3
Kota꞉ Diu wanda꞉halima꞉ta꞉ Diendaili wanda꞉hali ankulao halemepe. Sekemesaisi hau peaala꞉ ekima꞉ta꞉ epekeeki ma꞉nda꞉ handa꞉ wilimikipe. A꞉pa꞉e. Iki pa꞉ta꞉ epekeeki wotu ula꞉me. Titina꞉ dupa Koda꞉ma꞉ta꞉ mo Diu wanda꞉halima꞉ ipika꞉ pimanu miniki hata꞉ handeteke haena꞉yeke iki pa꞉ta꞉ haleekeme. Koto hau pina꞉ kone mandane wanda꞉halima꞉ pi na opiki kiao haemekepate mo wanda꞉halima꞉ pimiki ekina꞉ ika꞉ honema꞉ta꞉ Koda꞉ma꞉ make ipika꞉ pi tunkula halieke hone witelemepe. Ota꞉ dia꞉me. Wanda꞉hali paeyaoma꞉ yayapiki pi alo hamina꞉ kone Koda꞉ma꞉ta꞉ ota꞉ pi homeke lo halieke. Hande Baibolo bukana꞉ wape pa꞉la꞉ tupa꞉
Nakana꞉ma꞉ ale pita꞉ paeyaoma꞉ opuaata꞉ ota꞉ tikitiki piki pi aleme laa hone wilimikie.
Neke pa꞉ta꞉ pi yokaalu pitiki pimika꞉na꞉ta꞉ hoto paeyao wini pea꞉tiki pilipikie wape pa꞉la꞉me.
 
Koto pa꞉la꞉pate mandane haliwekima꞉ alota꞉ Hoke hau puma꞉ka꞉na꞉ta꞉ wanda꞉halima꞉ Koda꞉ma꞉ tikitiki hau pita꞉la꞉eki wotu handilimikie alemepate koto aleme pi hombo peaasota꞉ eki lomana꞉pe. Mo kenke haliwekima꞉ lo haleme tupa꞉ Koda꞉ma꞉ niki panisi kia꞉ka꞉na꞉ta꞉ hokeeki pitolo pita꞉la꞉me laa lomana꞉pe. A꞉pa꞉e. Ota꞉ dia꞉me. Koda꞉ma꞉ta꞉ tikitiki hau na pu haya꞉ka꞉na꞉ta꞉ kota꞉ wanda꞉hali pa꞉ta꞉ ekipa pi yokaalu piliepe.
Koto pa꞉la꞉pate hali ma꞉nda꞉ma꞉ alota꞉ Yaka hoke hau pu halo ekima꞉ Koda꞉ma꞉ tikitiki hau pu hala꞉eki wopu walolo hata꞉ Koda꞉na꞉ biki make mea a꞉meiyaasa꞉ma꞉ ekina꞉ kota꞉ Koda꞉ma꞉ I̱ pa꞉ta꞉ alota꞉ Neketa꞉ hoke hau pu hale ekina꞉ hoke yenki kulueke pita꞉ ekipeke leliepe ala꞉me. Koto ekina꞉ mandane wanda꞉halima꞉ alota꞉ Epekeeki epena꞉ma꞉ kota꞉ hokeeki pumana꞉e laa alememe. Mandane wanda꞉halima꞉ I̱ la la pitolo hata꞉ kone alota꞉ Poloma꞉ kutupiki pi ombu la꞉tiki pu hala꞉me laa lelememe. Koto pi leleme wanda꞉halita꞉ Koda꞉ma꞉ hoke yenki halea꞉ka꞉na꞉ta꞉ tikitiki hau pitolo hata꞉ kone pilieke.
Hali homeke a꞉nda꞉ Koda꞉ pa꞉ta꞉ tikitikina꞉ na hala꞉eki
Kota꞉ niki Diu wanda꞉halima꞉ mo Diendaili wanda꞉hali ankulao haloma꞉pe. Dia꞉me. I̱ma꞉ta꞉ iki pa꞉ta꞉ amba꞉ ta waloa꞉ handa꞉e. Diu wanda꞉hali make Diendaili wanda꞉hali make hoke hau manuma꞉ wele pita꞉la꞉ ekima꞉ mandake tupa꞉ niki paeyao tombuao ula꞉me. 10 Mo Baibolo bukana꞉ wape pa꞉la꞉ tupa꞉
Ma꞉nda꞉ hali a꞉nda꞉ Koda꞉ pa꞉ta꞉ tikitikina꞉ na hala꞉me.
