104
Maaron igharaat mbeb naol naol, ve iŋginŋgin di
1-2 You nasaav pa taug naghaze you irau napait Yoova pa poia toni.
O Yoova, Maaron tiou, yom izam tiina kat.
Tapirim tiina toman ŋgurubam to izam tiina pani, nene ipambood ghom inimale nonogiiŋa to yes kinik. 1Tim 6:16
Muuŋ kat, yom ugharaat sambam paroŋania inim inam to nepooŋ inimale moogh guduuŋ to tamtoghon tiraava leso tineep ila paroŋania.
3 Ve upayoon ruum tiom izala ya to ineep izala tata pogho.
Yom ugham yaghur tae inim lem karis, leso uyoon izala pogho ve ulaan pani.
Tovenen yaghur imbaad ghom, ve ughaughau ila sambam paroŋania.
4 Yom ugham yaghur inim lem mbaŋooŋa.
Ve yab yama, nene inim lem mbesooŋa. * Yab yama tonene, ŋgara pida tighaze nene iza to lalaav milia. Ve pida tighaze nene iza to aŋela pida to ghitoŋadi inimale yab yama. Muuŋ, Isaia ighita aŋela tovene (Is 6:2). Hib 1:7
5 Muuŋ, yom ughur taan iyoon tuŋia izala pughu.
Tauto irau induur maau. Inepneep tovene.
6 Sawa tonenen, ugham te itatab taan toman lolooz tisob.
7 Ghoro aliŋam iza, ve uyaan te ve ighau.
Aliŋam tapiri tiina inimale lalaav avolutu.
Tauto te ilooŋ ghom, ve rikia moghon ighau ila ilupi ila dige eez, ve taan peria. Mbnp 1:9-10
8 Tovenen te imaak, ve lolooz peria, ve imaak izi izi le ndug rapadi peria paam.
Tauto aazne, ya ve te tineep ila inadi inadi to taum ughur di padi.
9 Ve yom ughur ŋgat pa te ve taan.
Leso te itatab taan ve ireu ndug muul sob.
Ŋgat tonowen, te irau imalaaŋ pani maau. Mbnp 9:15
10 Yom ugham ya tivot ila taan saambu to tineep taghon lolooz digedi,
ve tireer taghon ndariri tizila pa ŋgoloop.
11 Ya tonowen tineep, leso mbeb naol naol to su tighun.
Esele sagsagŋa paam. Ighaze murun di, nene pale tighun le isooŋ di.
12 Man tirei rumadi izala ai to tiyoon ila ya digedi ne bogadi, ve tineep ila ve titaŋtaŋ.
13 Yom uneep ila inam to sala we, ve ugham uman izizi ila lolooz.
Uraat tiom tonenen, tauto igham taan ŋgoreeŋa ivot ve mbeb popoia naol titub pooi.
14 Yom ugham kikiliiŋ itub, leso makau, sipsip ve mbeb pida paam tighan.
Ve ughur mbeb naol pa tiuul tamtoghon paam. Leso tivazog di ve tigham uraat padi.
Yom ugham aniiŋ anoŋa ivotvot ila taan. Mbnp 1:11
15 Ve ughur ai vaen, leso tamtoghon tigharaata ve tighun suru, ve igham di lolodi poia.
Ve ugham ai oliv padi paam. Leso tigham ŋgoreeŋa, ve timusil tinidi ve naghodi pani, le milmilia.
Ve ugham aniiŋ naol naol padi, leso tighan di ve ipalot di.
16 Yoova, ai tiom mendepur to uvazog di izi Lebanon,
yom uŋgin di pooi, ve ugham uman izizi padi. Tauto aazne tiza tinim tintina.
17 Ai tonowen, man tirei rumadi izala bogadi.
Ve man ŋgau, ghoro tighagharaat rumadi ila ai to tinimale yar ne bogadi.
18 Lolooz mamala dabadi, nene mekmek sagsagŋa inadi to nepooŋ.
Ve mbeb pida tinimale namaiva ve uzuuv ma venen, nene tiyoŋyooŋ ilooŋ ila yaam tintina lolodi izala lolooz.
19 Yom ughur kaiyo inim iŋgat pa sawa to ndaman.
Ve ndag, nene iwatag sawa sine to iza, ve sawa sine to izila.
