15
Tagham ŋgar pa tauud moghon malep. Tagham ŋgar pa nditaad paam
1 Iit to ghurla toit iyaryaaŋ ne, irau tataghon tauud lolood maau. Iit irau mataad iŋgal yes to ghurla todi iyaryaaŋ sone, ve tatatan tauud, ve tataghon ŋgar to irau lolodi ve ŋgar todi, ve tatoova pa tapalot di. Ro 14:1; 1Tes 5:14
2 Tovenen iit tasob irau tataghon ŋgar to iuul nditaad, ve tapalot di pa ŋgar popoia. Leso tapariaaŋ ghurla todi. 1Kor 10:24; Pil 2:4+
3 Agham ŋgar pa Krisi. Ye igham ŋgar pa tau maau. Ŋgar toni itaghon Maaron aliŋa waaro eez to timbooda. Isaav tovene:
4 Maaron aliŋa isob to muuŋ timbooda, nene ineep pa ipaghazoŋan ghiit, ve ipalot ghiit. Leso lolood ru malep, ve tayoon ariaŋa pa badooŋ pataŋani, ve taghur mataad pa sawa to Maaron igham mulin ghiit ve taneep pooi. Ro 4:23+; 1Kor 10:11; 2Tim 3:16+
5 Maaron toit ipapalot ghiit, leso tayoon ariaŋa pa badooŋ pataŋani. Ye tau pale igham gham alup lolomim toman ŋgar tiam inim ee moghon itaghon ŋgar to Yesu Krisi. Ro 12:16; 1Kor 1:10; Pil 2:2
6 Leso yam asob lolomim ee moghon, ve alup avomim, ve apait Tiina toit Yesu Krisi Tama Maaron pa tapiri ve poia toni. Onoon.
Krisi inim pa yes Yuda moghon maau. Ye inim pa tamtoghon tisob
7 Krisi lolo poia payam, ve igham gham anim le wa. Tovenen yam paam, lolomim poia pa taumim ve agham poian gham. Leso apaghazoŋan Maaron iza tiina toman tapiri ve poia toni. 8 Pasa, you nasaav payam: Krisi inim mbesooŋa pa yes Yuda, ve igham uraat itaghon saveeŋ mbuaaŋ to Maaron isavia pa nditimbudi. Leso anoŋa ivot, ve ipaghazoŋan Maaron ighaze saveeŋ toni, nene onoon moghon. Mbaŋ 3:25+; 2Kor 1:20
9 Ve igham ndug ndug to Yuda maau ne tipait Maaron iza pa tapiri ve poia toni. Pasa, ye lolo isamin di ve ireu sosor todi. Saveeŋa timbooda pataghaaŋ wa. Isaav tovene:
“You pale napait ghom ila ndug ndug to Yuda maau ne lolodi,
10 Ve saveeŋ waaro ite isaav tovene:
“Yam ndug ndug to Yuda maau ne, asob alup gham toman Maaron tamtoghon toni, ve tinimim iza pani.” Lo 32:43
11 Ve saveeŋ waaro ite isaav tovene:
“Yam to Yuda maau ne, asob apakur Maaron.
Yam ndug ndug to aneep irau taan, asob apait Maaron iza.” Mbo 117:1
12 Propet Isaia paam isavia mbeb tonene ighaze:
“Paghu eez to Yesi pale ivot ve inim kinik, ve igham pooz pa ndug tisob.
Ndug ndug to Yuda maau ne, pale tinumeera, ve tighur matadi pa sawa to ye iuul di tineep pooi.” Is 11:1,10; Mt 12:21; Syg 22:16
13 Maaron to iit taghurghur mataad pani, pale igham yam to aghur ila toni lolomim poia kat, ve aneep poia toman lolomim luuma. Ve Avuvu Patabuaŋ tapiri ipalot gham, leso lolomim ru sob, ve anumeer Maaron kat, ve asaŋan sawa to ye igham mulin ghiit ve taneep pooi. Onoon. Ro 14:17; 1Kor 4:20
Paulus isavia uraat toni to votiaaŋ varu poia
14 Yam toŋvetaz, you nawatag: Ŋgar poia ivon ila lolomim, ve aghazooŋ kat pa Maaron aliŋa. Tovenen yam asob irau apatoot nditamim pa saveeŋ toni. 2Pe 1:12; 1Yo 2:21
15-16 You nawatag: Ŋgar pida to nambood di ila rau tonene, nene ariaŋadi. Eemoghon nasavia di tighazooŋ payam, leso napamundigin ŋgar tiam muul, ve matamim kisin di. Pasa, you nanimale ŋgeu to watooŋrau to nagham uraat payam. Maaron ighur ghou nanim mbesooŋa to Yesu Krisi itaghon tau lolo ve poia toni, ve ighur uraat inim nimag pa navotia varu poia toni pa ndug ndug to Yuda maau ne. Leso titoor ŋgar todi ve tighur ila to Krisi, ve Avuvu Patabuaŋ igham uraat padi le titaghon ŋgar patabuaŋ. Ghoro naghur di tila to Maaron tinim watooŋrau to ighami lolo poia kat. Mbaŋ 9:15; Ro 11:13; Ga 2:7+
