56
Suŋuuŋ to tamtoghon to inumeer Maaron
Mbouŋ to David
Mbouŋ tonene iŋarua sawa to yes Pilistia tikis David izi ndug Gat. Aliŋa tovene: ‘Man mbaluuz to ineep ndug mala ve neneeŋa moghon.’
O Maaron, you mbesooŋa tiom. Lolom isamin ghou, ve uul ghou lak! Pasa, koiagŋa tinanaan ghou ne.
Mboŋ ve ndag, tamtoghon tizuaria di tighaze le titatan ghou.
 
Sawa isob, yes to tiŋgal saveeŋ payou ne, tighamgham lilin ghou tighaze tirab ghou namaat.
Yes to tighamgham malmal payou ne, ival kat.
Maaron, yom Maaron Tiina To Ulib Pa Ndimaronŋa Tisob.
Sawa to matughezaaŋ tiina igham ghou, you pale nanumeer ghom.
You napait Maaron pa saveeŋ mbuaaŋ toni, ve naghur ila toni ariaŋa.
Irau namatughez maau.
Pasa, tamtoghon to taan tapiridi ineep sine, leso tiwaghamun ghou? Maau. Mbo 27:1, 118:6; Ro 8:31; Hib 13:6
Saveeŋ tiou, nene poia. Eemoghon moghon moghon, to mboŋmaagh ila le rabrab izi, koiagŋa titortoor aliŋag muul inim saveeŋ samia.
Ve tikalkaal ataam tighaze le tiwaghamun ghou.
 
Tilup di, ve tindaŋgat ghou pa laghooŋ tiou,
ve tisasaŋan tighaze tirab ghou namaat. Mk 3:6
Maaron, pughu vena to upul ndiran samsamia tonowen tineep? Uyat ŋgar todi tonowen lak!
Upatooŋ mbalmbali tiom padi, ve utatan di. Leso tapiridi isob kat!
Yom uwatag: You nambaad pataŋani naol ve nataŋtaŋ.
Eemoghon pataŋani tiou tisob, yom umbood di ila rau tiom wa.
Ve naghaze matag suru paam, uwato ila ya paatu tiom, ve ughuri ineep.
Leso matam iŋgalŋgal ŋgar ve pataŋani to ivotvot payou ne.
 
Maaron, you nawatag: Yom uvolvool tiou.
Tovenen sawa to ighaze nataŋ roran ghom pa ulaaŋ,
yom pale uul ghou, ve ugham koiagŋa titoor di, ve tighau muul tila.
10-11 Tovenen you napait Maaron pa saveeŋ mbuaaŋ toni, ve naghur ila toni ariaŋa. Irau namatughez maau.
Pasa, tamtoghon to taan tapiridi ineep sine, leso tiwaghamun ghou? Maau. Mbo 27:1, 118:6; Ro 8:31; Hib 13:6
12 Maaron, you naghaze nagham watooŋrau payom itaghon saveeŋ mbuaaŋ tiou.
Pasa, yom uul ghou, ve ugham lolog poia kat.
Tovenen you pale nagham watooŋrau, ve napait ghom pa poia tiom.
 
13 Pasa, yom ugham mulin ghou pa mateeŋ, ve uul ghou le nalib pa koiagŋa.
Tauto yes irau tigham ghou natap maau.
Yom ugham tovene, leso naghilaal naghaze yom uneep toman ghou pa nepooŋ ve laghooŋ tiou, ve ghazooŋa tiom isul ghou ve naneep pooi.