1 Lom 5.2, Gal 1.11 Pen mam ay sɨkop, takaw teplep nɨbop agñɨnek ak, nɨbop agñɨtep gɨnɨgebin. Takaw teplep anɨb ak nɨbi nɨg dɨl, kɨles gɨl jak mɨdebɨm. 2 Gal 3.4 Takaw anɨb ak nɨbop agñɨnek ak, nɨŋɨd dɨ wos yɨbɨl genɨmɨb, God nɨbop tɨg asɨk deb. Pen mel ak, Klays nop gos lɨnepɨm ak yokɨp yɨbɨl mɨdeb, binɨb ne ma mɨdebɨkep.

3 Sng 22.15, Ais 53.5-12, Dan 9.26, Sek 13.7, 1 Ko 11.2, 11.23, Gal 1.12 Takaw awl yɨbɨl yad nɨgɨnek ak, nɨbop agñɨnek. Pen takaw anɨb ak anɨgɨl mɨdeb. Chɨn tap si tap tɨmel gɨpun tek, Klays chɨnop nen agɨl kumak, buk Baybol tɨkɨl gɨnɨgab agɨlak tek nep gak. 4 Sng 16.8-10, Mat 12.40, Luk 24.26, 24.46, Apo 2.24-32, 13.33-35 Kumek kamel, ñɨn omɨŋal nokom mɨdɨl, tepayaŋ tɨkjakak, buk Baybol tɨkɨl gɨnɨgab agɨlak tek nep gak. 5 Mat 28.16-17, Mak 16.14, Luk 24.34-36, Jon 20.19 Tɨkjakɨl mɨseŋ gek, Pita nop nɨgak. Nɨgek, kɨdek mɨseŋ gek, bɨ Jisas takaw nop dad ameb anep umɨgan okok nop nɨgɨlak. 6 Kɨdek pen tepayaŋ mɨseŋ gek, bɨne anep 500 tek nop nɨgɨlak. Bɨne anɨb okok, ogɨnap kumɨlak ak pen, kuŋay nep ogɨnap mɨdebal. 7 Luk 24.50, Apo 1.3-4 Kɨdek ñɨn olap mɨseŋ gek, Jemis nop nɨgak. Ñɨn olap pen, bɨ Jisas takaw nop dad ameb okok mɨdupsek nop nɨgɨlak.

8 Apo 9.3-6, 22.14, 22.18, 1 Ko 9.1 Pen bɨ anɨb okok nop nɨgɨlak ñɨn ak apɨl padɨkek, kɨdek mɨseŋ gek yad abe nop nɨgɨnek. Ak tek ak yad ñapay tɨk tep ma gɨpal tek olap yenek yɨp kɨdek dak. 9 Apo 8.3, 9.1, Gal 1.13, Epe 3.8, 1 Ti 1.13-15 Bɨ Jisas takaw nop dad ameb nab okok, yad bɨ tam nɨb okok tek mɨdebin. Yad God binɨb ne pelpel apnan gɨpal okok, kɨlop gɨ tɨmel yɨbɨl gelɨgɨpin. Anɨb ak bɨ Jisas takaw nop dad ameb olap yenɨm tek ma lup. 10 Apo 8.3, Lom 15.18-19, 2 Ko 3.5, 6.1, 11.5, 11.23, Plp 2.13 God pen yɨp yɨmug nɨŋɨd gɨtep gek, bɨne mɨdɨl, bɨ ak ke nɨb tek mɨdebin. Pen God yɨp yɨmug nɨŋɨd gɨtep gup ak, yokɨp mɨdɨl kul ma gup. Bɨ Jisas takaw nop dad ameb okok wog gɨpal tek ma gɨpin, God yɨp yɨmug nɨŋɨd gɨtep gek, wog awl yɨbɨl ak gɨpin. 11 Anɨb ak takaw apun ak, yad agñɨbin akaŋ bɨ Jisas takaw nop dad ameb ogɨnap agñɨl nɨm, chɨn mɨdupsek Jisas kumɨl tepayaŋ tɨkjakak takaw teplep ak agñɨbun. Agñon amek, nɨbi nɨŋɨd Klays nop gos lɨnepɨm.