20 Yom ugham mboŋ izi le ndug ndoroom, leso mbeb sagsagŋa to su tilaagh.
21 Tovenen laion papaghu tilaghlaagh ve titaŋtaŋ, ve tikalkaal adi mbeb pa tighan.
Ve Maaron tau igham padi.
22 Sawa to ndag iza, ghoro timuul tila pa inadi to ghenooŋ, ve tizi tineep.
23 Ghoro tamtoghon anadi tivot tila pa tigham uraat.
Tighamgham uraat ila ila le rabrab izi.
24 O Yoova, yom ughur mbeb naol naol.
Ve mbeb tisob to yom ugharaat di, tipatooŋ ghom tighaze ŋgar tiom tiina le tiina kat.
Taan ivon kat pa mbeb ndiŋndiŋ ndiŋndiŋ to yom ugharaat di.
25 Ve nagham ŋgar pa te paam. Nene tiina kat.
Ve mbeb ndiŋndiŋ ndiŋndiŋ to matadi iyaryaar tineep ila lolo. Pida tintina, ve pida geegeu.
Mbeb tonowen, tanin di, pale taraua maau.
26 Waaŋ tiravraav ila te pogho,
ilaghlaagh ila te lolo. Mbeb tonowen, tiina le tiina kat. Muuŋ kat, yom ugharaata, leso imomogheer ila te.
27 Mbeb naol tonowen tighurghur matadi payom pa ugham adi aniiŋ.
Sawa to pitool di, yom taum upanpan di.
28 Yes tineep ila nimam.
Ighaze ugham aniiŋ padi, yes pale tighami.
Ighaze ukaak nimam pa upan di, pale tighan mbeb popoia le apodi isuŋ. Mt 6:26
29 Ve ighaze uŋgooz matam padi,
nene pale timatughez, ve tiwaghamgham.
Ve ighaze upas avuvudi ighau,
nene pale timatmaat le tinim ghavuur muul.
30 Mbeb naol to tineep izi taan ne, yom uvib Avuvum ila padi, tauto tineep matadi iyaryaar.
Ve sawa to timaat, yom ugham papaghu todi tivot izi taan, leso tigham inadi.
31 Yoova iza tiina pale ineep itaghoni taghoni gha ila.
Ve ye lolo poia pa mbeb naol to ye igharaat di.
32 Ye tapiri tiina kat.
Ighaze mata izi pa taan, nene pale taan irur.
Ve ighaze itut lolooz eta, nene pale yab ighan lolooz tonenen.
33 Tovenen sawa to naneep matag iyaryaar, you pale nambou ve napait Yoova.
Pale lolog poia pani, ve napaiti ila mbouŋ ila ila le nepooŋ tiou to taan isob.
34 Yoova igham ghou lolog poia kat.
Tovenen sawa to nanepneep ve naghamgham ŋgar pani, naghaze ye ighita ghou, ve lolo poia pa ŋgar tiou.
35 Eemoghon ndiran samsamiadi to tighamgham sosor ila Yoova mata, poia pa ye ipasob di pa taan ve tilaledi.
Ve you, ghoro nasaav pa taug naghaze you irau napait Yoova pa poia toni.
Aleluia! Tapait Yoova!
*104:4: Yab yama tonene, ŋgara pida tighaze nene iza to lalaav milia. Ve pida tighaze nene iza to aŋela pida to ghitoŋadi inimale yab yama. Muuŋ, Isaia ighita aŋela tovene (Is 6:2).
†104:26: Yes Kanaana ve Babilona ledi vuvuaaŋ pida to isaav tovene: Mbeb samia eez ineep ila te lolo. Tiwaat iza tighaze ‘Leviatan.’ Mbeb tonowen tiina le tiina kat, ve tapiri paam tiina kat. Tovenen yes Babilona ve Kanaana timatughez pani. Ve tighaze muuŋ kat, Leviatan iparab toman Maaron, ve ipazaagh te le ireu ndug. Eemoghon Maaron ilib pani ve itatani, tauto aazne mbeb naol tineep pooi. Ŋgeu to imbood mbouŋ tonene, iveleg vuvuaaŋ todi tonowen ighaze mbeb tonenen, Maaron ighita ighaze tiina maau. Nene mbeb sorok to imomogheer ila te lolo.