105
Maaron mata iŋgalŋgal tamtoghon toni Israela
Apait Yoova pa poia toni, ve avotia iza tiina.
Asavia ŋgar to ye ighamghami irau ndug ndug, leso tiwatagi.
 
Ambou pani. Ambou ve apaiti.
avotia uraat toni gharatooŋadi to naol ne. Uraat tonowen, ite kat.
 
Yoova, ye iza patabuaŋ. Apaiti toman lolomim poia.
Yes to tizuaria di pani, nene pale lolodi poia kat ve tinidi iza.
 
Suŋuuŋ tiam iŋarua Yoova. Leso ipalot gham pa tapiri.
Azuaria gham pa ala aneep tomani irau sawa isob.
 
5-6 Yam to avot ila to Maaron mbesooŋa toni Abaram,
yam siŋ to Yakop to Maaron isia gham anim le,
matamim iŋgal mbeb gharatooŋadi ve uraat tintina to Yoova ighamgham di. Uraat toni tonowen ite kat.
Ve matamim iŋgal sawa naol to ye iŋgabiiz tamtoghon, ve ighur atia padi.
Yoova eŋgeni to Maaron toit.
Uraat to gabizooŋ tamtoghon ve ghuruuŋ atia padi, nene ye ipatooŋa irau taan isob.
 
Moghon moghon, mata iŋgalŋgal saveeŋ mbuaaŋ toni, ve itataghoni.
Tutuuŋ to Maaron isavia, pale iyaryaaŋ tovene, ve anoŋa ivotvot itaghoni taghoni gha ila. Mbo 106:45, 111:5
Muuŋ, ye imbua saveeŋ toman Abaram ighaze yesuru tilup di tinim ee moghon.
Ghoro ipariaaŋ saveeŋ mbuaaŋ tonowen ila to Isak le iyaryaaŋ kat. Mbnp 15:18, 17:2+, 26:3; Lu 1:54+; Hib 6:14+
 
10-11 Muri ghoro, ipariaaŋ saveeŋ tonenen muul ila to Yakop
ighaze saveeŋ tonenen pale iyaryaaŋ tovene itaghoni taghoni gha ila.
Ve isaav pa Yakop ighaze: “You pale nagham taan Kanaan inim lem.
Taan tonanan pale inim yamŋa papaghu tiom lemim kat.” Mbnp 28:13+, 35:12
12 Sawa tonenen, yes ival maau.
Yes rismoghon. Ve tineep tinim loomba pa taan tonene.
 
13 Laghooŋ todi, titaghon ŋgar tovene: Tineep ris izi ndug eez, ghoro timundig muul, ve tila tineep izi ndug ite.
Tila tivot ndug to kinik eez ve tineep toman di. Le isob, ghoro tipul di, ve tila tivot to kinik ite, ve tineep toman di.
 
14-15 Laghooŋ todi, nene Maaron tau iŋgini.
Ye ipul tamtoghon to ndug eta titatan di, ve tigham samin di ne maau.
Ye mata iŋgalŋgal di, tauto iyaan kinik pida ighaze:
“Yes to nasia di ve naghur di tinim uraata tiou, ambuul di malep!
You naghur di tinim propet tiou. Tovenen awaghamun di malep.” Mbnp 12:17, 20:3+
16 Muri ghoro Yoova igham pitool tiina ivot izi taan Kanaan.
Sawa tonenen, Yakop yesŋa ndinatu adi aniiŋ maau kat.
 
17 Eemoghon Yoova imbaaŋ todi eez imuuŋ padi ila Isip.
Nene Yosep to tigholia ila, ve inim mbesooŋa sorok. Mbnp 37:27+, 45:5
 
18 Yes Isipa tighuri ilooŋ ila ruum to yabyabuuŋ,
ve tikau aghe pa sen, ve tighur ain liliita ila lua. Mbnp 39:20
 
19 Yoova itovtoov Yosep tovene, le Yosep ivotia mbeb pida pa yes Isipa, ve saveeŋ toni anoŋa ivot.
Tovenen saveeŋ to Yoova isavia pani, nene ipaghazoŋan Yosep ighaze ye igham sosor maau, ve ŋgar toni deŋia.
 
20 Ghoro kinik to yes Isipa to iŋgin ndug naol, imbaaŋ ila ighaze tipul Yosep ivot pa ruum to yabyabuuŋ.
 
21 Ve ighur Yosep inim daba to yes Isipa, ve ipul ruum toni toman mbeb toni tisob ila ye nima, leso iŋgin di. Mbnp 41:40
 
22 Tauto Yosep inim daba pa yes to tighamgham uraat pa kinik.
Ye ipatoot yes uraata to tiuluul kinik pa ŋgar, ve ipatooŋ di pa ŋgar poia.
 