12 Pen Klays kumɨl tepayaŋ tɨkjakak agɨl takaw pel agñɨbun ak, nɨbi ogɨnap tɨtay dɨl apɨm, Binɨb okok kumɨl tepayaŋ ma tɨkjakɨpal apɨm? 13 Binɨb kumɨl ma tɨkjakɨpɨlap ak, Klays ma tɨkjakɨpɨkop. 14 Pen Klays ma tɨkjakɨpɨkop ak, takaw agñɨbun ak takaw tek ma lek, Klays nop gos lɨnepek ak, nop gos ma nepɨkep. 15 Apo 1.22, 2.24-32, 4.10, 4.33, 5.32, 13.30 Klays ma tɨkjakɨpɨkop, chɨn God tap gak ak yepɨs yɨbɨl agɨl, bɨ yepɨs agep tek yobɨnop. Chɨn takaw mɨseŋ agñɨbun, God gek Klays tɨkjakak agñɨbun. God pen gek binɨb kumɨl ma tɨkjakep tek lopɨkop, Klays nop gek ma tɨkjakɨpɨkop. 16 Nɨŋɨd apun, binɨb kumɨl ma tɨkjakɨpɨlap ak, Klays ma tɨkjakɨpɨkop. 17 Pen Klays ma tɨkjakɨpɨkop, Klays nop gos lɨnepɨm ak tap yokɨp, binɨb ne mɨdebɨm tek ma yebɨkep. Binɨb tap si tap tɨmel gɨl pɨsnep kubal tek ak yebɨkep. 18 Pen binɨb Klays nop chɨgɨl kumɨlak okok abe, am pɨsnep kul gɨpɨlap. 19 Chɨn Klays nop chɨgɨl nɨm, chɨnop dɨtep yɨbɨl gɨnɨgab agɨl gos sek kod mɨdobun. Pen lum awl nep mɨdon chɨnop dɨtep yɨbɨl gɨpɨkop, binɨb yɨmgeptek okok yobɨnop. Binɨb yɨmgeptek ogɨnap mɨdel, binɨb okok kɨlop nɨŋɨd yɨmug nepɨlap ak pen, chɨn yɨmgeptek awl yɨbɨl mɨdon, binɨb okok chɨnop nɨŋɨd yɨmug awl yɨbɨl nepɨlap.

20 Apo 26.23, 1 Ko 15.23, Kol 1.18, 1 Pi 1.3, Lep 1.5 Pen anɨgɨl ma mɨdeb, mel yɨbɨl. Klays kumek God gek tepayaŋ tɨkjakak. Binɨb kubal okok, ne ned tɨkjakak, tap mɨdup wog nab kɨdeyɨl ned jakup tek. Anɨb ak tek, God gek binɨb kubal okok tepayaŋ tɨkjakɨnɨgabal ak, nɨgtep gɨpun. 21 Jon 11.25, Lom 5.12, 5.17-18, 6.23 Nɨgɨm. Bɨ olap gek binɨb kumeb tek lup tek, bɨ olap abe gek binɨb kumɨl tɨkjakep tek lup. 22 Takaw agebin anɨb ak, binɨb Adam jɨj ne ak mɨdebal okok, mɨdupsek ne kumak tek kubal. Anɨb ak tek nep binɨb Klays jɨmñɨl chɨg tep gebal okok, kɨlop mɨdupsek gek tɨkjakɨl kɨm yenɨgabal agɨl agebin. 23 1 Te 4.15-17, Lep 20.5 Pen kɨli nokom nokom ñɨn kɨli ak ke tɨkjakɨnɨgabal. Klays ne bɨ ned tɨkjakak ak. Pen kɨdek adɨkɨd ownɨgab ñɨn ak, binɨb nop yɨl yenɨgabal okok gek, mɨdupsek tɨkjakɨnɨgabal. 24 Tɨkjakel, kɨdek lum awl kul gɨnɨgab ñɨn ak ownɨgab. Ñɨn anɨb ak Klays ne kɨcheki binɨb okok kɨlop kod mɨdebal okok sek, kɨcheki kɨles mɨdebal okok sek, kɨcheki lum awl kod mɨdebal okok sek, kɨlop mɨdupsek tɨg jɨsɨpuk gɨ dɨyokɨnɨgab. Anɨgɨnɨgab ak nɨm, ne binɨb tap tɨtay kod yenɨgab okok mɨdupsek, Bapi God nop agek kod yenɨgab. 25 Sng 110.1, Mat 22.44, Apo 2.34-35, Hib 1.13 Chɨn nopun, Klays ne bɨnonɨm mɨdɨl binɨb tap okok kod mɨdɨl, mɨd dad amɨl, God ne Klays binɨb tap okok ayɨp penpen gep okok mɨdupsek kɨlop tob muk ne okok lek, taw tɨbɨkɨnɨmuŋ. 26 2 Ti 1.10, Lep 20.14, 21.4 Pen tap tɨmel anɨb okok mɨdupsek tɨg jɨsɨpuk gɨ dɨyokɨl, kɨdek kumeb ak abe tɨg jɨsɨpuk gɨ dɨyokɨnɨgab. 27 Sng 8.6, Mat 28.18, Hib 2.8, 1 Pi 3.22 Buk Baybol ak tɨkɨl agak, God binɨb tap okok mɨdupsek kɨlop tob muk ne okok lek, taw tɨbɨkɨnɨmuŋ agɨl tɨkak. Pen God ne binɨb tap okok mɨdupsek kɨlop Klays tob muk ne okok lup takaw agɨl tɨkak anɨb ak, chɨn nɨŋɨd anɨgɨl nopun, God ne Klays nop tob muk okok yeŋ agɨl ma tɨkak. God pen ne ke nokom tap anɨb okok mɨdupsek Klays nop tob muk okok lup. 28 Pen God ne binɨb tap okok mɨdupsek kɨlop Klays tob muk okok lɨnɨmuŋ ñɨn ak, Klays God Ñɨne nep mɨdeb ak, ne yad God tob muk okok lɨnɨm agɨl, anɨgɨnɨgab. God gek tap okok Klays muk okok mɨdɨl, Klays ne am God muk okok mɨdɨl anɨgɨnɨgab ak nɨm, God ne ke nokom binɨb tap okok mɨdupsek adek yɨbɨl ak kod yenɨgab.

