1 Soloma꞉ wese wese alo hata꞉ mo Tekehalina꞉ disaipolo wanda꞉hali tolu lutia pomiekeme. 2 Kutu putia mo yeni peao haemeke you haliwekina꞉ you hali pa꞉ta꞉ pua alota꞉ Mo Damasikasi nane pi hotu haleme damanu pa꞉ta꞉ do hande panake hau piteleme wanda꞉hali dipula mea Diutuseleme nane mea ipuluekema꞉ loa꞉ma꞉ pase kie laa pua honke leekeme. 3 Solota꞉ Damasikasi nane polueke laa pota꞉na꞉ pulu haena꞉ oli ya nanema꞉ pa̱a̱ tieke a꞉pa mo some dupao a꞉pa to hopa꞉liaeyekeme. 4 Kutupa mo some kenkena꞉ honda꞉pa topopi lopolo hata꞉ ho̱la̱꞉make opiekepate alota꞉ Soloo. Soloo. Ekipeke I̱ yaapo a꞉nda꞉ litelepe leekeme. 5 Kutupa Soloma꞉ alota꞉ Tekehalio. Neketa꞉ epiya꞉ka꞉ta꞉pe leekeme. Mo hande pi ho̱la̱꞉makema꞉ alota꞉ I̱ta꞉ Yesue. Nakana꞉ma꞉ I̱ yaapo a꞉nda꞉ liteleke handa loa꞉me leekeme. 6 Tiao oni da nane naka꞉ pulu peleeki loluekema꞉ pue leekeme.

7 Kutupa mo Solo ame̱le̱ epemeke haliweki ota꞉ nunu nunu pisiki make ota꞉ na leke hata꞉ mo leeke pi homeke opiekepate ma꞉nda꞉ a꞉nda꞉ na handemekeme. 8 Solo oni kenke mina꞉pa꞉lao tiao ipika꞉ leketa꞉ ki leekepate ota꞉ ala꞉ta꞉ ma꞉nda꞉ na handeeke handa hali mandane hatiki mandane hatiki pea hatuku oni Damasikasi da pa꞉ta꞉ pemekeme. 9 Kutupa Solota꞉ ikali ne make na neke ala꞉ta꞉ ala꞉ta꞉ make na handeke hoto tepo oni Damasikasi da pa꞉ta꞉ wiekeme.

10 Kutupa oni Damasikasi Ketiso hali ma꞉nda꞉ bikita꞉ A꞉na꞉naisi hayekeme. Tekehalima꞉ upama꞉ alota꞉ A꞉na꞉naisio. Kutupa A꞉na꞉naisima꞉ alota꞉ Tekehalio. I̱ta꞉ do pilume leekeme. 11 Kutupa Tekehalima꞉ alota꞉ Tiao. Oni pota꞉ bikita꞉ Tikitikipiki pota꞉ yola꞉ mea pua Diudasina꞉ da pa꞉ta꞉ pua Tasa꞉si hali Solota꞉ hando pa꞉ta꞉ pila꞉pe laa lota꞉ pia꞉pekee. Ipikita꞉ yeni koto pitolo pila꞉ handa꞉e leekeme. 12 Kutupa ipikana꞉ma꞉ hali ma꞉nda꞉ biki A꞉na꞉naisi a꞉pa ipika꞉ kiki yaka youna꞉ a꞉pa wia꞉ka꞉na꞉ ya leke ki leliekee laa amba꞉ handea꞉me leekeme. 13 A꞉na꞉naisima꞉ alota꞉ Tekehalio. Do halita꞉ naka꞉ Diutuseleme wanda꞉hali pa꞉ta꞉ tanda tanda hala꞉la꞉eki ma꞉nda꞉ ma꞉nda꞉ma꞉ a꞉pa la꞉tiki pu haleke opu halome leekeme. 14 Kutupa ipikana꞉ma꞉ mo yeni peao haleme teke haliweki pa꞉ta꞉ pase mea wia hata꞉ do naka꞉ bikina꞉ pi milie Damasikasi wanda꞉hali pa꞉ta꞉ tanda tanda halolo pita꞉la꞉me leekeme.

15 Koto leekepate Tekehalima꞉ alota꞉ Pue. Do halita꞉ yaka amba꞉ molo halima꞉ pa꞉la꞉me leekeme. Yaka bikita꞉ Diendaili wanda꞉halima꞉ make kini haliwekima꞉ make Isulai wanda꞉halima꞉ make opina꞉ pua꞉ma꞉ pue leekeme. 16 I̱ma꞉ yaka hauna꞉ tanda pa꞉la꞉eki mina꞉ la waluekema꞉ pue leekeme.

