26
Jisas nop ñagɨnɨgun agɨl, takaw kɨmɨgel aglɨlak
(Mak 14.1-2, Luk 22.1-2, Jon 11.45-53)
Jisas takaw anɨb ak agjuwɨl, bɨne okok kɨlop agak, Kis 12.1-27, Mat 20.18, Mak 14.1, Luk 22.1, Jon 13.1 Nɨbi nepɨm, ñɨn omɨŋal mɨdɨl, Pasopa ñɨn awl ak mɨñɨl agɨl, apnan gɨl yenɨgabal agak. Pen kɨli anɨgɨl apnan gɨl, Bɨ Olap Ñɨne nop dɨl bɨawl okok kɨlop ñɨl agɨnɨgabal, Nop mab bak alaŋ chɨpɨl pak tɨbɨk lem kumaŋ agɨnɨgabal agak.
Pen bɨ God nop sɨbogep bɨawl okok sek, Juda bɨawl okok sek, kɨli apɨl bɨ God nop sɨbogep bɨawl yɨbɨl Kayapas kal ak nan gɨl, Jisas nop tɨtay dɨl kɨmɨgel chɨchɨk dɨl, ñag lɨnɨgun agɨl, takaw aglɨl gelak. Pen agɨlak, Pasopa ñɨn awl anɨgon, binɨb kuŋay yɨbɨl ap mɨdebal okok penpen gɨnɨgel tek lup agɨlak. Anɨb ak mɨñɨl kelɨgɨl, ñɨn olap nop paklɨnɨgun agɨlak.
Bin olap ne wel kuy tep owep ak dɨl, Jisas kɨmɨg cheg nop ak sogak
(Mak 14.3-9, Jon 12.1-8)
6-7  Luk 7.37-38 Jisas man sɨkol Betani mɨdɨl, Saymon bɨlel bɨ soy ladek lak ak, kal ne ak am tap ñɨbelak. Ñɨŋɨlaknɨŋ, bin olap wel kuy tep owep, mani awl tawpal ak, botol sek dad apɨl, Jisas nop kɨmɨg cheg ak sogak.
8-9 Sogek, Jisas bɨne okok chɨbol kɨlop ak tɨmel gek agɨlak, Wel anɨb ak dad amɨl mani awl dɨl, binɨb yɨmgeptek okok mani anɨb ak kɨlop ñeb tek ak pen, taynen yokɨp sogup agɨlak?
10 Takaw anɨb ak agelak Jisas nɨŋɨd kɨlop agak, Ne yɨp gɨtep yɨbɨl gup, taynen anɨb agebɨm agak? 11  Lo 15.11, Jon 12.8, 14.19, 17.11 Binɨb yɨmgeptek okok ayɨp pel yenɨgabɨm, pen yad ayɨp pel ma yonɨgabun agak. 12 Binɨb kamnɨg, wel lɨñɨl dam kabal tek ak yɨp lɨñeb agak. 13 Yad nɨbop nɨŋɨd agebin, kɨdek man okok mɨdupsek, takaw yɨp ak agñɨlɨg, bin ak Jisas nop wel lɨñak agɨl nop kesɨm dɨlɨg, gak anɨb ak nɨg nep yenɨgabal agak.
Judas ne Jisas nop mɨmug nɨgak
(Mak 14.10-11, Luk 22.3-6)
14  Jon 11.57 Pen Jisas bɨne anep umɨgan olap Judas Yiskaliyot, ne bɨ God nop sɨbogep bɨawl okok kɨlop nɨgɨnɨg amnak. 15  Sek 11.12, Mat 27.3 Amɨl agak, Jisas nop chen gɨ dad apɨl nɨbop ñenɨgayn, yɨp tap tay ñɨnɨgabɨm agak? Agek nop mani silpa 30 tek ak ñɨlak.* Mani silpa 30 tek anɨb ak, ñɨn pagep tek ma mɨdeb. Pen chɨn nopun, mani awl yɨbɨl mɨdeb. 16 Ñelak, Judas pen tɨtay gɨl kɨlop agen, Jisas nop ap dad amnɨgel agɨl gos ak nɨgak.
