1 De a xei angela ti lam veil tyoung gheyapu me lam axone. E di zeim ki wei leiveeng wei qes maeing o me di zeim sen ngandoung ti eivek mema. 2 Moxo zeimaxoun wex ngandoung, wex tiwei takwei qenang o, e tambiy mapetok o Sandang, me tup e xoun teyei lek vakovek qes 1,000. 3 Me angela nex ela eivek leiveeng wei qes maeing o dom wou mya zeyi me toung telumek lek zeyi. En kandek e se tyoxe xel wei tembuing sapa yo no, deka 1,000 vakovek qes ena ma le. Dekakom na tul ena teyei lek bouk sepika.

4 Woyom a xei siaking valu me xel wei toundei lek on inye xel wei Anutu wong lei ngandoung wou xel bei xel a zeim qayeeng en xomaxoneing. De a xei xel nund pieing wei xel qateiv xel kwend o en nambei xel mi wongis Yesu me neil e xe pavulek teyei, de mi zeimaxoun xoulek wei Anutu yo wo nikanzek. Xel se mi wo lalo wou leliy bemeeng o e tenu me xel se qou e xe telumek lek xel dambendmya o lek memend. Xel on qandi mapieing no me dei nambei king is Kilisi teyei lek vakovek qes 1,000. 5 Nyei xel bamba wei mey eno se ghei qandi lek, qe ka vakovek qes 1,000 e na ma veil le. Inye myaxeeng wei xel meyeing qandi lek o.

6 Xel wei qandi lek veil meyeing tiwei tax eno na mi bo xeilala me na mi mendei vambuing. En meyeing nge wei luyuw eno nikanzek ma veil xel, dom tyek xel bo lumuki wei Anutu me Kilisi yo me tyek xel mendei nambei king is e teyei lek vakovek qes 1,000.

7 Ka 1,000 vakovek qes na ma veil le ekom xel a tul Sandang na veil e xe xeitueing 8 me tyek na myayaing me na tyoxe tembuing sapa wei Gok me Magok nei eivek tembuing myasepu vey. Sandang tyek qeku xel en vevek. Xel vamva nei eno nambei luzeeng wei mamileeng vi yo. 9 Tyek xel bakeita me nam anghei tembuing tambak nei me bivekwou beyeeng wei xel wei Anutu yo is beyeeng ngandoung wei e lalei vind o. Ekom nenyex lam eivek tyoung gheyapu me ya xel ma. 10 De tambiy mapetok wei mi tyoxe xel eno Anutu nex ela eivek leiveeng manghembi wei nenyex mi tum lek qakous wei wo gyand en nenyex o. Nanghei ingwei leliy bemeeng me poropet tyonyeing eno xel nex luw la eivek atax o. Tyek lal ami qou myavanei ngandoung boukeing aluw bendiyeing takwei takwei.

11 Woyom a xei siaking teleing ngandoung ti me e wei toundei lek o. Tembuing me tyoung pek me la veil e manghalus me xel se toundei no. 12 Me a xei xel meyeing, xel wei lei laeing o me xel wei lul maeing o eno toungale mya wou siaking me xel vindek qapiya bembeeng on. Qapiya nge eno vindek inye qapiya wei mapieing o. Xel wei meyeing eno Anutu zeim qayeeng en xel teyei lek kwa wei xel mi wong takwei yo, nambei ingwei byex ela di yeip eivek qapiya bembeeng on. 13 Mamileeng wong meyeing wei di yeip eivek e eno la. Me meyeing me beyeeng wei meyeing eno wong xel meyeing wei toundei eivek luw eno la. Me xel xomaxoneing titi eno Anutu zeim qayeeng en xel teyei lek kwa wei xel mi wong o. 14 Woyom meyeing me beyeeng wei meyeing eno xel nex luw la eivek leiveeng manghembi wei nenyex mi tum lek o. Leiveeng manghembi wei nenyex mi tum lek eno inye meyeing nge wei yuw o. 15 Wangwei xelti leind se gyeip eivek qapiya wei mapieing o yond xel nex e la eivek leiveeng manghembi wei nenyex mi tum lek o.