17 Koto ekina꞉ A꞉na꞉naisi pua da pa꞉ta꞉ opolo peekeme. Kutupa ipika꞉ kiki Solona꞉ youna꞉ pua witolo hata꞉ alota꞉ Solo ya kameo. Tekehali Yesu mo pota꞉na꞉ ipulu halena꞉ epeeke hande Yesuma꞉ naka꞉ leke paa kilao Holi Sipitidima꞉ tumba halena꞉ yeke I̱ tapaeya꞉me leekeme. 18 Kutupa koto kone mo ta꞉peli o̱ma꞉ handeke ale manuma꞉ leke tombuao hao londa꞉la꞉pa lopeke nono piekeme. Kutupa ipika꞉ leke paa ki leekeme. Kutupa koto kone tiao pua bapitaisi piekeme. 19 Kutupa ne tamba꞉ mea nolo yapeeke dina꞉ta꞉ ipika꞉ honkopu paa hao epeekeme.

Solota꞉ Damasikasi da hao hala꞉ Ketiso haliweki ame̱le̱ hosiki hayekeme. 20 Ipikana꞉ma꞉ koto kone Yesu Ketisona꞉ pi mo pi hotu haemeke da pa꞉ta꞉ walolo hata꞉ alota꞉ Yesuta꞉ Koda꞉na꞉ Eiyekee leekeme. 21 Mo opimiki haliwekita꞉ leke wopu opa꞉ alu alu pimikime. Kutupa alota꞉ Do hali dia꞉ya꞉ka꞉ta꞉pe. Mo hande Diutuseleme da pa꞉ta꞉ hande some Yesuna꞉ biki laa yeni pimi wanda꞉hali tanda tanda halea꞉ hali dia꞉ya꞉ka꞉ta꞉pe. Aowe. Ipikita꞉ do epa꞉la꞉ ekita꞉ mo kutupiki wanda꞉hali mea tonkao hatuku mo yeni peao haleme teke haliweki pa꞉ta꞉ mea poluekema꞉ a꞉pa pa꞉la꞉me lemekeme. 22 Kutu piekepate Soloma꞉ta꞉ pi waluekema꞉ wele wopu piekeme. Ipikana꞉ma꞉ Yesuta꞉ ota꞉ Koda꞉na꞉ Ketisoe laa ota꞉ ana꞉na꞉ peneme yao waleeke mandane pi manuta꞉ mo Damasikasi da haleme Diu haliwekima꞉ pi homeke ma꞉nda꞉ma꞉ hombo pealuekema꞉ ana꞉ na pimikime.

23 Hosiki hao hao pea wetepena꞉ mo haliwekima꞉ Solo luekema꞉ tome tome pambemekepate mo hande lemeke ekita꞉ Soloma꞉ amba꞉ opiekeme. 24 Mo haliwekima꞉ mo pota꞉ kake pa꞉ta꞉ timba andusa꞉ andusa꞉ make pa̱a̱na꞉ make haemekeme. 25 Kutu pimikipate disaipolo haliwekima꞉ mo peiyekeeki mea ankulao Solota꞉ basekedena꞉ pitina꞉ laata꞉ mea lopa꞉niaemekeme.

26 Mo Diutuseleme da nane opolo a꞉pa mo disaipolo wanda꞉hali ame̱le̱ apa꞉tao haluekema꞉ piekepate mo Ketiso haliwekima꞉ta꞉ Ipikita꞉ disaipolo hali dia꞉me hone witolo hata꞉ paala꞉ma꞉ homemekeme. 27 Kutupa Banabasima꞉ Solota꞉ mo aposolo haliweki pa꞉ta꞉ hatuku pua mo Tekehalima꞉ pota꞉na꞉ Solo pa꞉ta꞉ peneme yaeya꞉eki make pi leekeeki make la haleekeme. Kutupa oli Damasikasi da hata꞉ Soloma꞉ Yesuna꞉ biki a꞉mbao na leke pi waleekeeki make mo haliweki pa꞉ta꞉ la haleekeme. 28 Koto ekina꞉ mo haliweki ame̱le̱ hata꞉ da pa꞉ta꞉ honda꞉ pamba꞉tiki opolu batiki piekeme. 29 Solota꞉ mo wanda꞉hali paala꞉ma꞉ na homeke mo Tekehalina꞉ biki laa pi wala꞉tiki piekeme. Kutupa pi pi la꞉tiki pitolo hata꞉ mo Kitiki pi lo haemeke Diu wanda꞉hali ame̱le̱ make pi la alu alu pua꞉tiki pomiekepate mo wanda꞉halima꞉ta꞉ Solo lu pie hone wimikime. 30 Mo hameke titima꞉ kotoeki opu haota꞉ Solota꞉ Sesatia nane hatuku pua Tasa꞉si nane pena꞉ tapaemekeme.