Jisas bɨne okok ayɨp Pasopa tap ñɨŋɨlak
(Mak 14.12-21, Luk 22.7-14, 22.21-23, Jon 13.21-30)
17  Kis 12.6, 12.14-20, Mak 14.12, Luk 22.7-9 Pen bilet ma yɨnɨg tanub ñɨbal ñɨn awl anɨb ak owak. Ñɨn ned owak ñɨn ak, bɨne okok Jisas yek ak apɨl agɨlak, Ñɨn Pasopa chag sipsip ñɨluk pak ñɨŋɨnɨgabun ak wulep mɨdeb agɨlak. Anɨb ak chɨn kal akal amɨl, tap ñɨŋɨnɨgabun okok gɨlɨtep gɨnɨgun agɨlak. 18  Mat 21.3 Agelak kɨlop agak, Nɨbi taun awl ak amɨl, bɨ olap nop agɨnɨmɨb, Tisa agup, Ñɨn God ne yɨp aglak ak wulep mɨdeb ak nɨm, bɨyad okok ayɨp Pasopa chag sipsip ñɨluk pak dagɨl ñɨŋɨnɨgabun, kal nad ak agup agɨnɨmɨb agak. 19 Jisas anɨb agek, bɨne okok agak tek nɨŋɨd, amɨl Pasopa chag sipsip ak pakɨl, kal mɨgan anɨb ak dagɨl gɨlɨtep gelak.
20 Dugep won ak bɨne anep umɨgan ak ayɨp besɨgɨl, 21 tap ñɨbɨlɨg agak, Yad nɨbop nɨŋɨd agebin, bɨ nɨbi olap yɨp chen gɨ dad amnɨgab agak. 22 Agek bɨne okok chɨb nɨŋɨd gos kuŋay nɨŋɨd, nokom nokom nop agnɨgɨlɨg agɨlak, Bɨawl, yɨp apan tek agɨlak? 23  Sng 41.9, Luk 22.21, Jon 13.18 Agelak agak, Bɨ yad ayɨp kɨnag nokom ñɨbobul ak, yɨp chen gɨ dad amnɨgab agak. 24  Ais 53, Dan 9.26, Mak 9.12, Jon 17.12 Buk Baybol ak bɨlel agɨl tɨkɨlak tek, Bɨ Olap Ñɨne chen gɨ dad amɨl, paklek kumnɨgab agak. Bɨ anɨb ak pen, ne Bɨ Olap Ñɨne nop chen gɨ dad amnɨgab ak, ne tɨtay dɨnɨgab agak. Nonɨm nop ma tɨkɨpɨkop ak, tep yɨbɨl agak. Pen nop tɨkek, yul awl yɨbɨl ak dɨnɨgab agak. 25 Agek, bɨne Judas nop chen gɨnɨg gak ak agak, Tisa, yɨp apan tek agak? Agek agak, Nɨm apan ak agak.
Jisas bɨne okok kɨlop tap mɨdup sek ñɨg wayn sek ñak
(Mak 14.22-26, Luk 22.15-20, 1 Kolin 11.23-25)
26  Mat 14.19, 1 Ko 10.16 Tap ñɨb mɨdɨlɨg Jisas bilet ak dɨl, God nop tep agɨl, tɨpagɨl bɨne okok kɨlop ñɨlɨg agak, Dɨl ñɨŋɨm agak. Ak mubwak yad agak.
27 Anɨb agɨl, ñɨg wayn kɨnag ak abe dɨl, God nop tep agɨl, kɨlop ñɨlɨg agak, Nɨbi mɨdupsek ñɨŋɨnɨmɨb agak. 28  Kis 24.8, Jer 31.31-34, Sek 9.11, Lom 5.15, 1 Ko 10.16, Hib 9.22 Ñɨg awl nɨm, nɨkɨm yad binɨb kuŋay yɨbɨl kɨlop nen sogɨnɨgab ak nɨbop ñebin agak. Nɨkɨm yad sogɨnɨgab anɨb ak nɨm, God tap si tap tɨmel gɨpal okok tɨg walɨg gɨyokɨnɨgayn agak takaw ak am wos gɨnɨgab agak. 29  Mak 14.25, Luk 22.18, Apo 10.41 Anɨb agɨl agak, Yad nɨbop agebin, mɨñɨl ñɨn awl tɨkɨl ñɨg wayn ma ñɨŋɨnɨgayn agak. Yokɨp yɨbɨl mɨden mɨden, God binɨb dɨl kɨlop kod yenɨgab ñɨn ak ownɨgab agak. Anɨb ñɨn ak, ñɨg wayn koŋɨm ñɨŋɨnɨgayn agak.