29 Pen anɨb ak nɨgɨm. Binɨb ogɨnap kɨli binɨb kubal okok kɨlop gɨñɨnɨgun agɨl, ñɨg pakɨpal. Taynen anɨgɨpal? Anɨgenɨgabal, tɨtay dɨl binɨb kubal okok kɨlop gɨñɨnɨgabal? Nɨbi ogɨnap apɨm, Binɨb kubal okok ma tɨkjakɨnɨgabal apɨm. Ak nɨm, binɨb kumɨl tɨkjakɨnɨgel tek ma yɨbɨl lenɨgab, binɨb ogɨnap taynen binɨb kubal okok kɨlop gɨñɨnɨgun agɨl, ñɨg pakɨpal? 30 Lom 8.36, 2 Ko 11.26, Gal 5.11 Pen chɨn abe tay dɨnɨgun? Chɨn kumɨl tɨkjakep takaw ak pel aj agñon, bɨ ogɨnap nɨŋɨd, chɨnop pel gɨ tɨmel gɨnɨg gɨpal. Binɨb pen kumɨl tɨkjakɨnɨgel tek ma lenɨgab, taynen anɨgɨpun? 31 Lom 8.36, 2 Ko 4.10-11, 1 Te 2.19 Mam ay sɨkop, mɨnek mɨnek yɨp gɨ tɨmel gɨnɨg gel, yad kumnɨm tek lup. Yad nɨb ayɨp Bɨawl chɨn Klays Jisas mɨdobun, anɨb ak tek nɨbi anɨgɨl mɨdem nɨgen yɨp tep gek, takaw anɨb ak nɨbop mɨseŋ apin. 32 Sav 2.24, Ais 22.13, Luk 12.19-20, 2 Ko 1.8, 4.10-11 Yad taun Epesus mɨdɨl, bɨ ogɨnap chen ladek tek yɨp gɨ tɨmel yɨbɨl gɨl, ayɨp penpen gɨnok. Lum awl gos ak nɨŋɨd tap ogɨnap dɨnɨm agɨl anɨgɨnek akaŋ? Mel yɨbɨl. Binɨb tepayaŋ tɨkjakɨnɨgabal agɨl anɨgɨnek. Binɨb pen tepayaŋ tɨkjakɨnɨgel tek ma lenɨgab, takaw olap apal, Tol pɨsnep kumnɨgabun, anɨb ak mɨñɨl mɨdobun ñɨn awl, tap ñɨbɨlɨg ñɨg ñɨbɨlɨg gɨ yonɨgun apal ak, chɨn nɨŋɨd kɨdek gɨnɨgun.

