili apanawa ne asisuneana!
16 Apana mida dubawa bedewe waimoia sapa debamaia ewei, ita mida God mai atensapona bolala rua waimoia osouwo sapa wade.”
17 ✡ Matiu 3.2Ita walama sawo Iesu uwaalene God aiawa amonaleidie wanase, “E kadi bedewe insaisala leusane kadiwa ene dodomanaitana, ipawa God gonaawa tauma maidalen!”
Iesu wawe alala uwaaida sonabamone apamodia warorosapu
(Mak 1.16-20; Luk 5.1-11)
18 Iesu doa Galili waiwainta aleidie me apana wamba nata lawaintoio ewamon, dea ipa Saimon, ebowa da waia Pita, ita me wamba Endru. Mo nata bouri lawailala ita mo lawaibu doa bedewe aubamone eneio ewamone 19 diamone wanase, “Winlene ne waroroneana, ita ne dewalepo apana lawaimonuna.” 20 Me epe diamona rua tauwadea lawaibu emone Iesu warorosane do antoiena. 21 Ita Iesu doa tampe aleidie Sebedi obampa nata dommon, mo ebou ipa Iems ita Ion. Mo nata mambu do waa bedewe lawaibu imaasaie waimoio Iesu ewamone ita apamon wimpue warorosapua baiwa. 22 Mo Iesu aiawa etane tauwadea os waau ita mambu do emone Iesu wawe antoiena.
Iesu Gagalo euda amonaleidie ita kerolala inamode
(Luk 6.17-19)
23 ✡ Matiu 9.35; Mak 1.39Tane Iesu Galili bolawa uduudu bedewainta alene gagalo dubu bedeuwointa waeuwaleidie, ita Gagalo euda God gonaawa umanawa amonaleidie. Do me apana kerolala ita poka daitada etaetalala inamodie leidie. 24 Ita Iesu benemawa sape debamalene Siria tawowa uduudu bedewe alentuwan. Sa baiwa apana sosou kerolala, poka daitada wadamodia, apana bedeuwo aleu kadiwa wanwanlala, bosulala isiwa ita apana tampu bobopa banlamone Iesu mampe wimono inamon. 25 Iesu epe nolaleidie leidio apana uaraia me wawe antoiena, mo ipa Galiliwa ita bola Dekapolis bedewe wanwanlala, do Ierusalem ita Iudia apanawa, ita Ioadan esa waiwa dawo wanwanlala.