1 Mo Sesatia da nane ami opisa hali homeke hayekeme. Ipika꞉ bikita꞉ Koniliesie. Ipikana꞉ma꞉ta꞉ mo ami haliweki 100 handeteke hayekeme. Koto somema꞉ handeteke hayeke ami tapakena꞉ bikita꞉ Ideli tapakee. 2 Hande halita꞉ Koda꞉ pa꞉ta꞉ hone wotu u hao ipika꞉ weteke weki wandikima꞉ Koda꞉ pa꞉ta꞉ paala꞉ma꞉ wotu homa꞉tiki pu haemekeme. Kutupa ipika꞉ kiki tindipao mani dia꞉yeke wanda꞉hali pa꞉ta꞉ halo haota꞉ Koda꞉ pa꞉ta꞉ yeni pia꞉tiki pu hayekeme. 3 Nate ma꞉nda꞉na꞉ nate toke nane haena꞉ Koda꞉na꞉ enisolo homeke epeekeeki upama꞉ ota꞉ peneme yao handeke nono piekeme. Mo enisoloma꞉ ipiki pa꞉ta꞉ alota꞉ Koniliesio leekeme. 4 Koniliesima꞉ mo enisolo pa꞉ta꞉ paala꞉ tieke homa handake witolo hata꞉ alota꞉ Tekehalio. Aleke ka꞉ta꞉pe leekeme. Kutupa ipiki pa꞉ta꞉ alota꞉ Naka꞉ yeni pu haleeki make naka꞉ mani halo haleeki make oli hepeni da nane pua Koda꞉ pa꞉ta꞉ naka꞉ pi laasa꞉me leekeme. 5 Kutupa ame do mo Diopa da pa꞉ta꞉ hala꞉ hali ma꞉nda꞉ ipika꞉ biki Saimono biki ma꞉nda꞉ Pida epena꞉ handa꞉ mulu pena꞉ hali ma꞉nda꞉ tapae leekeme. 6 Koto someta꞉ hali ma꞉nda꞉na꞉ da pa꞉ta꞉ ta꞉ka꞉li pua pila꞉me. Mo da teke hali Saimonota꞉ ma꞉na꞉ yonkeleke hako ala꞉ta꞉ ala꞉ta꞉ wepu hala꞉ halie. Kutupa ipika꞉ data꞉ dawala ikali tea꞉na꞉ hala꞉me leekeme. 7 Kutupa mo hande ipiki pa꞉ta꞉ pi leeke enisolo peeke nane ipika꞉ e pokao hayeke hali yaapo make ipiki teke pa꞉ta꞉ hayeke ami hali homeke make wi leekeme. Mo ipiki teke pa꞉ta꞉ hayeke ami halita꞉ Koda꞉ pa꞉ta꞉ paala꞉ma꞉ homo hayekeme. 8 Kutupa mo hande leeke pita꞉ iki pa꞉ta꞉ la halaaka꞉na꞉ Diopa da nane tapaeyekeme.

9 Kutupa da kelepeeketa꞉ mo pota꞉na꞉ pu opu hao pa Diopa da teke pa꞉ta꞉ ipulu haena꞉ kone Pidata꞉ nate you tikekena꞉ haena꞉ mo da holuna꞉ a꞉meiya yeni pua piekeme. 10 Kotoeki pitolo haena꞉ tea꞉ tieke wopu pieke handa ya nee hone witolo haena꞉ oni haliwekima꞉ ne amu peaaso haena꞉ Pidata꞉ u̱ yoka꞉ lupa peekeme. 11 Peliolo hata꞉ upama꞉ handeekepate oli ya akolopa꞉olu bao dapolo tiekema꞉ handeke ale honiki nane tonkopu mina꞉ alu alu pea mea lopa꞉niaeyekeme. 12 Koto ale pa꞉ta꞉ta꞉ ma꞉na꞉ yeti ala꞉ta꞉ ala꞉ta꞉ make basunu paeyao kenkena꞉ ula꞉ keto ala꞉ta꞉ ala꞉ta꞉ sunu make mu pamba a꞉pa mea lopa꞉niaeyekeme. 13 Kutupa pi ho̱la̱꞉makema꞉ alota꞉ Pidao. Tiao. Koto alemanu lia nae leekeme. 14 Koto leekepate Pidama꞉ alota꞉ Tekehalio. Ota꞉ dia꞉me leekeme. I̱ta꞉ hoke ale manuta꞉ na no halome leekeme. 15 Hande pi hoto yaapo peao paa alota꞉ Koda꞉ma꞉ wamo pea ula꞉ aleta꞉ hoepeao ula꞉ alee pi na lapeke leekeme. 16 Kotoeki hoto tepo peao peata꞉ mo hande aleta꞉ oli ya nane pa mea a꞉meiyekeme.