30  Luk 22.39, Jon 18.1 Anɨb agɨl, bɨne okok ayɨp kɨmep olap agɨl, man Olip dum amnɨlak.
Jisas Pita nop agak, Nad agɨnɨgaban, Bɨ anɨb ak ma nepin agɨnɨgaban agak
(Mak 14.27-31, Luk 22.31-34, Jon 13.36-38)
31  Sek 13.7, Jon 16.32 Jisas kɨlop agak, Buk Baybol ak tɨkɨl agɨlak,
God agup, Yad bɨ chag sipsip mukep ak nop paklen, chag sipsip okok mɨdupsek pɨlɨk amnɨgabal agup agɨl tɨkɨlak agak.
Agɨlak anɨb ak nɨm, mɨñɨl maynab ayaŋ nɨbi mɨdupsek tap yɨp tɨtay dɨl gɨnɨgab ak nɨŋɨd, gos yɨp ak kelɨgɨl, pɨlɨk amnɨgabɨm agak. 32  Mat 28.7, 28.16, Mak 14.28 Pen yad kumɨl tɨkjakɨl, Galili plopens ned amnɨgayn, nɨbi kɨdek amnɨgabɨm agak. 33 Agek Pita agak, Bɨ mɨdupsek tap nep tɨtay dɨl gɨnɨgab ak nɨŋɨd, nep kelɨgɨnɨgabal tek lup, yad pen mel yɨbɨl, nep ma kelɨgɨnɨgayn agak. 34  Mat 26.69-75 Agek Jisas agak, Yad nep nɨŋɨd agebin, mɨñɨl maynab ayaŋ yawl kakaluk suk ma agɨnɨgab won ak, nad agɨnɨgaban, Bɨ anɨb anop ma nepin agɨnɨgaban agak. Takaw anɨb ak won omɨŋal nokom agɨnɨgaban agak. 35  Mat 26.56 Agek Pita kɨles tɨmel gɨl agak, Yɨp paklɨnɨg paklɨnɨgabal ak pen, Jisas bɨyad mel agɨl ma agɨnɨgayn agak. Jisas bɨne mɨdupsek abe Pita agak tek nep agɨlak.
Jisas ne Nap nop agak
(Mak 14.32-42, Luk 22.39-46)
36 Jisas bɨne okok ayɨp, kɨli man olap yɨb Getsemani apal ak amɨl, kɨlop agak, Nɨbi awl besɨg yenɨmɨb agak. Yad sɨŋadaŋ amɨl, Bapi nop agɨnɨgayn agak. 37 Anɨb agɨl, Pita nop poŋɨd, Sepedi ñɨne kɨlop omɨŋal poŋɨd saŋɨdak. Amɨlɨg, Jisas chɨbol yul awl yɨbɨl nɨŋɨd, 38  Jon 12.27 kɨlop yakam agak, Mɨdupmɨdup yɨp puŋɨl ñeb ak, kumnɨm tek lup agak. Nɨbi awl mɨdɨl, yɨp kod mɨdɨl nɨgtep gɨl yenɨmɨb agak.
39  Mat 6.10, 20.22, Jon 6.38, Hib 5.7-8 Anɨb agɨl, kɨlop anɨb sɨŋak aglɨl, ne yep wulep anɨb sɨŋak amɨl, jel kuyan gɨl, jomulɨk ak dɨ lum ayaŋ lɨl, God nop agnɨŋɨd agak, Bapi, tap yɨp gɨnɨgeb anɨb ak mel agɨl yɨl, mel agɨnɨmɨn agak. Pen yad gos nepin adek ak ma gɨnɨmɨn, gos nad ke nepan tek gɨnɨmɨn agak.