31 Kutu pieketa꞉ mo Diudia nane make Ka꞉lili nane make Sametia nane make koto kenke paeyao pa꞉ta꞉ haemeke siosi wanda꞉halita꞉ a꞉nda꞉ pelia haemekeme. Koto siosi wanda꞉halita꞉ Holi Sipitidima꞉ tamba꞉ minolo haena꞉ honkopu hao hata꞉ daeyatiki pimikime. Tekehali pa꞉ta꞉ panda꞉puniao hata꞉ pimikime.

32 Pidata꞉ kenke paeyao pa꞉ta꞉ pomu lopaata꞉ hoto ma꞉nda꞉ta꞉ mo Lida da nane haemeke Koda꞉na꞉ wanda꞉hali handolo peekeme. 33 Koto da pa꞉ta꞉ta꞉ hali homeke Iniasi handeekeme. Koto halita꞉ kiki anke homa pa wieke hali pita꞉ bapi ketepo hata꞉ ipika꞉ da panda꞉ pa꞉ta꞉ u pita꞉tiki pu hayekeme. 34 Pidama꞉ ipiki pa꞉ta꞉ alota꞉ Iniasio. Yesu Ketisoma꞉ neke epeaasa꞉me. Naka꞉ yapa꞉ta꞉ oko pea mina tiae laa leekeme. Koto leeke pita꞉ kone Iniasita꞉ tiaeyekeme. 35 Mo Lida Sietoni da yaapo pa꞉ta꞉ haemeke wanda꞉hali paeyaoma꞉ mo hali handaata꞉ Tekehali pa꞉ta꞉ la꞉ka꞉la hone tulaemekeme.

36 Mo Diopa da pa꞉ta꞉ta꞉ disaipolo wanda꞉ homeke Ta꞉bida hayekeme. Koto bikita꞉ pa mo Kitiki pi laata꞉ Dokasi laa la꞉la꞉me. Koto wanda꞉ma꞉ta꞉ hoto paeyao epeke hau pu hata꞉ mo ala꞉ta꞉ ma꞉nda꞉ dia꞉yeke mesiolo hali wanda꞉hali tamba꞉ mu hayekeme. 37 Kutu pu hayekepate nate ma꞉nda꞉na꞉ koto wanda꞉ta꞉ yeni tondope mea ota꞉ homeekeme. Ipika꞉ toko tanda꞉paata꞉ oli manda da panda꞉ pa꞉ta꞉ wina꞉ lemekeme. 38 Koto Diopa data꞉ mo Lida da teke pa꞉ta꞉ hayeke handaa mo Diopa da haemeke disaipolo wanda꞉halima꞉ta꞉ Pidata꞉ Lida da pa꞉ta꞉ a꞉pa hala꞉me pi opuaata꞉ hali yaapo pa꞉ta꞉ pi tapaaso alota꞉ Niki pa꞉ta꞉ pilisi a̱i̱ epo lapa꞉peke lena꞉ tapaemekeme.

39 Koto ekina꞉ Pida tiaota꞉ mo hali yaapo ame̱le̱ mandakena꞉ pemekeme. Da opolo peeketa꞉ oli manda da panda꞉ pa꞉ta꞉ ipiki hatuku a꞉meimikime. Koto pa꞉ta꞉ta꞉ mo kosa꞉piki wanda꞉sunu paeyaoma꞉ta꞉ mombololo hata꞉ e̱ a꞉pa lemekeme. Hande Dokasima꞉ na homeke pa hayeke pita꞉na꞉ tumbulieke sedisunu make kosa꞉ aka꞉manu make Pida pa꞉ta꞉ walemekeme. 40 Pidama꞉ mo wanda꞉sunu paeyao hama꞉ nane pupe laata꞉ tumiki yotuao yeni peaata꞉ mo wanda꞉ toko handa꞉moneaaso alota꞉ Ta꞉bida. Tiae laa leekeme. Mo wanda꞉ma꞉ leke kila Pida handaata꞉ tiao pitiekeme. 41 Pidama꞉ panda꞉puniao ipika꞉ kiki yola꞉ mea tiaeyekeme. Kutu pieketa꞉ Pidama꞉ mo Ketiso wanda꞉hali make mo kosa꞉piki wanda꞉sunu make ipupe laata꞉ hande wanda꞉ta꞉ do tiao hala꞉ handa꞉pe laa leekeme. 42 Koto hande pieke ekita꞉ mo Diopa da paeyao pa꞉ta꞉ la꞉tia tia pimikime. Kutupa wanda꞉hali wopuma꞉ Tekehali pa꞉ta꞉ hone tulaemekeme. 43 Pidata꞉ Diopa da pa꞉ta꞉ hoto elekeeleke hatiki peaata꞉ mo ma꞉na꞉ yonkelekema꞉ ala꞉ta꞉ ala꞉ta꞉ wepu hayeke hali Saimonona꞉ da pa꞉ta꞉ pelia haepekeme.