6
Tapayooz toŋvetaz to Krisi pa savsaveeŋ ila daaba to taan naghozi sov
1 Isaav ighe tsiam eta iitete igham sosor pani, na puughu mindai ta i ipayooze ila yes daaba to taan tau tiwatagh Maaron mako na naghozi? Ŋgar tsiam tana, mayamim pani mako? Yam awatagh: Zeran tauvene, ŋgar toozi iduduuŋ ila Maaron maata mako. Tauvene yam aghur pataŋani tsiam ila tamtamon to Maaron nimazi to tigharaata, o poia. 2-3 Yam awatagh mako? Saawe to Mboŋ Murei, iit tamtamon to Maaron pale tauule pa uraat to gabizooŋ tamtamon to taan. Ighe tauvene, puughu mindai ta yam irau agharaat pataŋani ŋgiira ŋgiira tau aazne tivotvot ila sosomim ne mako? Ve iit pale tagabiiz yes aŋela paam. Ighe tauvene, iit irau tagharaat pataŋani to taan. Pa ene gabua tiina mako. *Mt 19:28
4 Yes daaba to taan lezi ezazi ila lupuuŋ to Krisi loolo mako. Puughu mindai ta yam aghurghur pataŋani tsiam to taan ila zeran tauvene nimazi to tigharaata? 5 Nabood saveeŋ tane payam, leso mayamim pa ŋgar tau aghamghamu na. Mindai, tsiam eta le ŋgar irau to igharaat toŋvetaz to Krisi saveeŋ toozi mako? 6-7 Eemon yam ataghon eez tauvene mako. Yam apapayooz toŋvetaz tsiam tau tighur ila to Krisi na, ila yes daaba to taan tau tighur ila mako na naghozi. Ŋgar tsiam tana itotoi ighe yam atap wa. Mindai, ighe toŋvetaz tsiam eta itombaan gham to igham sorokin gabua tsiam, ma igham sosor ite paam payam, irau apul sosor tooni mako? *Mt 5:39+; Ro 12:17+; 1Pe 3:9
8 Eemon yam ataghon eez tauvene mako. Pasaa, toŋvetaz tsiam tau yamŋa aleep ila lupuuŋ to Krisi loolo na, tauta agham sosor pazi, ve atombaan zi to ayau sorokin gabua toozi.
9 Yam awatagh mako? Isaav ighe tamtamon eta inoknok ghamuuŋ ŋgar tau iduduuŋ mako, i irau itaghon Maaron pooz tooni ve iloŋ ila nugh tooni ne mako. Tauvene agham karom pa taumim sov. Yes tau matazi saghati imin ŋgavuun, yes tau tibesbees pa maaron karomŋa, yes tau tighurghur boog, zitamoot tau timomogheer pa zetazŋa zitamoot siriv, 10 yes umbuuŋa, yes tau matazi gabua, yes ghunuuŋa, yes tau matazi izi pa zetazŋa ve tisiksik saveeŋ sasaghati pazi, ve yes tau titombaan tamtamon to tigham sorokin gabua toozi, tamtamon tisov tau tighamgham tauvene, yes aat irau titaghon pooz to Maaron ve tiloŋ tila nugh tooni ne mako. *Ga 5:19+; Ep 5:5; Hib 12:14; Syg 21:8, 22:15
11 Muuŋ, yam siriv ataghon ŋgar tauvene paam. Eemon aazne, ila uraat to Yesu Krisi, Maaron Avuvu igham uratoi gham. Tauta Maaron igham gham aŋgalaaŋ, ve amin tamtamon tooni patabuyaaŋa, ve aduduuŋ ila i maata wa. *1Kor 1:2; Ep 2:1+; Kol 3:7+; Tit 3:3+
Anoŋaan, ene imin Rumei to Avuvu Patabuyaaŋ
12 Yam siriv asavsaav aghe: “Yau irau nagham ŋgar ta naol ne. Gabua eta le ŋgalsekiiŋa mako.” Ene poia. Eemon ŋgar isov irau iuul ghiit mako. Ve gabua ite paam. Yau lolog pa gabua saghati eta igham pooz payau ve namin besooŋa pani mako. *Yo 8:34; 1Kor 10:23
13 Ve yam siriv asavsaav aghe: “Aniiŋ, ene gabua to apoon. Ve apoon igheen to aniiŋ izila. Ve murei, Maaron pale ipasov gabua ru tana.” *Saveeŋ to aniiŋ ve apoon, ene izaa to zitamoot ve zilivaa anoŋazi. Yes eval to nugh Korin matazi saghati imin ŋgavuun. Ve ŋgar toozi ikau tighe: Zilivaa anoŋazi, ene igheen to zitamoot timogheer pazi mon. Ve saa ŋgar tau ighe tamtamon tigham pa anoŋazi, ene kaut sorok. Irau igham gabua eta pa anunuzi mako. Pasaa murei, anoŋazi pale imaat gha ilale, ve anunuzi mon, o ileep maata yaryaare.
