1 Eivek bouk ti beimambei yon eno xel betiyeing di nyouk, xel Yuda valu wei mi luk Grik vyend eno wo veweeng is xel Yuda wei mi luk Hibru yo. Me neil embei xel Yudayeiw mi pum yaeing wou kanyo yeiw de xel se mi vind xa xe vexeiv wei Grik o en yaeing teyei lek bouk. 2 Om xel sinale xoumeeng yuw qeku xel betiyeing dalus lekti me neil, “Inye se teyei lek bei xa saing Anutu xe xoulek neileing de na bo xuk lek pumeing lul yaeing. 3 Xam lingyeiw, xam beyal moux lim yuw eivek xam senghoing on wei xam ghe woulek bei Laweeng Vambuing pup xel me xel lundpeyei nimza yo. Tyek xa bong xuk tine e nox mena wou xel, 4 de tyek xa bale ding lek zeimeing mema me xuk wei neileing Anutu xe xoulek o.”

5 Qayeeng tine wong moux alis vex dalus laleind wo nimza, om xel beyal Setepan, moux wei pup en wongeingis me en Laweeng Vambuing, me Pilip, Plokolas, Nikanor, Timon, Palmenas, me Nikolas nanghei Antiok, wei mi betiwou qayeeng wei Yudayeiw o. 6 Xel qou xel moux ti beimambei ne me la wou xel sinale, me xel zeimemend wou xel de liw memend lek xel.

7 Om xoulek wei Anutu xe eno la wo sapa. Xomaxoneing ngenong wei Yerusalem eno wong ambei betiyeing me nyouk daing, me lumukiyeiw valu beti eno wongis ambei nyon.

8 Gweimbeeng Setepan on moux wei pup en Anutu xe lalei xeiles me nikanzek, me mi wong dee wei lulvako ngenong eno eivek xomaxoneing senghoing. 9 Ekom xomaxoneing valu qandi me wong veweeng is Setepan. Xel on anghei xomek qekueing ama wei xel taxe bei tul e la. Xel on nanghei Yuda eno lam anghei Sairini me Aleksandlia me lam anghei provins wei Silisia me Esia. 10 Ekom xel se teyeimbei bale zeyi e lupeyei me Laweeng Vambuing wei di luk angya yo.

11 Woyom xel xupek me zeim xel valu laleind lek me neil embei, “Xa ngo Setepan lukyak lek Mose me Anutu.”

12 Om xel zeim xomaxoneing laleind lek me teivateiv me putoung wei petieing o. Om xel zeimaxoun Setepan me qou e me la wou xel kanzol. 13 Xel beyal xel valu bei xel a byex qayeeng tyonyeing lek Setepan me neil ambei nye, “Taxombouk eno tambiy ne se mi tip lukeing nilul lek xomek vambuing tine me e xe qayeeng petieing. 14 En xa ngo e neil tiyon bei, ‘Yesu wei Nasaret o tyek lelolexe xomek vambuing tine me pelipek sakwaing wei Mose wong wou xey yo.’ ”

15 Xel dalus tiwei toundei eivek kanzol beeng eno domend wou Setepan, me xel yei e ma yon siing ambei angela ti manghalus.