40
Kotira Seri Naavu kaqa vuru taiqa kora
16 ...Mosiva Noravano Kotiva tunte makero, Kotira Seri Naavu kaqa vuru taiqa kora. 17 Vohaa ihi aitarovaro avuhainaa enta 1 toraqaa, vi entara Isipihai katu vare anu entaraqaa, Kotira Seri Naavu kaqa vuru taiqa kora.
18 Mosiva tumanta vika avuni katari naavu kaara aratera vataini vuqite, viraqaata naavu kaara vaavi arate, viraqaa katari taurini vate, viraqaata kiari hirite, 19 vira naantiara seri tavuna varake vi vaura aqutora. Noravano Kotiva tuntema kero, Mosiva tumanta vika vi kaiqara autukora.
20 Seri Naavu kaqa taiqa kovaro Mosiva Kotiva nai uva qara ntuvato oritanta varero vuru Kotiva uva tivakero taatauto Vokiseraqi vaati vatero, viraqaahairo ringiqi vukai katari hini hini ruqiatero, Vokise vira avuvata taatautero, 21-23 viraqaahairo viva Kotiva uva tivakero taatauto Vokisera Seri Naavuqi vuru vatora.
Noravano Kotiva tuntema kero, Mosiva Vokise viva nariara variarire tiro, tavuna nora varakero hiritovaro kavaqaara autiro vaura. Kavaqaara vira hini mantaraini Mosiva tainta vo vatero, viraqaata Nora Kotira amito mparetira vuru vatora.
24 Mosiva ova vate kairiqara varero vuru tainta vira hini mantaraini vuru vatora. 25 Mosiva viraqi Nora Kotira avuqaa vaiharo ova 7navu qumpi tovaro iteharo vaura. Noravano Kotiva tuntema kero, Mosiva mintura.
26 Viraqaahairo Mosiva kori tainta vo, koqe mura autuaina ofaa taintara, vira vuru kavaqaara tataaqa vatero, 27 muntavu haikara vuquru tovaro iteharo koqe unta i vaura. Noravano Kotiva tuntema kero, Mosiva mintura. 28 Mosiva Seri Naavu qentiqaa nora tavuna vo hiritovaro qenti vira mantaaqa kora.
29 Mintima kero Mosiva ofaa tainta vo, vahaaqaini qentiana vatora. Vi taintaraqaa Mosiva ekaara kaintu iha quare ofaaravata, uiti auruvata Kotira iha quara amitora. Noravano Kotiva tuntema kero, Mosiva mintura.
30 Ofaa tainta hini vauvaro Seri Naavu hini vauvaro tavaarana Mosiva nora tanu vatero, viraqi namari kaqa varero vuru mpiqa kero vatora. 31-32 Mosika Eronikavata, Eronira maaqunavuvata, Kotira Seri Naavuqi vireka ihave, vika Kotira ofaa iha quara amitareka ihave, vika nái aiqu kauqu naane vi tanuraqi hiqamakeha vaura. Noravano Kotiva tuntemake vika mintura.
33 Seri Naavu vahaaqaini vatuka variarire tiro, Mosiva hohaa arakero avuta ntuvatero, tavuna varakero hohaa qentiana hiritora. Mosiva mintiaqiro viharo ekaa vi kaiqara vara taiqa kora.
Tonavuvano Kotira Seri Naavuqaa tuvu vaura
34 Ekaa vi kaiqara vara vuru taiqa kovaro viraqaahairo tonavuvano tuvu Seri Naavu viraqaa hihipaa iro vaura. Noravano Kotiva tonavuqi vauvarora tiro, vira mpeqa okara takuqi vaiva Seri Naavu viraqi mpiqaviro ataa iharo vaura. 35 Mintimakero takuqi vauvarora tiro, Mosiva Seri Naavu viraqi oriqetaarirava kia ho vaura.
36 Tonavuvano Seri Naavuqaa hihipaa iro vau entara Isareri vika miniqai variqi vi vaura. Viraqaahai vika tavovaro tonavuvano Seri Naavu kero vumanta vi entara vika tonavu vira avataqi viha, nái seri naavu maaqa rampai vare tonavu vira avataqi vi vaura. 37 Tonavuvano Seri Naavu qiataqaa vau entara Isareri vikavata kia viraiti, mini vaura.
38 Ho aatitoraqaa vo enta vo enta vika tavovaro Noravano Kotiva tonavu viraqi vauva Seri Naavu qiataqaa vaumanta entaqi vika tavovaro tonavu viraqi ihavano ite vaura. Isareri vika aahara vataini nuvaqi vu entara vika mintimake vi haikara tavora.