23 Ataam tonene to yes Israela to siŋ to Yakop tila tivot izi Isip,
ve tineep tinim loomba izi taan to Ham. Mbnp 46:1+
24 Yoova ipapalot di, tauto tivot tinim ival, le tapiridi ilib pa koiadi. Igham 1:7
 
25 Ghoro ye itoor ŋgar to yes Isipa, ve tighur koi pa tamtoghon toni.
Tovenen tikaal ataam pa titombaan mbesooŋa toni ve tigham samin di.
26 Tauto Yoova imbaaŋ mbesooŋa toni ru, Mose ve Aron, leso tiuul yes Israela.
Aron tonene, Yoova tau ighuri pa igham uraat toni. Igham 3:10, 4:16
 
27 Maaron ighaze ipatooŋ tapiri pa yes Isipa. Tauto ipalot Mose yesuru Aron, ve tigham mbeb gharatooŋadi naol ve uraat tintina ila yes Isipa lolodi. Uraat to ivot izi taan to Ham, nene ite kat. Igham 7:9+
28 Yoova igham ndoroom tiina ighamun taan to yes Isipa.
Pasa, yes tizoor aliŋa, ve tiŋguruut tamtoghon toni. Igham 10:22
 
29 Ve itoor ya todi tisob tinim siŋ,
le iigh tisob timatmaat. Igham 7:19+
 
30 Ghoro igham ŋgob ndiŋndiŋ ndiŋndiŋ tivot le tineep irau taan isob to yes Isipa.
Ruum lolo to kinik tau, nene ivon pa ŋgob paam. Igham 8:2
 
31 Ve Yoova isaav, ve raaŋ tintina toman suum katindi tivot, le tirau taan to yes Isipa. Igham 8:17
 
32 Ve sawa to uman ighaze izi, uman izi maau. Yoova igham ais patu patu titaptap tizi le tiwaghamun ndug todi.
Ve igham ndug milia, ve lalaav kiliŋkiliŋia irau taan todi isob. Igham 9:23+
 
33 Tauto iwaghamun ai vaen toman ai fik todi,
ve iŋgal ai pida tipolpol paam.
 
34 Ghoro isaav, ve isis tivot le katindi kat. Tanin di, pale taraua maau. Igham 10:12+
 
35 Ve tighan aniiŋ to yes Isipa tivazog di ne raua toman mbeb pida to titub ila taan todi, le isob kat.
 
36 Muri ghoro, Yoova irab ndinatudi aidaba timatmaat irau taan todi isob.
Ndinatudi to tipoop di muuŋ, tauto tisob. Igham 12:29
37 Ghoro Yoova igham yes Israela tipul Isip, ve tivot tila.
Sawa to timundig, tiyou gol to yes Isipa toman silva todi, ve tila tomani.
Ve laghooŋ todi, tiwasiiŋ moghon. Todi eta tapiri isob ve itap ne maau. Igham 12:35
 
38 Sawa to yes Israela tipul Isip ve tila, yes Isipa lolodi poia kat.
Pasa, yes Israela to tinim pughu pa pataŋani to ivotvot padi. Tauto matughezaaŋ tiina igham di.
39 Ndag, Yoova igham yaghur tae ivot, ve ipoon ndag mata pa yes Israela.
Ve mboŋ, ye igham yab ighan, le isul ndug. Igham 13:21
 
40 Sawa to tighasoni pa adi aniiŋ, ye igham man kayau katindi tivot, ve igham aniiŋ tiina ineep sambam ve izi inim padi.
Tovenen tighami ve tighan le apodi isuŋ. Igham 16:13+
 
41 Yoova igham yaam ivavaal le avo ikaak, ve ya goŋia ivot.
Ya tonowen ireer tiina izi ndug balim to le ya maau. Igham 17:6; 1Kor 10:4
 
42 Yoova igham mbeb naol tonenen pasa, mata iŋgalŋgal saveeŋ toni patabuaŋ to imbua toman mbesooŋa toni Abaram.
43 Tovenen Yoova ighereb tamtoghon toni Israel to ye tau isia di ne, ve tipul Isip.
Timboumbou ve tilolool toman lolodi poia ve tila.
 
44 Muri ghoro, ye igham taan to ndug pida padi.
Tovenen ndug tonowen uraat todi anoŋa, inimale ruum, uum, ai, ve mbeb todi pida paam, tauto tisob tinim yes Israela ledi.
45 Yoova igham tovene padi, leso tikis saveeŋ toni tuŋia,
ve matadi kisin tutuuŋ toni ve titaghoni.
Aleluia! Tapait Yoova!