40 Anɨb agɨl adɨkɨd apɨl nɨgak, bɨne okok kɨnelak. Pen Pita nop agak, Won olap taynen yad ayɨp nɨg mɨdɨl ma kɨnebɨm agak? 41  Mat 6.13, Epe 6.18, Hib 2.14, 4.15 Chɨn tap tɨmel ma gɨnɨgun agɨl, God nop agɨlɨg yenɨmɨb agak. Gos nɨbi ak gɨnɨmɨb tek lup ak pen, mubwak anep kɨles ma gup agak.
42 Jisas anɨb agɨl, tepayaŋ amɨl Nap nop agɨl agak, Bapi, tap yɨp gɨnɨgeb ak, kelɨgep tek ma mɨdeb monmon gaŋ, gos nak agak.
43 Anɨb agɨl, tepayaŋ adɨkɨd apɨl nɨgak, wɨsɨn apek pɨsnep kɨn amnɨlak. 44  2 Ko 12.8 Pen ne kɨlop kelɨgɨl adɨkɨd amɨl, Nap nop ned agak tek nep tepayaŋ agnɨgak.
45-46  Jon 12.27, 13.1, 14.31 Agnɨŋɨd, adɨkɨd apɨl, bɨne okok kɨlop agak, Nɨbop kɨles ma gek kɨn mɨdebɨm akaŋ agak? Tɨkjakem amnun agak. Nɨgɨm. Won anɨb ak Bɨ Olap Ñɨne nop chen mɨmug gɨ dad amnɨgeb agak. Bɨ yɨp mɨmug nɨgup ak, bɨ tap si tap tɨmel gɨpal okok yɨp ñɨn adek kɨli ak ñɨnɨg, kɨlop poŋɨd apeb awl agak.
Jisas nop chɨchɨk dɨlak
(Mak 14.43-50, Luk 22.47-53, Jon 18.3-12)
47 Jisas takaw agaknɨŋ, bɨne anep umɨgan ak, kɨli olap Judas ne Jisas yek ak apjakak. Pen bɨ God nop sɨbogep bɨawl okok sek, Juda bɨawl okok sek kɨli agɨlak tek, Judas ne bɨ kuŋay yɨbɨl kɨlop poŋɨd apjakak. Bɨ poŋɨd owak anɨb okok, kɨli baynat ogɨnap, kul ogɨnap dɨl dad sek owlak. 48 Judas kɨlop aglɨl agak, Yad bɨ olap nop am dɨl, kaykol gɨneknɨŋ agɨnɨmɨb, Jisas nɨm ak agɨl, nop chɨchɨk dɨnɨmɨb agak. 49 Agak tek Jisas yek ak apjakɨl agak, Tisa mɨdeban agɨl, nop kaykol gak. 50 Anɨgek Jisas agak, Bogɨlak, gɨnɨgeban anɨb ak kasek gan agak.
Agek, bɨ Judas ayɨp owlak okok kɨli apɨl Jisas nop chɨchɨk dɨlak. 51  Jon 18.26 Pen nop anɨgɨl dɨlaknɨŋ, Jisas bɨne olap baynat ne ak lɨpɨg dɨl, bɨ God nop sɨbogep bɨawl yɨbɨl ak bɨ wog gɨñeb ne olap nop, tɨmud pɨskɨd ak pɨsnep tɨbɨlɨk yokak. 52  Stt 9.6, Lep 13.10 Anɨgek Jisas nop agak, Baynat ak dɨpan okok tep ak lɨge amnaŋ agak. Binɨb baynat dɨl penpen gɨpal okok, adek anɨb ak nep kumnɨgabal agak. 53  2 Kin 6.17, Dan 7.10 Nɨbi gos ma nepɨm akaŋ agak? Yad Bapi suk apɨnep, ne ensel kuŋay yɨbɨl agyokek apɨl, yɨp kod yebɨlap agak. 54  Ais 53.7, Mat 26.56, Mak 14.49 Pen bɨlel buk Baybol ak yɨp tɨkɨl, nop anɨb anɨb gɨnɨgel agɨlak ak nɨm, anɨgɨnɨmuŋ agak. Anɨb ak yad adek olap ke genɨgayn, yɨpɨd ma gɨnɨgab agak.
