78
Maaron igham ŋgar popoia pa yes Israela. Eemoghon yes tizorzoor aliŋa
Mbouŋ to Asap
Yam tamtoghon tiou, aghur taliŋamim pa saveeŋ to naghaze napatoot gham pani.
Saveeŋ to naghaze nasavia payam, yam asob alooŋ poiani.
 
Pale avog ikaak, ve nasavia saveeŋ palelaaŋ pida payam.
Pale nasavia mbeb pida to muuŋ tivot. Mbeb tonowen, pughudi iyooŋ.
 
Kamos tonene, nditimbuud tisavia payei ve nilooŋa, tauto niwatagi.
 
Muuŋ, Yoova ipatooŋ tapiri ivot ighazooŋ.
Ye igham mbeb gharatooŋadi ve uraat tintina tivotvot.
Tauto tamtoghon tipait iza pa tapiri ve poia toni.
Uraat toni tonowen, irau taŋgooza pa ndinatuud maau. Tasavia padi, ghoro poia.
Leso papaghu toit to pale muri tivot, tiwatagi paam.
Ataam to itiŋa Maaron talup ghiit tanim ee moghon, muuŋ ye ivotia pa nditimbuud to Yakop papaghu toni.
Ye isavia tutuuŋ toni pa yes Israela, ve isaav ariaŋa pa nditimbuud ighaze tipatoot ndinatudi pani. Igham 10:2, 12:26+
 
Leso yes paam tiwatagi, ve anadi tisavia pa ndinatudi,
ve iseeŋga tovene itaghoni taghoni gha ila.
 
Ighaze tigham tovene, papaghu todi irau lolodi imaagh pa uraat tintina to Maaron igham di ne maau.
Ve yes pale tinumeera, ve matadi iŋgal tutuuŋ toni, ve titaghoni.
 
Leso tigham ŋgar inimale nditimbudi sob.
Pasa nditimbudi, ŋgar todi iyaryaaŋ kat. Lolodi pa titoor ŋgar todi maau. Moghon moghon tighamgham didiaaŋ, ve tizorzoor Maaron aliŋa.
Lolodi ineep tuŋia ila toni maau.
Ve saveeŋ to yesŋa Maaron timbua, titaghoni maau.
Papaghu to Epraim, yes tiraua kat pa tivaneg pa pane.
Eemoghon sawa to malmal imundig, timatughez ve tighau.
 
10 Ve saveeŋ to yesŋa Maaron timbua, matadi kisini ve titaghoni maau.
Laghooŋ todi, lolodi pa titaghon tutuuŋ toni maau.
 
11 Ve uraat tintina toman mbeb gharatooŋadi to muuŋ Maaron ighamgham di ila matadi, lolodi imaagh pani kat.
12 Sawa to nditimbudi tineep izi Isip, Maaron igham mbeb gharatooŋadi tintina izi taan raapa to Zoan, ve tighita pa taudi matadi.
 
13 Ve sawa to tila tivot izi Te Kaviaaŋa, ye ivalag te le pida ila pa ŋas, ve pida ila pa waan.
Ye igham te iyoon inimale didiiŋ.
Tauto ataam ivot padi, ve titaghoni tivool tila pa dige ite.
 
14 Ndag, ye igham yaghur tae ivot, leso ipatooŋ di pa ataam.
Ve mboŋ, ye igham yab ivot, leso imuuŋ padi ve titaghoni. Igham 13:21; Mbo 105:39
 
15 Sawa to tineep izi ndug balim, Maaron irab balagin yaam, ve igham ya ireer ivot pani.
Ye igham ya ireer tiina, leso tighun. Igham 17:6; 1Kor 10:4
 
16 Onoon kat, ye igham ya katindi tivot ila yaam, ve tireer tizi le tinim ya tintina.
17 Eemoghon yes tinoknok ghamuuŋ sosor pa Maaron Tiina To Ilib Pa Ndimaronŋa Tisob.
Sawa to tilaghlaagh izi ndug balim, tizorzoor aliŋa.
 
18 Yes titovtoov Maaron tapiri.
Tauto tisaav pani tighaze igham adi aniiŋ to luadi itaŋtaŋ pani. Igham 16:3, 17:2; 1Kor 10:9; Hib 3:16
 
19-20 Ve tiveleg Maaron tighaze:
“Laak, Maaron tapiri irau igham amai aniiŋ izi ndug balim tonene?
Onoon, ye irab balagin yaam, ve ya tiina goŋia ivot toman tapiri, ve ireer izi.
Eemoghon irau igham tamtoghon toni adi aniiŋ toman ziga?”
21 Yoova ilooŋ saveeŋ todi tonowen, le ipas ate.
Tovenen igham yab izi ighan Yakop papaghu toni.
Ate yabyab kat pa yes Israela, ve iwaghamun di.
 