17 Pidata꞉ mo hande upata꞉ eki pulu piena꞉ pia꞉pe laa hone witolo haena꞉ Koniliesima꞉ tapaeyeke haliweki Saimonona꞉ data꞉ hando pa꞉ta꞉pe lolo pieke haliweki pota꞉ kake pa꞉ta꞉ a꞉pa hando haemekeme. 18 Kutupa wi leekeme. Saimono Pidata꞉ koto pa꞉ta꞉ hala꞉pe la lota꞉ piekeme. 19 Koto ekina꞉ Pidama꞉ mo hande upa piekeeki hone witolo pitina꞉ mo Holi Sipitidima꞉ alota꞉ Handa꞉e. Hali tepoma꞉ neke oni a꞉pa lota꞉ pita꞉la꞉ handa꞉e leekeme. 20 Tiao. Oni haliweki ame̱le̱ hone ma꞉nda꞉ na wiki pa pulu ombu hapekee leekeme. Koto haliwekita꞉ I̱ma꞉ tapao pua꞉me leekeme. 21 Kutupa Pida hola꞉pa꞉niao alota꞉ I̱ta꞉ ikana꞉ma꞉ koto weiteleme halie leekeme. Ekipeke epemepe leekeme. 22 Mo haliwekima꞉ alota꞉ Koniliesita꞉ ami opisa epeke halima꞉ tapaeya꞉me laa ipikana꞉ma꞉ Koda꞉ pa꞉ta꞉ paala꞉ma꞉ homa꞉la꞉ halie laata꞉ Diu wanda꞉hali paeyaoma꞉ epeke pi lo hala꞉ halie. Kutupa Koda꞉na꞉ yako piki enisolo homekema꞉ leeke handa naka꞉ pimanu tonka꞉na꞉ opuluekema꞉ neke handa꞉ mulu pupe leeke handa ipuluma꞉me lemekeme. 23 Kutupa Pidama꞉ da pa꞉ta꞉ epena꞉ wi laa ne polu pieke da make waleekeme.

Kutupa da kelepeeketa꞉ Pida make mo hali tepo make mandane Diopa Ketiso haliweki make mandakena꞉ pemekeme. 24 Kutupa da ma꞉nda꞉ kelepeeketa꞉ Sesatia da nane opolo pemekeme. Mo haliweki Koniliesima꞉ handeteke hata꞉ ipika꞉ tapake wanda꞉hali make ipika꞉ yankeketiti make wi lemipi pieke handa paeyao momba꞉la haemekeme. 25 Pida da pa꞉ta꞉ honda꞉ pambeeketa꞉ Koniliesima꞉ a꞉pa manda꞉hande pea ipika꞉ anke pa꞉ta꞉ lopa꞉niao Pida pa꞉ta꞉ panda꞉puniaeyekeme. 26 Kutu piekepate Pidama꞉ mo hali mina꞉liao alota꞉ Tiae. I̱ make kenke halie leekeme. 27 Kutupa Pidama꞉ mo hali yaapo pi alo hata꞉ da tukiki nane puaata꞉ mo hande mombelemeke wanda꞉hali handa alota꞉ 28 Diu halima꞉ kenke ma꞉nda꞉ hali yaapo ta꞉ma꞉ni pea꞉peke na yeke ipika꞉ da pa꞉ta꞉ pua꞉peke na ya꞉la꞉me ekita꞉ ika꞉ kone handelemepate Koda꞉ma꞉ Hali ma꞉nda꞉ta꞉ hoke hali o hoe peao hala꞉ halie pi na lapeke laa I̱ pa꞉ta꞉ walea꞉me leekeme. 29 Koto ekina꞉ mo haliwekima꞉ I̱ handa꞉ mulu epeeke handa I̱ta꞉ hone ma꞉nda꞉ na wiki epoa꞉me. Kota꞉ ekipeke I̱ handa꞉ mulu epena꞉ la pipe leekeme.