55  Luk 19.47, 21.37 Pen bɨ nop dɨnɨg owlak anɨb okok kɨlop agak, Yad mɨnek mɨnek amɨl, God agnɨgep kal awl kab wali kus gɨl yek ak, wali mɨgan ak besɨgɨl, binɨb okok kɨlop takaw agñɨbin agak. Agñɨbin ak pen, yɨp dɨ nag ma lɨpɨm agak. Mɨñɨl pen baynat sek, kul sek dad apɨl, bɨ tap si dep tek ak yɨp dɨpɨm agak. 56  Mat 26.31 Pen gɨpɨm anɨb ak, bɨ God gos ñek agñeb okok gɨnɨgab agɨl tɨkɨlak tek nep gɨpɨm agak.
Pen won anɨb ak Jisas bɨne okok mɨdupsek nop kelɨgɨl, pɨlɨk amnɨlak.
Kɨli Jisas nop dad, bɨawl takaw tɨg asɨkep okok wɨdɨn mɨdup sɨŋak dad apɨl agɨlak
(Mak 14.53-65, Luk 22.54-55, 22.63-71, Jon 18.13-14, 18.19-24)
57 Pen bɨ Jisas nop chɨchɨk dɨlak okok, kɨli nop dad, Kayapas ne bɨ God nop sɨbogep bɨawl yɨbɨl kal ak amnɨlak. Won anɨb ak, bɨ kɨli Mosis takaw ñu kɨl tɨkak ak nɨgtep gep okok sek, Juda bɨawl okok sek kɨli apnan gɨ yelak, kal anɨb ak. 58 Pen Pita kɨdek kɨdek amɨl, kal seŋ adek ak amjakɨl, wali mɨgan ayaŋ amɨl, bɨ kal anɨb ak kod mɨdeb okok ayɨp besɨgɨl, tay tek gɨnɨgabal agɨl nɨg yek. 59-60  Lo 19.15, Sng 27.12, Mak 14.55, Apo 6.13 Bɨ God nop sɨbogep bɨawl okok sek, bɨ Juda bɨawl takaw tɨg asɨkep okok mɨdupsek kɨli agɨlak, Chɨn bɨ takaw yepɨs agɨnɨgel ogɨnap kɨlop agnɨgon, kɨli apɨl takaw olap agel, chɨn nɨŋɨd, nɨŋɨd apɨm agɨl, Jisas nop paklɨnɨgun agɨlak. Anɨb agɨlak ak pen, takaw anɨb ak keke amek jɨj nɨŋɨd nop paklɨnɨgel tek olap ma yek. Kɨdek pen bɨ omɨŋal apɨl 61  Mat 27.40, Jon 2.19 agɨlek, Bɨ anɨb awl ne agak, God agnɨgep kal awl ak tɨbɨlɨk yokɨl, ñɨn omɨŋal nokom mɨdɨl, tepayaŋ gɨnɨgayn agak agɨlek. 62 Anɨb agelek, bɨ God nop sɨbogep bɨawl yɨbɨl ak, ne tɨkjakɨl Jisas nop agnɨŋɨd agak, Takaw nep apal ak, pen ma agɨnɨgaban akaŋ agak? 63  Ais 53.7, Mat 27.12 Agek, Jisas pen takaw olap ma yɨbɨl agak. Anɨgek, bɨ God nop sɨbogep bɨawl yɨbɨl ak agak, Mɨñɨl kot mɨdobun awl, yepɨs ma agɨnɨmɨn agak. God Bɨawl pel mɨdep ak abe nɨg mɨdeb agak. Anɨb ak chɨnop yɨpɨd gɨl agɨnɨmɨn agak. Nad Bɨ God nop aglup ak, God Ñɨne yɨbɨl mɨdeban akaŋ agak? 64  Sng 110.1, Dan 