116
Ŋgeu eez ipait Maaron pa ulaaŋ toni
1-2 You lolog pa Yoova kat pasa, ye ilooŋ taŋiiz tiou.
You nataŋ rorani pa ulaaŋ, ve ye ighur taliŋa payou, ve iuul ghou.
Tovenen sawa to naneep izi taan, suŋuuŋ tiou pale iŋarua irau sawa isob.
3 Liis to mateeŋ, rismoghon tone igham ghou.
Ravraav to mateeŋ ikau ghou, ve ighaze ighereb ghou nazila ndug to mateeŋa.
Tovenen igham lolog ipataŋan, ve matughezaaŋ tiina igham ghou.
4 Tauto nataŋ roran Yoova naghaze: “O Yoova, paam namaat. Uul ghou lak!”
5 Yoova lolo isasamin ghiit, ve ighamgham poian ghiit.
Ŋgar toni, nene deŋia moghon.
6 Yes to irau tiuul taudi maau, Yoova tau iŋgin di, ve iuluul di.
Inimale you. Sawa to pataŋani itatan ghou le tapirig isob, ye inim ve igham mulin ghou.
7 Tauto aazne, ateg izi ve lolog poia muul.
Pasa, Yoova igham poian ghou kat.
8-9 Onoon kat, ye igham mulin ghou pa mateeŋ, ve ipasob taŋiiz tiou.
Ve ye to ikiskis ghou.
Tauto natap maau, ve aazne naneep matag iyaryaar.
Ve laghooŋ tiou, nazuaria ghou naghaze le nataghon ŋgar to deŋia moghon ila Yoova mata.
10 Muuŋ, you nasaav pa taug naghaze: “Pataŋani tiina igham ghou le naneep sami.”
Eemoghon nakis ghurla tiou tuŋia.
11 Pataŋani tonowen igham ghou le nakaal ataam. Tovenen napiyaav saveeŋ sorok naghaze: “Tamtoghon tisob, avodi kaarom moghon. Irau nanumeer eta maau.” Ro 3:4
12 Pale nagham sa pa Yoova, leso nayat ŋgar popoia naol to ye igham payou ne?
13 You pale nagham rubruub vaen, ve naliŋi izala watooŋrau tiou pogho pa napaiti, ve nasuŋ pani toman lolog poia.
Pasa, ye igham mulin ghou pa pataŋani tiou.
14 Tovenen sawa to Yoova tamtoghon toni tilup di pa suŋuuŋ, you pale nataghon saveeŋ to nambua tomani, ve nagham uraata ila matadi. Mbo 22:25, 66:13
15 Yes to lolodi ineep tuŋia ila to Yoova ve titaghon ataam toni, ye lolo padi kat.
Tovenen ye irau ighita mateeŋ to todi eta inimale mbeb sorok ne maau. Mbo 72:14
16 O Yoova, you mbesooŋa tiom.
Nambesmbees payom inimale muuŋ tinaŋ imbesmbees payom.
Muuŋ, nepooŋ tiou inimale tikau ghou pa ravraav ve sen. Eemoghon yom upoola payou, tauto aazne naneep pooi.
17 Tovenen you pale nagham watooŋrau payom, ve nasuŋ payom toman lolog poia, ve napait ghom.
18-19 Sawa to Yoova tamtoghon toni tizala Yerusalem,
ve tilup di pa suŋuuŋ ilooŋ ila sirsiir to rumai toni lolo,
you pale nataghon saveeŋ mbuaaŋ tiou tonene, ve nagham uraata ila matadi.
Aleluia, tapait Yoova!