7
144,000 Israel qou dee wei Anutu yo
1 Ka tine ma eno a xei angela vey toungale lek tembuing nenyawes vey me di zeimaxoun laweeng vey wei tembuing o en xel bale zeyi laweeng en kandek laweeng ti se davei lek tembuing o lek mamileeng o lek xel xax on. 2 Woyom a xei angela nge lam anghei ninei wei sayeiv mi lam tyip nei, di zeim dee wei Anutu mapieing o. Moxo taxe niseikeing la wou angela vey wei wo nikanzek wou xel bei xel bo nol wou tembuing me mamileeng o: 3 “Xam seng bo nol wou tembuing o mamileeng o xel xax on qe ka xa bong dee lek dambamya wei xe xe Anutu xe xukxe yo bole.” 4 Woyom a ngo xel vamva wei dee dei lek xel o: 144,000 eivek veleivlei dalus wei Israel o.
5 Eivek velei wei Yuda eno 12,000, wei dee dei lek xel o,
eivek velei wei Ruben eno 12,000,
eivek velei wei Gat eno 12,000,
6 eivek velei wei Asal eno 12,000,
eivek velei wei Naptali eno 12,000,
eivek velei wei Manase eno 12,000,
7 eivek velei wei Simion eno 12,000,
eivek velei wei Livai eno 12,000,
eivek velei wei Isaka eno 12,000,
8 eivek velei wei Sebulon eno 12,000,
eivek velei wei Yosep eno 12,000,
eivek velei wei Benyamin eno 12,000 qou dee wei Anutu yo.
Xomaxoneing ngenongakes di wo lalo wou Anutu
9 Ka tine ma a xei la, me na xei xel ngenongakes wei xelti se teyei bei pyaw memawou xel, eno toungale wou a mang eivek tembuing tambak titi me veleivlei titi me xomaxoneing ninavi titi me vya titi, nale wou siaking ma me nale tax wou Sipsip Lingheing manghalus. Xel byex teimb ding teleing me di zeim zangholeng mema eivek memend. 10 Me xel taxe la xoulekeing:
“Xuk wei vineing xey veil meyeing eno inyei xe xe Anutu xe,
wei toundei lek siaking o,
me ena wou Sipsip Lingheing.”
11 Xel angela dalus toungale vivekwou siaking me vivekwou teivateiv me lul mapieing vey on. Xel ev vaxend qatu wou dom iv mend eivek tembuing wou siaking de wo lalo wou Anutu, 12 me xel neil,
“Zonghek!
Xeilala me xeiyaing ngandoung me lupeyei nimza me dange me bong e lei zekna me nikanzekta me nikanzek ngandoung e na wou xe xe Anutu luta luta. Zonghek!”
13 Woyom teivateiv on ti teling ay, “Xel beimambei wei vunek teimb ding teleing nei, inyei eti yeiw, me xel nei lam anghei inya?”
14 A lenghek, “Teiv, wamaxow ghe woulek woy.”
Om moxo neil, “Xel ne inyei xel wei lam eivek nimaying ngandoung o, me xel sekweyexe xel xe teimb ding me wong e wo teleing eivek gyand wei Sipsip Lingheing o.
15 “Omek xel nale wou siaking wei Anutu yo ma,
bendiyeing me boukeing eno xel mi wo xuk wou e eivek e xe xomek vambuing,
me tambiy wei toundei lek siaking on tyek tendiyexe e xe sel na lek xel.
16 Tyek xel se nox me na daxe maxep,
de xel kwend tyek se nox me na tip no.
Sayeiv tyek se nyeis xel nindnavi,
me lulti tyek se bong xel nindnavi bo myavanei ngandoung.
17 En Sipsip Lingheing wei toundei eivek siaking masenghoing eno inyon xel xe gyovaxa.
Moxo tyek na dandiy xel na wou memiing mapieing wei mi pululaxeiv o.
Me tyek Anutu davu xel mendlouk veil xel mendghalus.”