1 Ka e lex newiy lim yuw ti yus wei xel betiy qapiya vevilexeing nangya yo, eno tyoung gheyapu yeip kanzek teyei lek ambei seivma veweeng.

2 Me a xei angela lim yuw wei mi nale wou Anutu manghalus o, me xel qou vukxax lim yuw.

3 Angela nge, zeim dipek ghol wei xel mi nyuw xax myalouk wei xeiliy o, lam me nale wou qeind. Xel wong xax myalouk wei xeiliy ngenong wou e bei e banyuw ambei da, is zeimeing mema wei xel vambuing dalus wei Anutu yo lek qeind wei ghol o wou Anutu xe siaking manghalus. 4 De nenyex lu xeiliy ne is zeimeing mema wei xel vambuing eno luw xouing la gheyapu wou Anutu manghalus eivek angela mema. 5 Woyom angela qou nenyex wei qeind o me toung eivek dipek wei xel mi nyuw xeiliy lek o dom nex nenyex la lek tembuing me dewek toung niseikeing me wo nindenduing me zivip nex mema de tembuing pi.

6 Woyom angela lim yuw wei di zeim vukxax lim yuw on yeiwou en xel embei davei vukxax on.

7 Angela tiwei tax eno vei e xe vukxax, me sakwalek me nenyex maleeng is gyand eno nex e tei lam lek tembuing. Me eivek tembuing danghei tiwei yal eno nenyex ya, me xax danghei tiwei yal eno nenyex ya, me qeis qeis dalus wei nimwis eno nenyex ya.

8 Angela tiwei yuw eno vei e xe vukxax, me lulti nambei lukendu ngandoung ti eno tum magyand me xel nex e la eivek mamileeng. De mamileeng danghei ti eivek ingwei yal eno wo gyand. 9 Lul mapieing wei mamileeng eno danghei ti eivek ingwei yal eno mey, me sip bembeeng on danghei ti eivek ingwei yal eno wo nilul ma.

10 Angela tiwei yal eno vei e xe vukxax, me betum ngandoung ti tum magyand nambei zounghexeing, tei lam veil tyoung me tei lek memiing danghei ti eivek ingwei yal o me tei lek memiing lulaxeiv. 11 Betum tiyon lei Senyeing. Memiing veleivlei ti eivek ingwei yal eno wo senyeing, me xomaxoneing ngenong mey en memiing danghei wei wo senyeing on.

12 Angela tiwei vey on vei e xe vukxax me sayeiv valu tiwei eivek yal eno xel wo nol wou, me dentouk valu tiwei eivek yal on xel wo nol wou, me betum danghei tiwei eivek yal eno xel wo nol wou, en kandek ti eivek ingwei yal eno e bouk eivek. Bendiyeing ti eivek ingwei yal eno xeiyaing ema veil, me boukeing ti eivek ingwei yal eno is ambei nyon.

13 Ka andi xei, a ngo tuw tiwei di zeivek eivek tyoung masenghoing eno taxe lam eivek vya ngandoung: “Aei! Aei! Xam wei ghe toundei lek tembuing on xam ghe gwaleeng amim, en angela yal nanghei eno embim davei vukxax vya zenghek ngandoung. En nambei nimaying ngandoung tyek qandi lek wou xam.”