9
Maaron iuluul tamtoghon to tineep ila pataŋani lolo
Mbouŋ to David.
Paesiiŋ ila pa ŋgeu to imuuŋ pa mbouŋ tovene: Mbouŋ tonene aliŋa “Almut Laben” (o “Mateeŋ to natu”)
O Yoova, you napait ghom pa poia tiom toman lolog.
Ve naghaze navotia uraat gharatooŋadi to yom ughamgham di. Uraat tonanan, ite kat. Tamtoghon tighita di le ŋgar todi isob.
 
You lolog poia kat ve tinig iza payom.
Yom Maaron tiina to ulib pa ndimaronŋa tisob.
Tovenen you pale nambou, ve napait izam.
Sawa to koiagŋa tighita katin tapirim, yes titoor di, ve tighaze tighau.
Eemoghon titaptap tizi le tisob timatmaat.
 
Yom uneep ila inam to ghamuuŋ pooz, ve uŋgagabiiz tamtoghon. Ve gabizooŋ tiom, nene deŋia moghon.
Yom ughita ghou ughaze ŋgar tiou deŋia. Tauto uul ghou pa saveeŋ tiou.
Yom uyaan ndug ndug to tiwatag ghom maau, ve ureu tamtoghon samsamiadi tilaledi.
Yom umus izadi tilaledi wa.
Irau tamtoghon matadi iŋgal di muul maau.
 
Koiagŋa tisami wa. Pale tineep tovene itaghoni taghoni gha ila.
Ve ndug todi paam, yom ureu mbirisan di le tisob tilaledi.
Tovenen tamtoghon pale lolodi imaagh padi kat.
Yoova ineep ila ina to ghamuuŋ pooz, ve iŋgin mbeb irau sawa isob.
Ye ighur ina tonowen, ve inamnaam pa iŋgabiiz tamtoghon.
 
Ye iŋgagabiiz tamtoghon tisob to taan, ve ighagharaat pataŋani todi itaghon ŋgar deŋia.
Ve igham pooz pa ndug ndug itaghon ŋgar raraate moghon. Mbnp 18:25; Mbaŋ 17:31
Yoova inim ruum ariaŋa pa yes to koiadi tighur pataŋani padi.
Ighaze pataŋani ivot, ye inim ledi ndug to yoŋgaaŋ.
 
10 Yoova, yes to tiwatag katin ghom, tinumeer ghom.
Pasa, ndiran to tizuaria di payom, yom irau upul murim padi maau. Hib 13:5
11 Ambou ve apait Yoova.
Ye ineep izi ndug Zion, ve ighamgham pooz.
Uraat tintina to ye ighamgham di, avotia varudi le irau ndug ndug.
 
12 Yes to tirab tamtoghon le naghodi siŋ, Yoova ighurghur di maau. Pale iyat ŋgar todi tonowen.
Ve tamtoghon to tinumeera ve timbadbaad pataŋani, ye irau lolo imaagh pa taŋiiz todi maau. Pale iuul di.
13 O Yoova, ughita pataŋani to koiagŋa tigham payou ne!
Yes tiwaghamun ghou kat, ve rismoghon tone namaat.
Lolom isamin ghou, ve upas ghou navot pa pataŋani tonene.
 
14 Leso nayoon ila ataam to ndug Zion, ve nasavia uraat tintina tisob to yom ughamgham di payou. Ve napait ghom toman tinig iza. Pasa, yom to ugham mulin ghou.
 
15 Ndug ndug to tiwatag ghom maau, titai saambu leso tikis tamtoghon. Eemoghon taudi titap tizila.
Malum to tiraara pa tisavag tamtoghon, nene taudi tiŋgudi muul.
 
16 Yoova iŋgagabiiz tamtoghon, ve ighurghur atia padi itaghon ŋgar deŋia moghon. Leso ipatooŋ tau padi ve tiwatagi.
Liis to ndiran samsamia tighuri, nene iliis taudi.
17 Ndiran samsamia ve ndug ndug to tipul muridi pa Maaron,
yes pale tisob timaat tizila ndug to mateeŋa.
 
18 Eemoghon yes mbolaaŋa to tirau mbeb eta maau, Maaron irau lolo imaagh padi maau.
Ve yes to timbadbaad pataŋani ve tighurghur matadi pa ulaaŋ to Maaron, ye irau ipul di tineep sami itaghoni taghoni ila ne maau. Pale iuul di.
19 Yoova, ughita. Tamtoghon sorok to taan tigham aghedi payom. Upul di tigham didiaaŋ malep. Utatan di tizi.
Upayoon yes ndug ndug ila matam, uŋgabiiz di, ve ughur atia padi.
 
20 O Yoova, ugham ŋgar eta padi.
Leso timatughez payom, ve tiwatag tighaze yes tamtoghon sorok to taan moghon.
Tapiridi irau ghom maau.