30 Kutupa Koniliesima꞉ alota꞉ Hoto tonkopu amba꞉ yopua nate dupitolo haena꞉ I̱ma꞉ta꞉ do da pa꞉ta꞉ hata꞉ welealo nane yeni pitolo hano hakepiki dau pambaake hali kuta kone a꞉pa I̱ teke pa꞉ta꞉ haya꞉me leekeme. 31 Mo halima꞉ alota꞉ Koniliesio. Naka꞉ yeni pu haleeki make naka꞉ mani halo haleeki make Koda꞉ma꞉ hone wita꞉la꞉me. 32 Koto ekina꞉ mo Diopa da pa꞉ta꞉ mo hali Saimono biki ma꞉nda꞉ Pida hali ma꞉nda꞉ma꞉ handa꞉ mulu pena꞉ tapae la alota꞉ Mo halita꞉ ma꞉na꞉ yonkelekema꞉ hako wopu hala꞉ hali Saimonona꞉ da pa꞉ta꞉ hala꞉me lea꞉me. Mo data꞉ dawala ikali tea꞉na꞉ hala꞉me laa lea꞉me. 33 Koto ekina꞉ koto kone neke handa꞉ mulu pimi haliweki tapaowa꞉me leekeme. Kutupa epeke epeme leekeme. Ameta꞉ Tekehalima꞉ neke pa꞉ta꞉ dupa lapeke lea꞉ pimanu paeyao opoluekema꞉ do a꞉pa Koda꞉ pa꞉ta꞉ momba꞉la haloma꞉me leekeme.

34 Kutupa Pidama꞉ alota꞉ Ameta꞉ ota꞉ handolome. Koda꞉ma꞉ wanda꞉hali paeyao pa꞉ta꞉ hone ta꞉ta꞉ ta꞉ta꞉ na wiki homeke hone wita꞉la꞉eki handolome leekeme. 35 Kenke paeyaona꞉ hala꞉ hali epima꞉ Koda꞉ pa꞉ta꞉ paala꞉ma꞉ homolo hata꞉ ipika꞉ epeke hau pu haya꞉ka꞉na꞉ta꞉ Koda꞉ma꞉ koto hali milieke leekeme. 36 Ikana꞉ma꞉ do ekita꞉ amba꞉ ta handeleme handa꞉e. Koda꞉ma꞉ mo Isulai wanda꞉hali pa꞉ta꞉ pi tapaeyekeeki loa꞉me. Ipikana꞉ma꞉ mo a꞉nda꞉ peliaasa꞉ Pi Seliapota꞉ Yesu Ketiso pa꞉ta꞉ yama꞉ walena꞉ leekeme. Yesuta꞉ wanda꞉hali make ala꞉ta꞉ ala꞉ta꞉ make paeyaona꞉ Tekehalie. 37 Kutupa mo hande Diudia nane paeyao pa꞉ta꞉ ame do numaneke pimiki ekita꞉ I̱ma꞉ iki pa꞉ta꞉ na lolueke. Ikana꞉ma꞉ amba꞉ opimika꞉ta꞉me. Dionima꞉ bapitaisi hau peaeyeke nane wetepena꞉ mo Ka꞉lili nane kini pu miekeme. 38 Hande Na꞉sa꞉tete da halita꞉ Yesue. Ipikita꞉ Koda꞉ma꞉ wele peaaso hata꞉ mo Holi Sipitidima꞉ make suta꞉pe wiaeyekeeki opimika꞉ta꞉me. Kutupa ipikana꞉ma꞉ Koda꞉ ame̱le̱ hata꞉ epeke hau pea꞉tiki pu hao Sadanima꞉ hoeyaeyeke wanda꞉hali mea tiatiki pu hao pomu hayekeme. 