1 Ene tonarr ngarkwat, king Errod ngibürr sos pamkolpam bumiógürr, zitülkus oya ubi ibü wirri müp aliónüm yarilürr. 2 Da wa arüng bóktan nókyenóp Zeimsün büdüldü angrinüm, Zonón naret, kokrrap gazirr turriki. 3 Wa nóma esenórr wagó, ini tonarra Zu pamkolpam bagürwóman kuri ngintirre, da wa akó igósidi zirrnapónóp tóba gazirr pam Pitan amiógüm. Ini tonarra ugón tómbapónórr, ⌊Ist-koke Brred Tóre⌋ ngürr nóma yarilürr. 4 Oya nóma amigóp, da tümün müótüdü ingrinóp. Da Errod 16 gazirr pam yazebórr, tokom koboabkü. Da wa igó irrbünürr, tokom gazirr pama Pitan inzan ki ngakan kwarile, ngaen-gógópan darrü tokom, akó darrü tokom, darrü tokom, akó dómdóm darrü tokom. Errodón gyagüpitótók yarilürr Pitan ódódóm blaman pamkolpamab ngorodó amtinüm, ⌊Büdül Kórzyón Tóre⌋ solkwat. 5 Pitan tümün müótüdü ola ngakan kwarilürr, a sos pamkolpama metat wirri arüngi tóre kwarilürr oyankü Godka.

6 Dómdóm irrüb yarilürr, Errod oya ugón ki sidüde arrkrru pokodó, Pita nis gazirr pamab aodó ut yarilürr. Oya tang nis, nis sein sye-i arümürrün namülnürri, gazirr pam nisab tangpükü. Ngibürr gazirr pama go tümün müót mamtae ngakan kwarilürr. 7 Büzyón babul, Lodón darrü anerrua ugón tamórr, da zyóna ugón we babzelórr Pita ne pokodó ut yarilürr. Wa Pitan mobobdó samurrürr da Pitan irsümülürr. Wa bóktanórr wagó, “Büsai bupa!” Dümdüman sein nisa we tuprri Pitan tang nisdügab. 8 Anerrua wagó, “Pita, mórrkenyórr akó wapór kla bamel.” Da wa we bamelórr. Anerrua akó bóktanórr wagó, “Moba tumum bamel mórrkenyórri moba büb bórrgóta, da kürüka tókya!” 9 Pita oya solkwat we akyanórr tümün müótüdügab. Wa umul-kók yarilürr igó, anerrua ne poko tónggapónda, wa amkomana; oyaka igó gyagüp yarilürr wamaka, ka aerrde nuszan kla asendóla. 10 I ngaen-gógópan ngakan pam sórrgrratórri, akó nis ngim pam, da i dómdóm turrürri kalkuma baus ayan mamtaedó ama wirri basirrdü. Da ene mamtaea tebe tapabakurr ibü burruanóm. I darrpan kwatana nóma aurrürri, büzyón-babul, anerrua Pitakagab popa we bamrükürr.

11 Pita morroal gyagüpitótók nóma ipadórr wagó, oyaka inzan klama tómbapóne, da wa we bóktanórr tóbaka wagó, “Ka errkya tai kuri umul baina, Lod tóba anerru zirrsapóne kürü arruanóm Errodón tangdógab, akó Zu pamkolpama ne kla gyagüpi aman kwarilürr tónggapónóm kürüka.”

12 Wa nóma umul bainürr, wa Merrin müótüdü wamórr, Zonón aip. Zonón darrü ngi Mak* Makón Peba, Zon Mak wató wialómórr. Apostolab Tórrmen 12:25; 13:13; 15:37-39; Kolosi 4:10; Pilimon 1:24 yarilürr. Pamkolpama ini müótüdü kwób bazenórr, da we tóre kwarilürr. 13 Pita pul basirr mamtae alkalórr, da darrü zaget ngulmokur, ngi Rroda, katókórr mamtaedó. 14 Wa Pitan bóktan bómgól nóma arrkrrurr, wa wirribóka bagür warilürr, da oya mamtae tapakubókama bamrükürr. Wa müót kugupidü busorr, da bóktanórr wagó, “Pita watóke, mamtaedó!” 15 Ene kolpama wagó, “Ma gonggola!” Wa wagó, “Koke! Amkoman watóke!” Da i akó bóktónóp wagó, “Igó oya ngakan anerrua.”

16 Pita wata mamtae alkal yarilürr, da i oyankü mamtae tapasukuóp, oya esenóp, da gübarirr aengóp. 17 Pita tóba tange tórrmen tónggapónórr ibü piküp bainüm. Wa adrratórr ibüka oya Lod ia sidüde tümün müótüdügab. Wa bóktanórr wagó, “Zeims† Ini ne Zeims yarilürr, Yesun zoret yarilürr. Wa Zerrusalem sosan alngomól pam yarilürr (Galatia 1:19). akó Yesun amkoman angun zonaretal nüzazilamke ini poko,” da wa ibü we nümgütóp darrü pokodó tótókóm.

18 Irrbi, gazirr pama karibóka-koke bóktan kwarilürr, akó abün-abün gyagüpitótóka togobórr, Pitaka ia laróga tómbapónórr. 19 Errodón zaget pama oya yamkünónóp, da koke esenóp. Oya amkün kakóm, Errod ene gazirr pam nümtinóp Pitan nidi ngakan kwarilürr. Ibü alkomól bóktan gaodó koke yarilürr Errodka, da nilóp ibü büdülümpükü akrranóm.

Ene kakóm, Errod Zudia prrobins amgatórr, da karianbóka ngyabenóm Sesarria wamórr.

20 Errod, Taerr akó Saedon wirri basirr pamkolpamdó wirri ngürsil amgün yarilürr. I darrpan kopo tónggapónóp, da oya asenóm we ogobórr. I Blastusün gyagüpitótók ekyenóp ibü tangbamtinüm, zitülkus wa kingan ut bwób ngakan pam yarilürr. Errod oya amkoman yangunürr oya blaman zagetódó. Da i oya paudüm yatop, zitülkus ibü alo klama wata kingan bwóbdügab togoblórr.

21 Ene amanikürrün ngürr nóma semrranórr, Errod tóba kingan mórrkenyórr bamelórrón yarilürr, mórrarrón tóba kingan mórran klamdó, da bóktan yarilürr blaman pamkolpamdó. 22 Pamkolpama wirribóka bóktónóp wagó, “Ini popa mizan pama koke bóktanda, a wa goda.” 23 Büzyón babul, Lodón darrü anerrua Errodón we singalkalórr, zitülkus wa amkoman God koke agür yarilürr. Oya büb murr kupulazan elengnónóp, da we nurrótókórr.

24 Godón bóktana metat wirri bailürr akó bayolórr bwób-bwób.

25 Barrnabas akó Sol, ibü tangbamtin agóltagóla nóma blakónórr, i Zerrusalem wirri basirrdügab tolkomólórri. I inkü Zonón sidódrri. Oya ta Makbóka ngilian kwarilürr. Apostolab Tórrmen 12:12; 13:13; 15:37-39; Kolosi 4:10; Pilimon 1:24