17 Yesu Krisi, ineep toman ghou pa uraat to naghamghami pa Maaron. Tauto tinig iza pa uraat tiou tonene. 18 You irau avog ila pa saveeŋ ma uraat ite paam ne maau. Uraat to Krisi ighami ivot ila nimag, mbeb tonene moghon to pale nasavia. Ye tau ipapalot saveeŋ toman uraat tiou. Tauto uraat tiou ighur anoŋa, ve ndug ndug to Yuda maau ne titoor ŋgar todi, ve titaghon ŋgar to Krisi. 19 Avuvu Patabuaŋ tapiri ineep tiou, ve sawa to navotia mos, ye ighamgham mbeb gharatooŋadi ve uraat tintina tivotvot tinim ghilalooŋ pa tamtoghon, leso tighur ila to Krisi. You napamundigin uraat izi Yerusalem muuŋ. Ghoro nataghon taan nala nala le navot izi taan suruvu to Ilirikum. Ndug tonowen tisob tilooŋ katin varu poia to Yesu Krisi wa. Mbaŋ 19:11; 1Kor 2:4; 2Kor 12:12
20 Pasa, ŋgar tiou iyaryaaŋ naghaze ndug sine to tilooŋ Krisi varu sone, ghoro nala navotia varu poia padi. You lolog pa narei ruum izala gungun to tamtoghon ite ipayoonda ne maau. Naghaze taug napayoon gungun, ve narei ruum izala, ghoro poia. 21 Ataam to nataghoni pa uraat tiou, saveeŋa ineep ila Maaron aliŋa to timbooda. Isaav tovene:
“Tamtoghon to tilooŋ varu sone, nene pale tighita.
Ve yes to tilooŋ saveeŋ toni sone, nene pale tilooŋa ve tiwatagi.” Is 52:15
Paulus ighaze ila ighita yes Roma
22 Sawa naol, you naghaze nalat naghita gham. Eemoghon uraat tiou to votiaaŋ varu poia ikiskis ghou, tauto nalat maau. Ro 1:13
23-24 Eemoghon aazne, naghita naghaze yes to taan suruvu tonene, you leg uraat eta padi muul maau. Ve nagham ŋgar naghaze nala pa taan suruvu to Spen ve navotia varu poia izi tonowe. Tovenen you pale nalat naŋgig gham, ve naneep toman gham ris le isob, ghoro auul ghou pa laghooŋ tiou, ve namundig muul nala pa Spen. Pasa, ndaman katindi, matag iŋgal naghaze nalat naghita gham, ghoro poia. 1Kor 16:6
25 Eemoghon you pale nala Yerusalem muuŋ, ve nauul Maaron tamtoghon toni to tineep tonowe le isob, ghoro nalat navot tiam. Mbaŋ 19:21, 24:17
26 Pasa, yes to Masedonia ve Akaia lolodi ipamundigin di, ve tiŋgoog yaam pida inim nimadi, ve tighuri inim nimag wa. Tighaze naghami nala, ve nagham pa Maaron tamtoghon toni to tineep toman mbolaaŋ izi Yerusalem. 1Kor 16:1+; 2Kor 8:1, 9:2,12; Ga 2:9
27 Ŋgar tonene, taudi lolodi ve tighami. Ve nene deŋia. Pasa, yes Yuda tinim ataam pa yes to Yuda maau ne, ve tigham mbeb popoia katindi to iuul di pa nepooŋ to anunudi. Tovenen ighaze yes to Yuda maau ne, matadi iŋgal yes Yuda pa mbeb popoia pida to taan ve tiuul di pani, nene poia. 28 Tovenen you naghaze napasob uraat tonene, ve naghur yaam to tiŋgooga ne ila yes Yerusalema nimadi le isob, ghoro nalat naghita gham, ve nala pa Spen. 2Kor 8:20+
29 You nawatag: Sawa to nalat peria tiam, nene pale poia tiina kat to Krisi iza tiam. Ro 1:11
30-31 Yam toŋvetaz, itiŋa taghur ila to Tiina toit Yesu Krisi, ve Avuvu Patabuaŋ igham ghiit lolood pa tauud. Tovenen you naghason gham naghaze asuŋ Maaron ariaŋa, leso inim sigeu payou pa yes to Yudea to tighur ila maau. Ve iuul ghou pa uraat to naghaze naghami izi Yerusalem pa nauul tamtoghon toni. Leso ilaan pooi, ve igham di lolodi poia. Tovenen aghur ghou ila suŋuuŋ tiam. Leso itiŋa tazuaria ghiit pa ghamuuŋ uraat to Yesu Krisi. 2Kor 1:11; Kol 4:3
32 Ve muri, ighaze Maaron lolo pa ighaze nalat, nene pale nalat naghita gham toman lolog poia, ve naneep toman gham ris ve itiŋa tawapalotin ghiit, ghoro nala.
33 Maaron, ye igham ghiit taneep poia toman lolood luuma. Ye tau pale ineep toman gham asob. Onoon.