22 Pasa, yes tighur ila toni maau.
Tinumeera tighaze tapiri irau iuul di ne maau. Hib 3:19
23 Tovenen Maaron isaav ariaŋa,
ve ataam to sambam paroŋania ikaak,
 
24 ve igham aniiŋ manna izi padi.
Ye igham aniiŋ to sambam padi leso tighan. Igham 16:4; Yo 6:31; 1Kor 10:3
 
25 Onoon kat, tamtoghon tighan aniiŋ to yes aŋela.
Maaron igham adi aniiŋ katindi, ve tighan le isooŋ di.
 
26 Ghoro ipamundigin yaghur ghaughauru inim.
Tau tapiri igham yaghur tiina imundig pa rag pughu.
 
27 Ve igham man katindi tiroov tinim, ve titaptap tizi ndug to tinepneep pani.
Man tonowen, sorok maau. Yes tinimale magargaar to naari. Igham 16:13
 
28 Maaron igham di titaptap tizi ndug to tamtoghon toni tinepneep pani, le tiluvut mbeez todi.
 
29 Tovenen yes Israela tighan le isooŋ di.
Pasa, mbeb to luadi itaŋ pani, tauto ye igham padi.
 
30-31 Yes Israela tipasob ghanuuŋ man tonowen sone,
ve Maaron mbalmbali toni iza todi, ve irab tamtoghon todi ariaŋadi timatmaat.
Ndipain todi papaghu to popoiadi kat, ye ipasob di.
32 Yes Israela tighita mbeb tisob tonowen. Eemoghon tinoknok ghamuuŋ sosor sone.
Tikaria ghitooŋ mbeb gharatooŋadi. Eemoghon tighur ila to Maaron maau.
 
33 Tauto ye iŋgor sawa todi inim tuku.
Nepooŋ todi isob rikia moghon, inimale yaghuraad to ivotvot ila avood.
Mateeŋ ikarmotin di, le matughezaaŋ tiina igham di.
 
34 Onoon, sawa to Maaron irab tamtoghon todi pida, rikia moghon ve ival tiina tighilaal, ve titoor ŋgar todi imuul ila pani,
ve tisuŋ pani ariaŋa tighaze lolo isamin di ve ireu sosor todi.
 
35 Ve matadi iŋgal muul tighaze: Maaron, ye iponpoon di inimale raŋ to izala kat.
Maaron Tiina To Ilib Pa Ndimaronŋa Tisob, ye to Volaaŋa todi.
 
36 Eemoghon tipaiti pa avodi uli moghon.
Saveeŋ to ivotvot ila avodi, tisavia toman lolodi maau. Tigham kaarom.
 
37 Lolodi ineep tuŋia ila to Maaron maau.
Ve saveeŋ to yesŋa Maaron timbua, matadi kisini ve titaghoni maau.
38 Eemoghon Maaron lolo isasamin di, ve ireureu sosor todi. Tauto iwaghamun di kat maau.
Onoon, sawa naol, ye ate yabyab padi kat.
Eemoghon iyai tau, ve itatan mbalmbali toni. Igham 34:6
 
39 Pasa, mata iŋgal ighaze: Yes to taan moghon. Tapiridi tintina maau.
Tineep ris, ve tilaledi, tinimale yaghur to talooŋ avolutu inim, ve isob.
40 Sawa to tineep izi ndug balim, tizoor Maaron aliŋa pae katindi.
Yes tilaghlaagh ila ndug to magargaar moghon, ve tighamgham Maaron lolo ipataŋan.
 
41 Maaron Patabuaŋ to yes Israela, yes tinoknok tovaaŋi.
Tauto tipas ate, le ate yabyab kat. Igham 17:2
 
42 Yes lolodi imaghmaagh pa Maaron tapiri.
Matadi iŋgal sawa to ye igham mulin di ila koiadi nimadi ne maau.
43 Muuŋ, ye igham mbeb gharatooŋadi katindi tivotvot izi Isip pa ipatooŋ tapiri padi.
Ye igham uraat tintina izi taan raapa to Zoan. Uraat tonowen, tamtoghon tighita di le avodi ikaak. Igham 10:1
 
44 Ye itoor ya tintina to yes Isipa tinim siŋ.
Tovenen yes Isipa adi ya eta pa tighun maau. Igham 7:20
 
45 Ve igham raaŋ tintina to tiŋutŋut tamtoghon tivot izi ndug todi, ve tiŋut di le tisami kat.
Ve igham ŋgob katindi tivot le tiwaghamun di paam. Igham 8:2,6
 
46 Ve igham isis tivot le titatab ndug todi, ve tighan aniiŋ todi.
Uum to tighun wadedeŋadi pani, isis tighan mbeb to uum tonowen le tisob. Igham 10:13
 
47 Ve ye igham ais patu patu titaptap tizi, le tiwaghamun ai vaen todi.
Ve uman tiina toman ais izi le iwaghamun ai fik todi paam. Igham 9:23+
 