11 Ma꞉nda꞉ hali a꞉nda꞉ma꞉ tikitiki pikieki na handa꞉la꞉me.
Ma꞉nda꞉ hali a꞉nda꞉ma꞉ Koda꞉ homeke na weiyu hala꞉me.
12 Haliweki paeyaoma꞉ta꞉ Koda꞉ hoki nane yao halememe.
Paeya ta꞉pao hao hoeyaalememe.
Ma꞉nda꞉ hali a꞉nda꞉ homekema꞉ kone epeke hau na pu hala꞉me.
13 Kutupa ika꞉ kake ka꞉ka꞉na꞉ manuta꞉ hali hoila꞉ naku ka꞉ka꞉na꞉ lumba꞉pa wiki nono pelememe.
Ika꞉ kekekemanu pa꞉ta꞉ hoke hoke yayapiki pimanu ipu hala꞉me.
Ika꞉ hambiliki manuma꞉ta꞉ hali lita꞉la꞉ keto kakema꞉ handeke pimanu lo halememe.
14 Ika꞉ kake manuta꞉ hali tetoma꞉ homaasa꞉ma꞉ pi manuma꞉ tumba halememe.
15 Wanda꞉hali tanda tanda peao luekema꞉ a̱i̱ a̱i̱ pu halememe.
16 Mandane mandane puaata꞉ ala꞉ta꞉ ala꞉ta꞉ hoeyaota꞉ wanda꞉hali make ka꞉nda꞉ma꞉ homao halememe.
17 A꞉nda꞉ peli alualu pea haluekema꞉ koto hauta꞉ hone na u halememe.
18 Koda꞉ pa꞉ta꞉ make pututuma꞉ homolo hata꞉ ika꞉ kone lu mina꞉niao homu pea halememe laa wape pa꞉la꞉me.
 
19 Mo hande Lo Pimanu opua oto pa꞉ta꞉ haleme wanda꞉halita꞉ mo Lo Pimanu iki pa꞉ta꞉ ula꞉ ekita꞉ handoloma꞉me. Koto Lo Pi manuma꞉ hambiliki honiolo aleme pimanu sa꞉sa꞉ peaata꞉ Koda꞉ma꞉ kenke wanda꞉hali paeyao pi yokaalu pulu pa꞉la꞉ ekita꞉ wala꞉la꞉me. 20 Do ekina꞉ yeke loa꞉me. Ma꞉nda꞉ hali a꞉nda꞉ma꞉ hande Lo Pimanu opua pa꞉la꞉ ekina꞉ Koda꞉ pa꞉ta꞉ tikitiki yao hapeke na ya꞉la꞉me. Mo hande Lo Pi manuma꞉ pita꞉la꞉ ekita꞉ wanda꞉halima꞉ ika꞉ hoke hau pelemeeki hone wina꞉ pita꞉la꞉me.
