118
Yes Israela tipait Maaron pa ulaaŋ to ye igham padi
1 Lolomim poia pa Yoova ve apaiti! Pasa, ye poia kat.
Lolo ineep tuŋia ila to tamtoghon toni ve iuluul di.
2 Yam ival tiina to Israel, alup avomim ve asaav aghaze:
“Ye lolo pa tamtoghon toni ve iuluul di.”
3 Ve yam to watooŋrau to avot ila to Aron ne paam, asaav aghaze:
“Ye lolo pa tamtoghon toni ve iuluul di.”
4 Tovenen yam to amatughez pa Yoova ve ataghon ŋgar toni, asob asaav aghaze: “Ye lolo pa tamtoghon toni ve iuluul di.”
5 Muuŋ, you naneep ila pataŋani tiina lolo ve leg ataam maau. Tovenen nataŋ roran Yoova pa ulaaŋ.
Ve ye ilooŋ aliŋag, ve ipas ghou navot pa pataŋani tiou. Tauto aazne, naneep ila ndug ghazooŋa.
6 Ighaze Yoova ineep digeg, you irau namatughez maau.
7 Yoova ivool tiou, ve iuluul ghou.
Ye pale itatan koiagŋa ila matag, ve nalib padi. 1Kor 15:57; 1Yo 5:4
8 Iit tanumeer tamtoghon to taan malep.
Tanumeer Yoova ve tayooŋ ila toni, ghoro poia.
9 Yes daba to tighamgham pooz ne paam, tanumeer di malep.
Tanumeer Yoova ve tayooŋ ila toni, ghoro poia.
10 Muuŋ, ndug ndug tinim tiluvut ghou tighaze tigham malmal payou.
Eemoghon Yoova ipalot ghou, tauto napasob di.
11 Tiŋarua ghou tinim, ve tiluvut ghou, le leg ataam eta pa naghau maau.
Eemoghon Yoova, tauto napasob di.
12 Yes timorau ghou tinimale ŋguruub.
Eemoghon Yoova ipalot ghou, tauto napasob di le tapiridi isob.
Yes tinimale yab to ighan reg ve iyaryaar, ve rikia moghon imaat.
13 Yes tipamundigin malmal payou, ve rismoghon tone titatan ghou.
Eemoghon Yoova iuul ghou, tauto tiwaghamun ghou maau.
14 Pasa, ye Volaaŋa tiou ariaŋa.
You naghamgham tapirig ila toni, ve ye inim sigeu payou.
Tauto nambou mbouŋ pa napait iza.
15 Alooŋ. Ndiran deŋiadi tinepneep ila mbeez todi todi, ve timboboob ve tipapait Yoova iza toman lolodi poia. Pasa, ye ilib pa koiadi wa.
Tisavsaav tighaze: “Yoova nima waan, nene pataŋani.
16 Nima iparab ariaŋa kat.
Ye igharaat tau pa malmal, ve iparab le ilib pa koia!”
17 You pale namaat sone. Pale naneep matag iyaryaar.
Leso navotia uraat tintina to Yoova ighamgham di.
18 Onoon, ye ilos katin ghou.
Eemoghon ipul ghou namaat maau. 1Kor 11:32; Hib 12:5
19 Tovenen akaak ataam to ndiran deŋiadi payou.
Leso nataghoni nalooŋ nala, ve napait Yoova pa ŋgar to ye igham payou.
20 Nene ataam to Yoova.
21 Yoova, yom ulooŋ suŋuuŋ tiou, ve ugham mulin ghou pa pataŋani tiou.
Tovenen lolog poia payom, ve napait ghom.
22 Yaam to yes to reiŋ ruum matadi velegini ve tipiyaava ilale,
tauto inim pughu pa ruum ve ipaloti. Leso ruum iyoon ariaŋa izala pogho. Mt 21:42; Mk 12:10+; Mbaŋ 4:11; 1Pe 2:7
23 Maaron tau igham mbeb tonene ivot.
Ve yei nighita inimale mbeb gharatooŋa eez ila matamai.
24 Ndag to aazne, Yoova ighuri.
Tovenen tiniid iza ve lolood poia pani. Pil 4:4
25 O Yoova, lolom isamin ghei, ve ugham mulin ghei!
Uul ghei, leso mbeb tisob tivot pooi payei.
26 Ŋgeu tonene inim pa Yoova iza. Tovenen poia to Yoova pale iza toni.
Yei to nineep ila Yoova rumai toni lolo, nighasoni nighaze ighur poia toni iza tiam. Lu 13:35, 19:38; Yo 12:13
27 Yoova, ye Maaron tau!
Ye igham poian ghiit, ve ghazooŋa toni isul ghiit.
Akis napatolo mbila ve ala aluvut artaal ve apaiti.
28 Yom Maaron tiou. You lolog poia payom, ve napait ghom pa poia tiom.
Onoon kat, yom to Maaron tiou. Tovenen you pale nait izam.
29 Lolomim poia pa Yoova, ve apaiti pa poia toni. Pasa, ye poia kat.
Ye lolo ineep tuŋia ila to tamtoghon toni ve iuluul di.