7.13, Mat 24.30, Luk 21.27, Apo 7.55, 1 Te 4.16, Lep 1.7 Agek Jisas agak, Nɨm apan ak agak. Pen nɨbi nɨgɨm agak. Yad nɨbop agebin, kɨdek Bɨ Olap Ñɨne, ne God bɨ kɨles tɨmel mɨdeb ak ñɨn yɨpɨd kɨd okok ken besɨg mɨdɨl, wɨsɨp adek alaŋ nɨb lum awl apek nɨgɨnɨgabɨm agak. 65  Mat 9.3, Mak 14.63, Jon 10.33, Apo 14.14 Wkp 24.16 Jisas anɨb agek, bɨ God nop sɨbogep bɨawl yɨbɨl ak, taynen anɨb agup agɨl, chech ne okok ke tɨg talɨkɨlɨg agak, Ne God nop agjulɨg agosup agak. Taynen binɨb ogɨnap sek agnɨgɨnɨgun agak. God nop agjuwep takaw ak mɨseŋ agup nɨbi nepɨm agak. 66  Jon 19.7 Akaŋ nɨbi gos tay nepɨm agak? Agek agɨlak, Nɨm agup ak nen, kumnɨmuŋ agɨlak. 67  Ais 50.6, 53.5, Mat 27.30, Jon 19.3 Anɨb agɨl, jomulɨk nop kɨñuk gɨñɨlɨg, pakɨlɨg gɨlak. Ogɨnap we gɨl, mɨkem nop okok pak gɨlɨg 68 agɨlak, Nad bɨ God gos ñek agñeb olap anɨb ak agan, nep an pakeb agɨlak. Nad Bɨ God nop aglup ak, chɨnop age nɨgun agɨlak.
Pita agak, Jisas nop ma nepin agak
(Mak 14.66-72, Luk 22.56-62, Jon 18.15-18, 18.25-27)
69 Pen Pita ne besɨgɨl kal seŋ sɨŋak wali mɨgan ayaŋ mɨdaknɨŋ, bin kal anɨb ak wog gɨñeb olap apɨl, nop agak, Nad Jisas bɨ Galili nɨb ak ayɨp yesɨpil agak. 70 Agek, Pita binɨb okok mɨdupsek nɨg yelaknɨŋ kɨlop agak, Takaw nad ageban ak yad ma nepin agak.
71 Anɨb agɨl, tɨkjakɨl am kanɨbtub sɨŋak mɨdaknɨŋ, bin kal anɨb ak wog gɨñeb olap sek apɨl nop nɨŋɨd, bɨ yelak okok kɨlop agak, Bɨ anɨb ak ne Jisas Nasalet nɨb ak ayɨp mɨdel nepin agak. 72 Agek, Pita ag sɨlokɨl agak, Yad nɨŋɨd yɨbɨl apin agak. Bɨ apɨm anɨb ak yad ma yɨbɨl nepin agak.
73 Sɨkol won olap mɨdɨl, bɨ Pita ayɨp jak yelak okok nop agɨlak, Nɨŋɨd yɨbɨl apun, nad bɨ kɨli olap agɨlak. Meg mɨgan kɨli apal tek apan agɨlak. 74  Mak 14.71 Agelak, Pita takaw tɨmel agɨl kɨles gɨl agɨl agak, Yad nɨbop nɨŋɨd yɨbɨl apin, bɨ nɨbi apɨm anɨb ak yad ma yɨbɨl nepin agak. Pen anɨb agaknɨŋ, yawl kakaluk ak suk agak. 75  Mat 26.34, Mak 14.30, Luk 22.61-62, Jon 13.38 Agek, Pita gos ak nɨgak, Jisas ned agak, Kakaluk suk ma agɨnɨgab won ak agɨnɨgaban, Jisas nop ma nepin agɨnɨgaban agak. Takaw anɨb ak won omɨŋal nokom agɨnɨgaban agak. Takaw anɨb ak gos nɨŋɨd, seŋ amɨl chaŋ awl yɨbɨl lak.