33 Binɨb nɨbop yepɨs agɨnɨgel ak, ma yɨbɨl nɨgɨnɨmɨb. Takaw anɨb ak nepɨm, Binɨb pel gɨtep gɨpal okok, kɨli binɨb pel gɨ tɨmel gɨpal okok ayɨp jɨmñɨl mɨdɨl, tap tɨmel adek anɨb ak nep gɨnɨgabal. 34 Apo 26.8, Lom 13.11, 1 Ko 6.5, Epe 5.14, 1 Te 4.5 Gos ke nɨŋɨd sawl lɨpɨm ak kelɨgɨl, yɨpɨd gɨl yɨbɨl gos nɨgɨnɨmɨb. Pen tap si tap tɨmel gɨpɨm ak kelɨgɨl, anɨb okok ma gɨnɨmɨb. Nɨgɨm, nɨbi ogɨnap God nop gos ma nepɨm. Nɨbi nɨgem nebeŋ gɨnɨmɨb tek lɨnɨgab agɨl, nɨbop takaw anɨb ak agebin.

35 Jon 12.24, 1 Jo 3.2 Pen binɨb ogɨnap agnɨŋɨd agɨnɨgabal, Binɨb kubal okok taydɨl tek tɨkjakɨnɨgabal agɨnɨgabal? Mubwak kɨli ak tay tek yenɨgabal agɨnɨgabal? 36 Jon 12.24 Nɨbi binɨb sawl sek yɨbɨl okok. Tap yɨŋ mɨdup lum ayaŋ yɨmnɨgabɨm ak, ned kumɨl kuyɨlɨg yapɨl, kɨdek nep jakɨnɨgab. 37 Pen mɨdup ak, wit mɨdup akaŋ mɨdup olap ke, tap tay mɨdup yɨmnɨgabɨm ak, jak awl gup tek ma yɨmnɨgabɨm. Mɨdup sɨkol okok nep yɨmem jakɨnɨgab. 38 Stt 1.11 Pen God gos ne ke nɨŋɨd, tap yɨŋ mɨdup okok wak sek yɨpɨl sek ñub. Mɨdup keke wak sek yɨpɨl sek kɨli ak keke ñub. 39 Binɨb, sab chag tap okok abe mubwak keke mɨdeb. Binɨb okok mubwak ke lup, sab chag okok mubwak ke lup, yawl okok mubwak ke lup, kubsal okok mubwak ke lup. 40 Tap adekab alaŋ yɨl okok, kɨlop keke lup. Tap lum awl yɨl okok, kɨlop keke lup. Tap adekab alaŋ yɨl tap teplep anɨb okok nop ke lup. Tap lum awl yɨl tap teplep anɨb okok nop ke lup. 41 Sub mɨlek tep ak ke mɨdɨl, takan mɨlek tep ak ke mɨdɨl, gap mɨlek tep ak ke mɨdeb. Pen gap okok abe, mɨlek tep ak keke mɨdeb.

42 Dan 12.3, Mat 13.43 Binɨb kumɨl tɨkjakɨpal nɨm, anɨb ak tek mɨdeb. Kumel kaw dɨnɨgabal wak ak, tɨmel gɨl pɨsnep kul gep ak pen, tepayaŋ tɨkjakɨnɨgabal wak ak, pɨsnep kul gep tek ma yɨbɨl lɨnɨgab. 43 Plp 3.20-21 Kumel kaw dɨnɨgabal wak ak, tɨmel gɨl yokɨp tek mɨdep ak pen, tepayaŋ tɨkjakɨnɨgabal wak ak, teplep yɨbɨl yenɨgab. Kumel kaw dɨnɨgabal wak ak, kɨles ma mɨdep ak pen, tepayaŋ tɨkjakɨnɨgabal wak ak, kɨles tɨmel yɨbɨl yenɨgab. 44 Kumel kaw dɨnɨgabal wak ak, lum awl nɨb owup ak pen, tepayaŋ tɨkjakɨnɨgabal wak ak, God Kawnan ne ak gek yenɨgab.