48 Ye igham ais patu patu titaptap tizi, ve tirabrab makau todi timatmaat.
Ve igham lalaav iŋgalŋgal sipsip todi.
 
49-50 Maaron ate yabyab le yabyab kat.
Toni imozi kat. Ate irau izi muul maau.
Tauto ighurghur yes Isipa muul maau, ve mbalmbali toni iza todi kat.
Ye imbaaŋ aŋela toni ival tila tiwaghamun di pa moroghooŋ samia. Igham 15:7; 1Kor 10:10
 
51 Ye irab yes Isipa ndinatudi aidaba, le tisob timatmaat.
Ndinatudi to tipoop di muuŋ, tauto tisob. Eta ineep muul maau. Igham 12:12
52 Ghoro igham tamtoghon toni tipul Isip.
Ye imuuŋ padi inimale ŋginiiŋ to sipsip, ve yesŋa tilaghlaagh izi ndug balim.
 
53 Ye imuŋmuuŋ padi ve iŋginŋgin di. Tovenen timatughez pa mbeb eta maau, ve tineep poia moghon.
Eemoghon koiadi, te itatab di, le tisob timatmaat ila te lolo. Igham 14:19,28, 15:7
54 Ye igham di tila tigharau taan toni patabuaŋ dige, ve lolooz to ye iparab pani ve ighami inim le. Igham 15:13,17
 
55 Ve indiir ndug ndug to tineep izi taan tonowen tighau tila,
leso tamtoghon toni tila tigham taan todi inim ledi.
Ve irei taan tonowen toman ruum to tineep ila, le irau rumai rumai to yes Israela, ve tighami inim ledi, leso tineep pani. Mbaŋ 13:19
56-57 Eemoghon tizi ve titoov Maaron Tiina To Ilib Pa Ndimaronŋa Tisob Ne muul.
Tizorzoor aliŋa, ve ataam to ye ighuri padi, yes titaghoni maau.
Yes tamtoghon toni. Eemoghon tipul muridi pani, ve tireu saveeŋ mbuaaŋ to timbua toman Maaron, tinimale nditimbudi.
Tovenen ye irau inumeer di maau. Yes tinimale pane to ool ipas pani, ve le uraata maau.
 
58 Maaron iriu di pasa, tighagharaat maaron kaaromŋa anunudi.
Yes tiluplup di izala ndug mbuŋa to naol ne, ve tisuŋsuŋ pa maaron kaaromŋa. Tauto tipas Maaron ate.
59 Maaron ighita ŋgar todi tonowen, yabyab ve ipul muri padi kat.
 
60 Sawa tonenen, ye ipul mbeez toni patabuaŋ to ineep izi ndug Silo, izi ineeple.
Ina to nepooŋ to ineep ila tamtoghon toni lolodi, ye ineep ila muul maau.
 
61 Ve Bokis to Saveeŋ Mbuaaŋ to inim ghilalooŋ pa tapiri ve ŋguruba, ye ipuli ila yes Israela koiadi nimadi. 1Sam 4:4+
 
62-63 Ate yabyab kat pa tamtoghon toni.
Tovenen ipul di tila koiadi nimadi, ve timbut di pa buza le geegeu todi papaghu timatmaat.
Ndiliva todi papaghu irau timbou mbouŋ to vaiuuŋ muul maau. Pasa, nditamoot tineep ve tivai di muul maau.
 
64 Ndiran to watooŋrau paam, buza ighan di timatmaat.
Ve ndizwadi ndiliva to tineep tinim ndinaara, irau titaŋ padi maau.
65 Ghoro Maaron igham ŋgar inimale tamtoghon to igheen ve imundig.
Ye inimale tamtoghon ariaŋa to malmal to ighun le iwaghamgham. Ghoro mata pakia, ve imundig ila igham malmal muul.
 
66 Ye itatan koia, ve mayadi ve tighau tila.
Mayaŋiiŋa tonowen pale inepneep tovene itaghoni taghoni gha ila.
67 Maaron ipul muri pa Yosep papaghu toni. Ve ina to nepooŋ paam, ineep toman di muul maau.
Irau igham yes Epraima pa uraat tiina eta muul maau.
 
68 Ve isia rumai to Yuda, leso tigham pooz pa tamtoghon toni.
Ve igham lolooz Zion inim le.
Lolooz tonowen, ye lolo pani kat.
 
69 Ye irei rumai toni patabuaŋ izala, leso inim ina to nepooŋ.
Rumai tonowen iyaryaaŋ kat inimale sambam.
Pale iyoon tuŋia tovene itaghoni taghoni gha ila, inimale taan to ye ighuri.
70 Ve isia mbesooŋa toni David inim kinik.
David iŋginŋgin sipsip ila sirsiir lolo, ve Maaron ighami pa uraat toni. 1Sam 16:11+
 
71 Ye mata pa sipsip nditinandi toman ndinatudi to tighunghun tuz, ve Maaron ighami inim ŋginiiŋ pa yes Israela to Yakop papaghu toni.
 
72 Tovenen David iŋgin di itaghon ŋgar deŋia, ve igham pooz padi pooi. Mt 2:6; Yo 10:11