5
Qapiya vevilexeing me Sipsip Lingheing
1 Woyom a xei qapiya tiwei xel vevilexe is qayeeng wei xel byex lek yuw valuvalu xouing me xel betiy angya newiy lim yuw zeyi eno toundei eivek e wei toundei lek siaking eno mema payeiv. 2 De a xei angela nikanzekta ti di taxe xoulekeing me neilteyei bei, “Eti teyeimbei zex xel newiy yon me bindek qapiya vevilexeing?” 3 Ekom xel ma eivek tyoung gheyapu o lek tembuing o eivek tembuing xeinghembi wei teyeimbei bindek qapiya vevilexeing on me gyeina eivek lalei. 4 A eng me na eng lumama en nambei eti se yeiwou xelti wei e teyeimbei bindek qapiya vevilexeing o e teyeimbei gyeina lalei. 5 Woyom teivateiv on ti neil wou ay, “Wa seng deeng! Wei, layon wei velei wei Yuda yo, me Luselis wei Dawit buyeiw wei byex mangheeng lek eno wo vevek ma woy. E teyeimbei bindek qapiya vevilexeing me zex newiy lim yuw on.”
6 Woyom a xei Sipsip Lingheing ti, di yeima nambei ingwei xel leis e mey o, toungale eivek siaking masenghoing, is xel lul mapieing vey on me teivateiv nale vivekwou e. E xe lu qepeind on lim yuw me manghalus on lim yuw wei inyei laweeng lim yuw wei Anutu yo wei Anutu wong ela eivek tembuing tambak on dalus. 7 Moxo lam me qou qapiya vevilexeing veil e wei toundei lek siaking eno mema payeiv.
8 Me ka e qou, eno lul mapieing vey on me 24 teivateiv on ev vaxend qatu eivek wou Sipsip Lingheing manghalus. Xel titi xe lul wei nambei gita me xel di zeim dipek ghol wei pup en nenyex lu xeiliy o, inye zeimeing mema wei xel vambuing. 9 Me xel wong lalo vako ti:
“Wang teyei lek bei qou qapiya vevilexeing
me ghe zex e xe newiy de ghe bindek
en inyei xel leis wang mey,
me wang bey xomaxoneing en wa gyand me ghe wong xel la wou Anutu
eivek veleivlei titi me vya titi me xomaxoneing ninavi titi me tembuing tambak titi.
10 Wang wong xel on nambei tete lalei ti me lumukiyeiw wei embei bo xuk wou xe xe Anutu yo, me tyek xel bo king en xomaxoneing lek tembuing.”
11 Woyom a xeila me na ngo angela ngenongakes vyend, teyei lek ngenong me ngenongakes kamouyo me tausen tausen. Xel vivekwou siaking me lul mapieing me xel teivateiv. 12 Xel wong lalo niseikeing bei:
“Sipsip Lingheing wei xel leis e mey,
eno teyei lek bei na qou nikanzek ngandoung me lulul nimza me lupeyei nimza me nikanzek
me bong e lei zekna me xeiyaing ngandoung me bo xeilala wou e.”
13 Woyom a ngo lul mapieing sapa sapa eivek tyoung gheyapu me lek tembuing me eivek tembuing xeinghembi me lek mamileeng me lulul dalusateiv wei toundei eivek xel on, wo lalo nambei nye:
“Xeilala me bong e lei zekna me xeiyaing ngandoung me nikanzek ngandoung wei luta luta yo eno ena wou tambiy wei toundei lek siaking o me ena wou Sipsip Lingheing!”
14 Lul mapieing vey on neil, “Zonghek.” De xel teivateiv on ev vaxend qatu eivek dom wo lalo wou luw.