108
Ŋgeu eez ipait Maaron ve ipoii pa ulaaŋ
Mbouŋ to David
Maaron, lolog ru payom maau.
Lolog ineep tuŋia ilat tiom, ve naghur ilat tiom ariaŋa.
Tovenen nasaav pa taug naghaze: “Umundig ve umbou pa upait Maaron.”
 
Lolog naghaze ndugitun, ghoro namundig ve nagharaat taug,
ve napambar ambam ve narab gita ila ila le ndag pusukia iza.
 
Tiina tiou, you pale napait ghom pa poia tiom ila tamtoghon to ndug ndug matadi.
Pale yeiŋa tamtoghon to ndug naol nilup ghei pa suŋuuŋ, ve nait mbouŋ pa napait ghom.
 
O Yoova, lolom ineep tuŋia ila to tamtoghon tiom ve uluul di.
Ŋgar tiom tonanan, tiina le tiina kat. Izala izala le ikis sambam.
Ve ŋgar to taghoniiŋ saveeŋ mbuaaŋ tiom tovene paam. Izala le ikis yaghur tae. Mbo 36:5
Maaron, ival tiina pale tipait izam izala le izala kat, ilib pa sambam paroŋania.
Ve tipakur ghom pa tapirim ve poia tiom irau taan isob!
 
Maaron, yei tamtoghon tiom. Yom lolom tiei kat.
Ulooŋ suŋuuŋ tiou tonene, ve upatooŋ tapirim ve uul ghei.
Ugham mulin ghei pa pataŋani tonene.
Muuŋ, Maaron ineep izi ndug toni patabuaŋ, ve isaav ighaze:
“You naparab le nalib pa koiagŋa wa.
Tauto lolog poia ve navalag taan Sekem ve taan raapa to Sukot, ve nareii irau tamtoghon tiou.
 
Taan suruvu to Gileat, ve taan to yes Manase paam, nene you tiou.
Yes Epraima tinimale hat ariaŋa to ipoon dabag pa malmal.
Ve yes Yuda tinimale titi to nakisi inim ghilalooŋ pa pooz tiou.
 
Taan suruvu to Moap, nene inimale oon tiou to ririwaaŋ.
Ve taan suruvu to Edom, nene ndug to napiyaav duduuŋa to agheg pani.
Ve yes Pilistia, you naparab toman di le nalib padi. Tauto lolog poia ve aliŋag iza.”
10 Sei irau igham ghou nalib pa koiagŋa ve nalooŋ nala ndug todi to didiiŋ ariaŋa iluvuti ne?
Sei pale imuuŋ payou, ve ighereb ghou nala navot taan suruvu to yes Edoma?
 
11 Ite paam maau. Yom moghon.
Eemoghon Maaron, aazne yom ughur murim payei, ve unum toman ndaaba tiei muul maau.
12 Maaron, uul ghei. Leso nilib pa koiamai.
Pasa, ulaaŋ to nighamghami ila to tamtoghon, nene anoŋa maau.
 
13 Eemoghon ighaze Maaron inim toman ghei, nene pale nilib padi.
Ye irau itatan di, le tapiridi isob kat.