Koda꞉ma꞉ wanda꞉hali ipiki pa꞉ta꞉ tikitiki yao haena꞉ la꞉la꞉eki
21 Kutu pita꞉la꞉pate Koda꞉ma꞉ta꞉ wanda꞉hali ipiki pa꞉ta꞉ tikitiki yao haena꞉ la꞉la꞉ ekita꞉ peneme yao ula꞉me. Hande Lo Pi manuma꞉ peaasa꞉eki dia꞉ ya꞉la꞉pate hande Lo Pi manuma꞉ make mo hande potopede haliwekima꞉ make amba꞉ la ka꞉la꞉me. 22 Wanda꞉halima꞉ Yesu Ketiso pa꞉ta꞉ hone tulaaseme ekima꞉ Koda꞉ma꞉ ikita꞉ ipiki pa꞉ta꞉ tikitiki yao hamina꞉ lo hala꞉me. Ketiso pa꞉ta꞉ hone tulaaseme wanda꞉hali paeya ta꞉pao pa꞉ta꞉ Koda꞉ma꞉ koto hau pu hala꞉me. Diu wanda꞉hali make Diendaili wanda꞉hali make ta꞉ta꞉ pea na haleme ekina꞉ loa꞉me. 23 Wanda꞉hali paeya ta꞉paoma꞉ hoke hau pea hata꞉ta꞉ hande da꞉tao hala꞉ Koda꞉ teke pa꞉ta꞉ na haloma꞉pate 24 ipikana꞉ma꞉ ipika꞉ pa a꞉ta꞉ma꞉ homolo hata꞉ kieke ekima꞉ nikita꞉ ipiki yaapo tikitiki yao hamono la꞉la꞉me. Koda꞉ma꞉ koto pa꞉la꞉ ekita꞉ Yesu Ketisoma꞉ niki ka꞉la꞉pa꞉ tapaala꞉ ekima꞉ pina꞉ la꞉la꞉me. 25 Koda꞉ma꞉ta꞉ Yesu Ketiso mea haena꞉ laata꞉ ipiki homolo hata꞉ ipika꞉ we lopolo piekeme. Lopeeke ekima꞉ ipiki pa꞉ta꞉ hone tulaalo peleme wanda꞉halina꞉ hoke hau pelemeeki manuta꞉ pa paeyaena꞉ leekeme. Koda꞉ma꞉ koto pa꞉la꞉ ekita꞉ ipika꞉ tikitiki hau pita꞉la꞉eki peneme yao waluekema꞉ piekeme. Amba꞉ta꞉ Koda꞉ma꞉ wanda꞉halina꞉ hoke hau peleme ekimanu leke honikima꞉ hando ankulao handeteke hao hayekepate 26 ameta꞉ ipika꞉ tikitiki hau pita꞉la꞉eki peneme yao waluekema꞉ wanda꞉halina꞉ hoke hau pelemeeki manuna꞉ hau ma꞉nda꞉ pu hala꞉me. Koda꞉ma꞉ kutu pita꞉la꞉ ekima꞉ ipikana꞉ma꞉ kone tikitiki hau pu hala꞉eki Yesu Ketiso pa꞉ta꞉ hone tulaaseme wanda꞉hali ipiki yaapo tikitiki yao hamena꞉ la꞉la꞉eki make wala꞉la꞉me.
27 Koto hali ma꞉nda꞉ epima꞉ eki hau pita꞉la꞉ ekina꞉ ipika꞉ hakoko lia꞉peke ya꞉la꞉pe. Dia꞉me. Hakoko lia꞉peke na ya꞉la꞉me. Ekipekepe. Ipikana꞉ma꞉ mo hande Lo Pimanu opua pita꞉la꞉ ekina꞉ Koda꞉ma꞉ ipiki yaapo tikitiki yao na haena꞉ leliepe. Dia꞉me. Ota꞉ hakoko lia꞉peke na ya꞉la꞉me. Ipikana꞉ma꞉ hande Lo Pimanu opua pita꞉la꞉ ekina꞉ Koda꞉ma꞉ ipiki yaapo tikitiki yao na haena꞉ leliepate mo halima꞉ hone tulaasa꞉ ekina꞉ haena꞉ lelieke. 28 Nika꞉ handa꞉ witoloma꞉ pita꞉ dupa. Hali ma꞉nda꞉ma꞉ ipika꞉ hone tulaasa꞉ ekima꞉ homeketa꞉ Koda꞉ma꞉ ipiki yaapo tikitiki yao haena꞉ lelieke. Koto halima꞉ hande Lo Pimanu opua pita꞉la꞉ ekima꞉ na haena꞉ lelieke. 29 Pate Koda꞉ta꞉ Diu wanda꞉halina꞉ Koda꞉ homeke hala꞉pe. O Diendaili wanda꞉halina꞉ Koda꞉ make hala꞉pe. Aowe ika꞉ Koda꞉ make hala꞉me. 30 Koda꞉ta꞉ homeke hata꞉ta꞉ mo Diu wanda꞉halima꞉ ika꞉ hone tulaaseme ekina꞉ make mo Diendaili wanda꞉halima꞉ ika꞉ hone tulaaseme ekina꞉ make ipiki yaapo tikitiki yao haena꞉ lelieke. 31 Koto pa꞉la꞉ ekina꞉ mo hande hone tulaasa꞉ ekima꞉ hande Lo Pimanu paeyaasoma꞉pe. Ota꞉ dia꞉me. Hande Lo Pimanu nikana꞉ma꞉ mea a꞉meiyaasoma꞉me.