1 Woyom a xei tyoung gheyapu vako ti me tembuing vako ti, en tyoung gheyapu tiwei myaxeeng o me tembuing tiwei myaxeeng eno lati veil, de mamileeng ti se di yeip no. 2 A xei beyeeng vambuing wei Yerusalem vako yo, eno toundei is Anutu me di lam axone veil tyoung gheyapu nambei vex wei embei mendei leya yo eno vunekwou xow atax wo nimza en leya. 3 De a ngo vya taxeing ti nanghei siaking eno neil, “Wei! Anutu beeng eno toundei is xomaxoneing me e mindei is xel. Xel xomaxoneing on e xe, me tyek Anutu venaxow na toumendei is xel me mendei nambei xel xe Anutu. 4 Moxo tyek davu xel mendlouk sapa veil xel mend. Me xelti tyek se nox amey no o bong talot o engeing o daxe vanei en lulul wei myaxeeng eno lati dei ti se toundei no.”

5 E wei toundei lek siaking eno neil, “Wei! A di wong lul sapa wo vako!” Woyom moxo neil, “Wa byex tine nak en qayeeng beimambei ne xel teyei bei bongis me inye zonghek.”

6 E neil wou ay: “Moxo ma yo. A ne tambiy wei tax o me yusayang, a wo qes en lulul sapa me ingwei la tip lek o. Tyek a bong numeing wou tiwei kwa tip en memiing o eivek memiing mapieing wei mi puw lulaxeiv o. Tyek a bong bandaing wou e dom e se bou. 7 E wei mi xoklek nimaying dom mi la yo tyek na qou lulul dalus ne, me tyek a toumendei nambei e xe Anutu de e nambei a neung. 8 Ekom xel wei bambou louk o, me xel wei se mi wongis o, me xel wei nilul o, me xel wei mi leis xel mey o, me xel wei mi wo kwapesiv o, de xel wei mi wo palak o, me xel wei mi wo lalo wou anutu tyonyeing o, me xel tyonyeingana dalus, eno xel bend toundei eivek leiveeng manghembi wei nenyex mi tum lek qakous wei wo gyand en nenyex o. Inyei meyeing nge wei luyuw o.”

9 Xel angela lim yuw eno tiwei qou dipek lim yuw wei pup en lulul myavanei nilul wei yus eno lam me neil wou ay, “Lam, tyek a talex vex wei embei mendei leya wou Sipsip Lingheing o.”

10 Me Laweeng Vambuing lam eivek ay de angela qou ay me la lukendu ngandoung wei gheyapu yo ti, me talex Beyeeng Vambuing Yerusalem wou ay, wei di lam veil Anutu nanghei tyoung gheyapu nei me lam axone. 11 E tel en Anutu xe xeiyaing ngandoung. E xe xeiyaing nei siing ngandoung nambei qakous nimza maseim me nambei qakous jaspa wei mi tel nambei dewek o. 12 E xe tete nei vaxading ngandoung is tete mya nei xoumeeng yuw me angela xoumeeng yuw toungale wou tete mya. Xel byex Israel velei xoumeeng yuw on leind eno lek tete beimambei yon mya. 13 Tete mya yayal toungale ninei, yayal toungale punei, yayal toungale xonei de yayal toungale xeinei. 14 Tete qes wei beyeeng ngandoung on eno xe qakous xoumeeng yuw me sinale xoumeeng yuw wei Sipsip Lingheing xe eno leind toungale lek qakous qes on.

15 Angela wei luk is ay eno qou patongeeng ghol wei mi dandiy wou lulul en eno bei na dandiy wou beyeeng ngandoung on tete mya is e xe tete. 16 Beyeeng ngandoung on byek vey on eno teyeima. Dinganding wei e yon me ngandoung wei e yon eno teyeima. E dandiy patongeeng wou beyeeng ngandoung on me yei bei nyei la teyei lek 12,000 stadia*21:16 12,000 stadia teyei lek 2,200 kilomita. teyei wou ingwei dinganding o, me ingwei ngandoung o me ingwei ghey wei la ding o eno dalus teyeima. 17 E dandiy patongeeng wou tete me inye la teyei lek 144 mita. De inye nambei ingwei xomaxoneing mi dandiy wou lulul en o eno angela di dandiy wou tete en. 18 Anutu ev tete yon en qakous jaspa me beyeeng ngandoung on en ghol paleveeng me e xe belin on nambei dewek. 19 Xel vunekwou tete qes wei beyeeng ngandoung on nangya qakous leimalei sapa wei nimza maseim o. Qakous qes tiwei tax o en qakous jaspa eno gyand o neluy, tiwei yuw eno sapaia inyon matyoung, yal eno aget, vey eno emeral neluy, 20 lim eno sadoniks gyand me liw pus eivek, limti eno kanilian wei gyand, lim yuw eno klisolait wei zengzeng, lim yal eno beril wei neluy, limvey eno topas wei zengzeng, xoumeeng eno klisopres wei neluy, xoumeeng ti eno haiasin wei matyoung, de tiwei xoumeeng yuw eno ametis wei mateyek. 21 Tete mya wei xoumeeng yuw eno inyon koumkoum wei xoumeeng yuw o, tete mya titi eno xel ev en koumkoum ti. Sakwaing mema mema wei beyeeng ngandoung on xel wong en ghol paleveeng, me mi tel ambei dewek.

22 A se xei xomek vambuing ti eivek beyeeng ngandoung on, en Tambiy Ngandoung Anutu Nikanzekta me Sipsip Lingheing nei eno nyei luw xomek vambuing. 23 Beyeeng ngandoung on se teyeimbei seiv o dentouk a siing lek, en nambei xeiyaing ngandoung wei Anutu yo mi wo xeiyaing wou, de Sipsip Lingheing eno inyei e xe lam. 24 Xomaxoneing tembuing sapa tyek mendei na en e xe xeiyaing, me kingyeiyeiw wei tembuing o tyek na qou xel xe lulul nimzamza me na eivek lalei. 25 E xe tete mya yon ti se teyei bei na tuzeyi lek bendiyeing ti no, en tyek boukeing na ma veil nanghei nyon. 26 Vunekeing nimzamza me xomaxoneing wei lei laeing wei tembuing sapa nei tyek nam me na eivek lalei. 27 Lul wei nilaxes eno ti se teyei bei nam me na eivek lalei, o xel wei mi wo kwa niyalenyeing o pup en tyonyeing eno is ambei inyon se teyei bei na eivek lalei, qe xel kawei leind yeip eivek Sipsip Lingheing xe qapiya mapieing eno venaxow.