26:2 Kis 12.1-27, Mat 20.18, Mak 14.1, Luk 22.1, Jon 13.1

26:6-7 Luk 7.37-38

26:11 Lo 15.11, Jon 12.8, 14.19, 17.11

26:14 Jon 11.57

26:15 Sek 11.12, Mat 27.3

*26:15 Mani silpa 30 tek anɨb ak, ñɨn pagep tek ma mɨdeb. Pen chɨn nopun, mani awl yɨbɨl mɨdeb.

26:17 Kis 12.6, 12.14-20, Mak 14.12, Luk 22.7-9

26:18 Mat 21.3

26:23 Sng 41.9, Luk 22.21, Jon 13.18

26:24 Ais 53, Dan 9.26, Mak 9.12, Jon 17.12

26:26 Mat 14.19, 1 Ko 10.16

26:28 Kis 24.8, Jer 31.31-34, Sek 9.11, Lom 5.15, 1 Ko 10.16, Hib 9.22

26:29 Mak 14.25, Luk 22.18, Apo 10.41

26:30 Luk 22.39, Jon 18.1

26:31 Sek 13.7, Jon 16.32

26:32 Mat 28.7, 28.16, Mak 14.28

26:34 Mat 26.69-75

26:35 Mat 26.56

26:38 Jon 12.27

26:39 Mat 6.10, 20.22, Jon 6.38, Hib 5.7-8

26:41 Mat 6.13, Epe 6.18, Hib 2.14, 4.15

26:44 2 Ko 12.8

26:45-46 Jon 12.27, 13.1, 14.31

26:51 Jon 18.26

26:52 Stt 9.6, Lep 13.10

26:53 2 Kin 6.17, Dan 7.10

26:54 Ais 53.7, Mat 26.56, Mak 14.49

26:55 Luk 19.47, 21.37

26:56 Mat 26.31

26:59-60 Lo 19.15, Sng 27.12, Mak 14.55, Apo 6.13

26:61 Mat 27.40, Jon 2.19

26:63 Ais 53.7, Mat 27.12

26:64 Sng 110.1, Dan 7.13, Mat 24.30, Luk 21.27, Apo 7.55, 1 Te 4.16, Lep 1.7

26:65 Mat 9.3, Mak 14.63, Jon 10.33, Apo 14.14

26:65 Wkp 24.16

26:66 Jon 19.7

26:67 Ais 50.6, 53.5, Mat 27.30, Jon 19.3

26:74 Mak 14.71

26:75 Mat 26.34, Mak 14.30, Luk 22.61-62, Jon 13.38