Ene onoon. Eemon anoŋaan igheen to igham ŋgar saghati imin ŋgavuun mako. Anoŋaan igheen to ibees pa Ŋeer Tiina. Ve Ŋeer Tiina igham ŋgar tiina pa anoŋaan. *1Tes 4:3+
14 Aghita. Maaron ipaburigin Tiina toit Yesu pa mateegh wa. Ve murei, Maaron tapiri pale ipaburigin ghiit paam pa mateegh ve igham leen anoŋaan paaghu. *Ro 8:11; 2Kor 4:14
15 Yam awatagh mako? Anoŋamim, ene Krisi anooŋa siriv siriv. Mindai, isaav ighe tagham Krisi anooŋa sirivu ve talupu tomania livaa to eez, pale poia? Mako kat! *1Kor 12:27; Ep 5:30
16 Yam awatagh mako? Isaav ighe tamoot eta ipaak anooŋa ila livaa to eez anooŋa, ene yesuru tivalupu zi timin eemon. Saveeŋa igheen pataghaaŋ wa:
“Yesuru pale tivalupu zi timin eemon.” *Gnp 2:24
17 Eemon tamtamon tau imin Tiina toit le na, ila uraat to Maaron Avuvu, yesuru Krisi tivalupu zi timin eemon. Mindai, tamtamon tauvene irau ilup ghi tomania livaa to eez muul? Ene aat mako. *Yo 17:21+; 1Kor 12:13; Ep 4:4
18 Tauvene ŋgar to mataan saghati imin ŋgavuun, yam aleep soghan pani. Pa ŋgar tane imin sosor siriv mako. Sosor toit siriv tiŋarui tauun anoŋaan mako. Eemon tamtamon tau ighe igham ŋgar tane, ene igham sosor pa tauu anooŋa. *Ep 5:3; 1Tes 4:3; Hib 13:4
19 Yam awatagh mako? Anoŋamim, ene imin rumei to Avuvu Patabuyaaŋ ileep iloŋ ila. Pasaa, Maaron igham Avuvu payam, ve aazne i ileep ila lolomim. Tauvene yam aŋgin taumim muul mako. *Ro 14:7+; 1Kor 3:16+; 2Kor 6:16
20 Maaron ighol gham pa gabua tau atuya tiina kat gha amin i le wa. Tauvene saa ŋgar tau ighe aghamu pa anoŋamim, na aghamu to apaghazoŋai Maaron eeza tiina tomania tapiri ve poia tooni. *1Kor 7:23; Pil 1:20; Hib 9:12; 1Pe 1:18+
*6:6-7: Mt 5:39+; Ro 12:17+; 1Pe 3:9
*6:10: Ga 5:19+; Ep 5:5; Hib 12:14; Syg 21:8, 22:15
*6:11: 1Kor 1:2; Ep 2:1+; Kol 3:7+; Tit 3:3+
*6:13: Saveeŋ to aniiŋ ve apoon, ene izaa to zitamoot ve zilivaa anoŋazi. Yes eval to nugh Korin matazi saghati imin ŋgavuun. Ve ŋgar toozi ikau tighe: Zilivaa anoŋazi, ene igheen to zitamoot timogheer pazi mon. Ve saa ŋgar tau ighe tamtamon tigham pa anoŋazi, ene kaut sorok. Irau igham gabua eta pa anunuzi mako. Pasaa murei, anoŋazi pale imaat gha ilale, ve anunuzi mon, o ileep maata yaryaare.
*6:17: Yo 17:21+; 1Kor 12:13; Ep 4:4
*6:18: Ep 5:3; 1Tes 4:3; Hib 13:4
*6:19: Ro 14:7+; 1Kor 3:16+; 2Kor 6:16
*6:20: 1Kor 7:23; Pil 1:20; Hib 9:12; 1Pe 1:18+