49
Iit tasob pale tamaat
Mbouŋ to yes Kora
1-2 Yam tamtoghon to ndug ndug, alooŋ saveeŋ tiou tonene.
Yam tamtoghon to aneep irau taan, aghur poian taliŋamim payau. Yam to lemim izamim maau, ve yam to izamim tintina ne paam.
Ve yam to mbaliiŋ taudi, ve yam mbolaaŋa paam.
Yam asob alooŋ aliŋag tonene.
3 Pasa, avog pale ivotia ŋgar popoia pida to tineep ila lolog ne.
Saveeŋ tiou tonene irau ipamundigin ŋgar tiam. Leso aghilaal ŋgar poia. Mbo 37:30
4 You naghaze nasavia saveeŋ palelaaŋ pida payam.
Le isob, ghoro narab gita, ve napaghazoŋan pughu payam.
5 Ighaze sawa samia eta ivot, ve ndiran samsamia toman ndiran kaaromŋa tiluvut ghou pa tiwaghamun ghou, nene irau namatughez maau. Mbo 23:4, 27:1
6 Onoon, yes tindoundou ledi mbeb katindi.
7-8 Eemoghon mbeb todi tonowen irau igham mulin di pa mateeŋ maau.
Pasa, tamtoghon eta irau ighol Maaron, leso ipaghau mateeŋ pani, ve nepooŋ toni to taan iseeŋga itaghoni ila ne maau.
Ŋgar tovene, tapuli ineeple.
Pasa nepooŋ tovene, atia ite kat. 1Pe 1:18+
9 Tovenen mbaliiŋ toit eta irau ipoon ghiit pa mateeŋ maau.
Mbeb eta to taan irau igham ghiit taneep le alok ne maau. Maau kat! Mt 16:26
10 Iit taghita yes ŋgara timatmaat tinimale yes kankanooŋa to ledi ŋgar maau ne.
Ve sawa to timaat, yes pale tipul mbeb todi tisob tizi tineep, ve mbeb tonowen tinim tamtoghon pida ledi.
11 Sawa to tineep matadi iyaryaar, yes izadi tintina. Pasa, ledi taan tiina ve mbeb katindi.
Eemoghon sawa to timaat, naal to inim ledi inadi irau sawa isob.
12 Tovenen ighaze tamtoghon eta iza tiina, ve le mbeb popoia katindi, nene poia.
Eemoghon mbeb toni irau ipaghau mateeŋ pani ne maau. Pale ineep rismoghon, ve isob.
Ye pale imaat ve ilale, inimale ŋgavuun ve ŋgai.
13 Nene ataam to yes to tigham ŋgar to borouŋa, ve tipakur di pa mbeb todi.
Aghita ŋgar to ivotvot padi ve yes to lolodi pa saveeŋ toman ŋgar todi, ghoro aghilaal. Lu 12:20
14 Yes tinimale sipsip to timbit di leso tirab di.
Mateeŋ pale inim ŋginiiŋ padi, ve iweu di tizila ndug to mateeŋa, ve patudi imbuuz tonowe.
Ve mboŋmaagh, ghoro ndiran deŋiadi pale tighita di, ve lolodi poia.
15 Eemoghon you, ndug to mateeŋa le tapiri irau ikis ghou maau.
Pasa, Maaron pale igham mulin ghou pa mateeŋ.
Pale ipas ghou navot pa mateeŋ, ve igham ghou nala yeru nineep. Mbo 56:13; 1Kor 15:51+; 1Tes 4:13+
16 Tovenen ighaze tamtoghon eta indou le mbaliiŋ,
ve mbeb popoia katindi tivon ila ruum toni, ugham ŋgar naol pani malep.
17 Pasa sawa to imaat, ye irau ikis mbeb toni eta ve ila ne maau.
18-19 Sawa to tamtoghon tonenen ineep mata iyaryaar, ye ineep pooi toman tini iza.
Ve ival tiina tipait iza pasa, tighita tighaze ye iraua.
Eemoghon ye pale imaat, ve ineep toman nditimbu ila ndoroom lolo.
Yes to ndug tonowen irau tighita ghazooŋa muul maau.
20 Tovenen tamtoghon to ighaze iza tiina ve le mbeb katindi, nene poia. Eemoghon ye ighilaal maau.
Muri, ye pale imaat ve ilale, raraate inimale ŋgavuun ve ŋgai.