Wak lum awl nɨb owep ak mɨdeb, anɨb ak tek chɨn nopun, God Kawnan ne ak gek wak ak abe yenɨgab. 45 Stt 2.7, Jon 6.33, 6.39-40, 6.54, 6.63, 2 Ko 3.4-6, 3.17, Plp 3.21 Buk Baybol abe tɨkɨl anɨb agak, Bɨ ned nɨb Adam ak, God ne nop gek koŋɨm yek agɨl tɨkak. Pen Adam kɨdek ak,*Bɨ Adam kɨdek ak, nɨm Klays nep. 1 Kolin 15.21-22 ayɨp, Lom 5.14-19 ayɨp nɨgɨnɨmɨn. ne ke kawnan ak nɨm, binɨb gek koŋɨm mɨdɨl pelpel mɨdebal. 46 Tap God Kawnan ne nɨb ak ned ma owup. Mel. Tap lum awl nɨb ak ned apɨl, tap God Kawnan ne nɨb ak kɨdek apɨl gup. 47 Stt 2.7, 3.19, Jon 3.13, 3.31 Bɨ Adam ned nɨb ak lum awl nɨb, God lum dɨl nop gɨlak. Bɨ Adam kɨdeyɨl ak, ne God man ne alaŋ nɨb owak. 48 Binɨb lum awl yɨl ak, bɨ lum awl nɨb tek ak mɨdebal. Pen binɨb God man ne alaŋ yɨl ak, bɨ God man ne alaŋ nɨb tek ak mɨdebal. 49 Lom 8.29, 2 Ko 3.18, Plp 3.21, 1 Jo 3.2 Mɨñɨl mɨdobun ak, bɨ lum awl nɨb yek tek mɨdobun. Anɨb ak tek nep, kɨdek bɨ God man ne alaŋ nɨb mɨdeb tek ak abe yonɨgabun.

50 Mat 16.17, Jon 3.3-5, 1 Ko 6.13 Pen mam ay sɨkop, anɨb ak nɨbop agebin. Binɨb lum awl yɨl ak, kɨli God binɨb dɨl kɨlop kod yenɨgab nab ak, am mɨgan ayaŋ yenɨgel tek ma lup. Binɨb wak ak kumɨl kuyɨlɨg yowep ak abe, pel pelnep yonɨmuŋ tek ma lup. 51 Plp 3.21 Nɨgɨm.1 Te 4.15-17 Yad takaw we gup olap agɨnɨgebin. Chɨn mɨdupsek ma kumnɨgabun ak pen, kumnɨgabun ayɨp koŋɨm yonɨgabun ayɨp, mɨdupsek wak ke kɨdeyɨl yonɨgabun. 52 Sek 9.14, Mat 24.31, 1 Te 4.16 Ñɨn anɨb ak, akɨl kɨdek ak pugɨlɨg, wɨdɨn kasek jukɨl aŋɨlɨl nɨgɨnɨgab tek anɨgɨnɨgab. Akɨl ak pugek, binɨb kumnɨgabun okok tepayaŋ tɨkjakɨl, kul gep tek ma lɨnɨgab. Tɨkjakɨlɨg, binɨb yonɨgabun okok ayɨp, mɨdupsek wak ke kɨdeyɨl yonɨgabun. 53 2 Ko 5.4 Ak anɨgɨl mɨdeb. Binɨb chech nedil tɨg asɨk ke sɨŋak lɨl, chech kɨdeyɨl lɨpal tek, wak chɨn kuyɨg yowep ak tɨg asɨk ke sɨŋak lɨl, wak kul gep tek ma lɨnɨgab ak lɨnɨgun. Pen wak chɨn kumeb ak tɨg asɨk ke sɨŋak lɨl, wak pel pelnep yenɨgab ak lɨnɨgun. 54 Ais 25.8, Hib 2.14-15, Lep 20.14 Wak kuyɨg yowep ak tɨg asɨk ke sɨŋak lɨl, wak kul gep tek ma lɨnɨgab ak lɨnɨgabun. Pen wak kumeb ak tɨg asɨk ke sɨŋak lɨl, wak pel pelnep yenɨgab ak lɨnɨgabun. Anɨgɨnɨgab ñɨn ak, buk Baybol takaw tɨkɨl agɨlak tek gɨnɨgab. Takaw anɨb ak tɨkɨl agɨlak,

58 2 Sto 15.7, 1 Ko 3.8, 2 Pi 3.14, Lep 14.13 Anɨb ak tek mam ay mapen yad okok, jak mɨdɨl kɨles gɨl yenɨmɨb. Nɨb nepɨm, Bɨawl wog ne ak pel gɨpɨm ak, yokɨp kul gɨnɨmuŋ tek ma lup. Anɨb ak mɨnek mɨnek Bɨawl wog ne ak kɨles gɨl gɨnɨmɨb.