1 Andi xei de Sipsip Lingheing lex newiy lim yuw eno tiwei tax wei wo zeyi qapiya vevilexeing o. Woyom a ngo xel lul mapieing vey on ti neil eivek vya nambei dewek toungheing me neil, “Lam!” 2 A xei la, eno inyon vuteiv teleing ti toungale wou a mang. Tambiy wei dei lek vuteiv eno zeim vanzay ti me xel wong qelumking ti wou e, me e dei lek vuteiv me la nambei tambiy wei wo vevek ghanaw me di wo vevek ngenong o.

3 Woyom Sipsip Lingheing lex newiy nge, yuw wei wo zeyi qapiya vevilexeing o, a ngo lul mapieing nge wei yuw o neil, “Lam!” 4 Woyom vuteiv nge lam myayaing inyei gyand nambei nenyex magyand ti. Xel wo nikanzek wou tambiy wei toundei lek vuteiv on bei e zeim lalei vevopeing veil tembuing bei bong xomaxoneing nyeis ama me na mey. Xel wong ngeyeing vevek wei manewou yuw valuvalu yo ti wou e.

5 Woyom Sipsip Lingheing lex newiy tiwei yal wei wo zeyi qapiya vevilexeing o, a ngo lul mapieing yal on neil, “Lam!” A xei la me na xei vuteiv ngak ti toungale wou a mang. Tambiy wei dei lek vuteiv eno di zeim sekel ti eivek mema. 6 Woyom a ngo lulti nambei vya ti lam eivek lul mapieing vey on senghoing me neil, “Xouveing wei buk ti eno teyei bei dexouv wit wei xey a zakouv eivek deng nayak o ti, me deng nayak yal en bali wei xouveing wei bouk ti yo, de xam seng bo nol wou wel me wain.”

7 Dekakom Sipsip Lingheing lex newiy tiwei vey wei wo zeyi qapiya vevilexeing o, a ngo lul mapieing tiwei vey eno vya, neil embei, “Lam!” 8 A xei la, me na xei vuteiv nimazeng ti toungale wou a mang! Tambiy tiwei toundei lek vuteiv on lei Meyeing, me Beyeeng wei meyeing eno di lam paviy e demi. Xel wo nikanzek wou luw bei luw nyeis xomaxoneing qendu ti eivek qendu vey on lek tembuing nangya ngeyeing vevek, me nyeis xel angya sewis ngandoung wei maxep o, tiwei tyek gyeip lek tembuing o, me nyeis xel angya vanei ngandoung, me nyeis xel nangya leliy bemeeng wei tembuing o.

9 Woyom e lex newiy lim tiwei wo zeyi qapiya vevilexeing o, eno a xei la qeind xeinghembi me na xei xel wei xel leis xel mey o nund pieing, qes en xoulek wei Anutu yo me xel xe pavulek wei xel mi nale nikanzek en o. 10 Xel taxe la niseikeing bei, “King lei Ngandoung wei lulul tambak o, wang on vambuing me wang on zonghek, ka bouk vati le ekom wang bo qayeeng en xomaxoneing wei tembuing o, me na qou xa lumi en gyand wei xa yo lek xel?” 11 Woyom wong teimb ding teleing eno wou xel titi dom neil wou xel bei, “Xam a mi daxe enden nayaka le, deka xel nyeis xel wei xam ghe mi wo xuk lekti yo me limyeiw vamva wei Anutu beyal bei xel nyeis xel amey nambei ingwei xel leis xel mey atax eno e na bup bole.”

12 Andi xeiteyei deka e lex newiy limti wei wo zeyi qapiya vevilexeing yo. Tembuing ngandoung ti pi. De seiv pekwi ngak nambei teimb wei talot wei xel duw en meme nivlus o, me dentouk pekwi me wo gyand apyeindek ambei gyand, 13 me betum wei toundei eivek tyoung eno teila tembuing, nambei xax basunghek neing wei ghambu eno mi tei veil xax gyeik ingwei laweeng ngandoung vei e lox me loum o. 14 Tyoung vup xow me la nambei qapiya vevilexe xow o, me lukendu is tembuing tambak danghei tiwei mi nale eivek mamileeng eno la veil nimbeeng.

15 Woyom kingyeiyeiw wei tembuing o me xel leitata, beyeiv wei xel vevek o me xel wei lulul ana yo, me xel wei nikanzekta yo de xel xukxe bandaing me xel wei toundei vevopeing eno la xupek eivek eeng lalei me eivek qakous ngandoung senghoing wei lukendu yo. 16 Xel taxe la wou lukendu qendu me qakous qakous bei, “Tei lam lek xa me vun xa veil tambiy tiwei toundei lek siaking eno manghalus me vun xa veil lalei vanei wei Sipsip Lingheing o. 17 En bouk ngandoung wei luw xe lalei vanei eno lam, om eti teyeimbei bale wou?”