4
Maaron ineep ila ina to ghamuuŋ pooz izi ndug sambam
1 You naghita mbeb tonenen le isob, ghoro matag ila le naghita ataam eez ikakaak izi ndug sambam. Ghoro ŋgeu to muuŋ nalooŋa isaav payou inimale tavuur itaŋ, aliŋa inim payou muul ighaze: “Uza unum sualen, leso napatooŋ ghom pa mbeb pida to muri pale tivot titaghon Maaron ŋgar toni.”
2 Rikia moghon Maaron Avuvu tapiri iza tiou, ve naghita Maaron ina to ghamuuŋ pooz iyoon izi ndug sambam, ve Ŋgeu eez inepneep ila. Mbo 47:8; Is 6:1
3 Ye nagho milmilia inimale yaam yaspa ve karnelian to ŋgeretuŋadi popoia. Ve maalraŋgo to ŋguruba airaumbiti inimale yaam emeral, iluvut ŋgeu tonowen ina to ghamuuŋ pooz. Ezek 1:22-28
4 Ve naghita ŋginiiŋa tamoot ee ve paaŋ (24) tineep ila inadi to ghamuuŋ pooz ve tiluvut Maaron ina to ghamuuŋ pooz.* Ndiran ŋgara tighaze ŋginiiŋa 24 tonene, nene yes aŋela to tiŋgin Maaron tamtoghon toni, ma Yakop ndinatu saaŋgul ve ru ve yes mbaŋooŋa saaŋgul ve ru to Krisi. Saveeŋ waaro naol to rau tonene isavia mbeb saaŋgul ve ru (12), ma tamoot ee ve paaŋ (24) [=12+12], ma tamoot liim, tamoot ru avua paaŋ (144) [=12 taims 12]. Saveeŋ tovene, nene iza to Maaron tamtoghon toni, ma Krisi lupuuŋ toni.
Yes tindud di pa nonogiiŋa pisosooŋa, ve moghar tineep izala dabadi. Moghar todi tonowen, tigharaat di pa gol. 5 Ve naghita lalaav waro milia to ivotvot ila Maaron ina to ghamuuŋ pooz, ve nalooŋ lalaav avolutu. Ve sul liim ve ru tighanghan ila Maaron ina to ghamuuŋ pooz nagho. Sul tonowen, nene Maaron avuvu liim ve ru. Igham 19:16; Syg 1:4
6 Ve mbeb ite ineep tonowe paam. Ghitooŋa inimale te. Tigharaata pa galas to ŋgalaaŋa kat.
Ve mbeb matadi yaryaara paaŋ tiyoon tiluvut Maaron ina to ghamuuŋ pooz.† Ndiran ŋgara tighaze mbeb paaŋ tonene, nene aŋela ariaŋadi kat to timbesmbees pa Maaron ve tiŋgin ina to ghamuuŋ pooz. Yes paaŋ pasa, tighamgham uraat irau sambam ve taan dige to naol. Ighaze buk tonene isavia mbeb paaŋ, nene pughu tovene: Mbeb tonenen tineep o tivot irau ndug tisob.
Mbeb paaŋ tonowen, matadi katindi, tineep irau tinidi tisob. Matadi tineep pa naghodi ve muridi paam. Ezek 1:5+; Is 6:1-3
7 Mbeb paaŋ tonowen, eez nagho inimale laion. Ve ite nagho inimale makau tamoot. Ve ite nagho inimale tamtoghon. Ve inim paaŋ pani, nagho inimale manbog to iraav bage pa rovaaŋ. 8 Mbeb paaŋ tonowen ledi bagedi liim ve eez le irau di. Ve matadi katindi kat. Irau anoŋadi ve bagedi paam. Ve yes atedi izi maau. Mboŋ ve ndag, tipapait Maaron iza tighaze:
“Tiina toit Maaron, tapiri tiina kat. Ilib pa mbeb to naol ne.
Ye patabuaŋ, le patabuaŋ, le patabuaŋ kat!
Ye ineep muuŋ, ineep aazne, ve muri ye pale inim.” Is 6:2+; Syg 1:4
Tipait Maaron iza izi ndug sambam
9 Ŋgeu to ineep ila ina to ghamuuŋ pooz irau sawa isob, mbeb matadi yaryaara paaŋ tonowen moghon moghon tipakuri ve tipait iza pa tapiri ve poia toni. 10 Ve sawa to tigham tovene, yes ŋginiiŋa tamoot ee ve paaŋ tila titap tizi ila mata, ve tipakuri paam. Ve tizugua moghar todi to ineep izala dabadi, ve tighur di tizi ila ŋgeu tonowen ina to ghamuuŋ pooz nagho, ve tipait iza tighaze:
11 “O Maaron, Tiina tiei, yom poiam kat. Ighaze nipakur ghom ve nipait izam pa tapirim ve poia tiom, nene deŋia. Pasa, yom moghon to ughur mbeb tisob tivot. Onoon kat, yom utaghon taum ŋgar tiom ve ughur mbeb tisob tivot. Tauto tineep tovene.” Mbnp 1:1; Mbaŋ 14:15, 17:24
*4:4: Ndiran ŋgara tighaze ŋginiiŋa 24 tonene, nene yes aŋela to tiŋgin Maaron tamtoghon toni, ma Yakop ndinatu saaŋgul ve ru ve yes mbaŋooŋa saaŋgul ve ru to Krisi. Saveeŋ waaro naol to rau tonene isavia mbeb saaŋgul ve ru (12), ma tamoot ee ve paaŋ (24) [=12+12], ma tamoot liim, tamoot ru avua paaŋ (144) [=12 taims 12]. Saveeŋ tovene, nene iza to Maaron tamtoghon toni, ma Krisi lupuuŋ toni.
†4:6: Ndiran ŋgara tighaze mbeb paaŋ tonene, nene aŋela ariaŋadi kat to timbesmbees pa Maaron ve tiŋgin ina to ghamuuŋ pooz. Yes paaŋ pasa, tighamgham uraat irau sambam ve taan dige to naol. Ighaze buk tonene isavia mbeb paaŋ, nene pughu tovene: Mbeb tonenen tineep o tivot irau ndug tisob.