39 Kutupa mo Diu wanda꞉halina꞉ kenke nane make mo Diutuseleme da pa꞉ta꞉ make ipikana꞉ma꞉ pia꞉ ekimanu paeyaota꞉ nikana꞉ma꞉ wekitisi haloma꞉me. Kutupa koto hoki naneta꞉ mo haliwekima꞉ ipiki meata꞉ tina꞉ tamendiao homena꞉ lememe. 40 Kutu pimipate hoto tepona꞉ wina꞉ laata꞉ Koda꞉ma꞉ paa mea tiaota꞉ peneme yao walea꞉me. 41 Wanda꞉hali paeyaoma꞉ handena꞉ na leke pa Koda꞉ma꞉ amba꞉la talopu mieke wanda꞉halima꞉ homeke handena꞉ lea꞉me. Nikita꞉ ipika꞉ la haloloma꞉ haliweki haloma꞉me. Ipika꞉ homa paa tiao a꞉paata꞉ nikana꞉ma꞉ ipiki ame̱le̱ ne noma꞉me. 42 Kutupa ipikana꞉ma꞉ niki pa꞉ta꞉ mana꞉ alo hata꞉ alota꞉ dupae. Wanda꞉hali pa꞉ta꞉ pi walemeka꞉na꞉ta꞉ Koda꞉ma꞉ I̱ta꞉ homa꞉la꞉ wanda꞉hali make pa haleme wanda꞉hali make ika꞉ pi yokaalu peaalo polo hali mea hano lea꞉me lapa꞉peke lea꞉me. 43 Mo hande potopede haliweki paeyaoma꞉ ipiki pa꞉ta꞉ lemeke ekita꞉ dupae. Hali epima꞉ ipika꞉ pi miniki haya꞉ka꞉na꞉ta꞉ kota꞉ ipika꞉ bikina꞉ mo hoke hau piekeeki pa tombuaasa꞉eki milieke lemekeme leekeme.

44 Pidama꞉ koto pimanu alo haena꞉ kone mo Holi Sipitidima꞉ koto opimiki wanda꞉hali paeyao pa꞉ta꞉ hola꞉pa꞉niaeyekeme. 45 Hande Pida ame̱le̱ a꞉pa haemeke Ketiso haliwekima꞉ Diu haliweki kone leke opa wotu handaake wimikime. Koda꞉ma꞉ mo Diendaili wanda꞉hali pa꞉ta꞉ kone mo Holi Sipitidi haleeke handa pimikime. 46 Mo wanda꞉halima꞉ da ma꞉nda꞉ ma꞉nda꞉na꞉ pi kone pa laaka꞉na꞉ Koda꞉na꞉ pi laemekeme. Kutupa Pidama꞉ alota꞉ 47 Hali epima꞉ do wanda꞉hali pa꞉ta꞉ ikalima꞉ bapitaisi hau na pina꞉ lapeke ya꞉la꞉pe. Nika꞉ kone Holi Sipitidi muma꞉ tupa꞉ ta mimi handa꞉pe leekeme. 48 Kutupa Pidama꞉ koto wanda꞉hali Yesu Ketisona꞉ bikina꞉ bapitaisi peaapa꞉pekee leekeme. Kutupa ikana꞉ma꞉ Pida pa꞉ta꞉ nate mandaneeki do pa꞉ta꞉ hamana꞉e laa honke lemekeme.