3
Mataan iŋgal gabua to nugh sambam
1 Maaron ipaburigin gham tomania Krisi ve agham lepoogh paaghu wa. Tauvene yam aat azuari gham pa gabua to sambam. Pa Krisi, i ileep ta sewe ila Maaron niima tapir. *Mk 16:19; Ep 1:20, 2:6; Kol 2:12
2 Agham ŋgar tiina pa gabua to taan sov. Ŋgar tsiam iyaryaaŋ pa gabua to sambam mon. *Mt 6:33; Ro 8:5
3 Pasaa, yam apaak Krisi pa mateegh tooni, ve lepoogh tsiam muŋgaana isov wa. Ve lepoogh tsiam paaghu, ene gabua tau igheen ŋgozaaŋ tomania Krisi ila to Taama Maaron. 4 Tauvene Krisi imin puughu pa lepoogh paaghu tau aazne yam aghamu ne. Ve murei, saawe tau i imuul ilam ve itotoi tauu ivot ighazooŋ, ene pale Maaron ipavotvotin gham tomania Krisi, ve yamŋa Krisi atotoi Maaron tapiri, mbonari, ve poia tooni ivot ighazooŋ. *1Kor 15:43; Ga 2:20; Pil 1:21, 3:21; 1Yo 3:2
Tapul ŋgar muŋgaana ileple
5 Tauvene ŋgar sasaghati naol to taan tau tighenaar ila lolomim na, arav matin zi. Ŋgar tauvene: Ŋgar to ghuruuŋ boog, ŋgar tau iŋgalaaŋ mako, ŋgar to loloon ighaar pa gabua sasaghati, ŋgar to tayai ghiit mako ve tala pa naghoon mon, ve ŋgar to mataan gabua. Aghita. Ŋgar to mataan gabua, ene imin tabees pa maaron karom. *Ro 8:13; Ga 5:24; Ep 5:3+
6 Alooŋ. Yes tau tizorzoor Maaron aliiŋa ve tinoknok ghamuuŋ ŋgar sasaghati tane, aatyavyav to Maaron pale izaa toozi. *Ro 1:18; Ep 5:6
7 Muuŋ, yam paam, laghooŋ tsiam tomania lepoogh tsiam, ataghon ŋgar tauvene. *1Kor 6:11; Ep 2:2+; 1Pe 4:3
8 Eemon aazne, yam aat apul ŋgar sasaghati isov ileple. Ŋgar tauvene: Ŋgar to kisiiŋ aatyavyav, ateen tuuku, ghuruuŋ koi, ŋgar to tasavia saveeŋ saghati pa zetaanŋa, ve saveeŋ malwaata. Tauvene saveeŋ saghati eta ivot ila avomim sov. *2Kor 7:1; Ep 4:31, 5:4; Hib 12:1
9 Ve avatombanoi gham sov. Pa ŋgar tsiam muŋgaana tau ipapazaagh gham pa ghamuuŋ ŋgar sasaghati na, yam apuli wa, imin nonoghiiŋa tau aghita isaghat ve asiki ilale. 10 Ve agham ŋgar paaghu to Krisi imin lemim, imin ayol gham pa nonoghiiŋa paaghu. Aazne, Krisi ighamgham uratoi gham. Leso awatagh katin Maaron tau ighur gham na, ve ŋgar tooni igheen tsiam, ve avot amin i tauu. *Gnp 1:26; Ro 12:2; Ep 4:22+
11 Iit tau Krisi igham ghiit tamin paaghu na, tasov rarateen mon. Eta poia iliiv iitete ne mako. Tauvene isaav ighe iit Grika, ma iit Yuda, ma tataghon ŋgar to ravuuŋ tamtamon warozi, ma tataghoni mako, ma mataan dodoli ve takankaan pa saveeŋ Grik, ma talam pa taan sirivu to Sikitia, *Tamtamon to Sikitia tileep nugh ziige kat. Tauvene tamtamon tisov matazi veleghin zi tighe yes kankanooŋa, tivot soone. Eemon isaav ighe yes Sikitia tighur ila to Krisi, ene Maaron ighit zi raratezi imin yes Grika ve Yuda tau tighur ila tooni.
ma iit besooŋa tau taleep ila daaba toit sambazi, ma iit mbesooŋa mako ve taŋgin tauun, gabua isov tane, ene gabua sorok. Ve Krisi tau ileep ila tamtamon tooni tisov lolozi ne, i mon ta gabua tauu. *Ro 10:12; 1Kor 7:19; Ga 3:28
Iit aat tatotoi ŋgar to Maaron
12 Maaron loolo igheen tsiam, ve isiigh gham amin le wa. Tauvene yam aat agham ŋgar tooni imin lemim, imin ayol gham pa nonoghiiŋa paaghu. Ŋgar tauvene: Lolomim isaghatin tamtamon ve agham poghani zi. Atatan taumim ezamim. Ve agham ŋgar pa taumim mon sov. Matamim iŋgal zeetmimŋa ve agham ŋgar marowa pazi. 13 Isaav ighe tamtamon tigham saghatin gham, na ayatu sov. Abaad pataŋani tana, ve atotoi ŋgar luuma pazi. Ve isaav ighe tsiam eta igham ŋgar eta tau irau lolomim mako, na matamim kisin sosor tooni sov. Yamŋa agharaat lolomim, ve apul sosor tooni, imin Tiina toit Krisi ipul sosor tsiam. *Mk 11:25; Ga 5:22; Ep 4:2, 32
14 Ŋgar isov tane, aseeŋ zi pa ŋgar to loloon pa tauun. Pa ene ilup ŋgar popoia tisov timin eemon, ve igham zi tivot poia kat. *Yo 15:12; Ro 13:8+; Ep 5:2; Kol 2:2
15 Ŋgar luuma to Krisi aat igham pooz ila lolomim, ve itotoi gham pa saa ŋgar tau pale agham pa tamtamon. Pa Maaron ipoi gham amin i le, ve ilup gham amin Krisi anooŋa eemon, leso ataghon ŋgar tauvene. Ve lolomim poia pa Maaron, ve apaiti pa poia tooni irau saawe. *Yo 14:27+; Ro 12:5; Pil 4:7
16 Saveeŋ to Krisi aat ivon kat ve igheen tuŋia ila lolomim. Ve yam aat apaghazoŋai zeetmimŋa ve apaduduŋai zi pa ŋgar popoia maata maata. Ve ambou ve apait Maaron pa poia tooni. Ambou mbouŋ to yes Israela tau tibood zi na, toman mbouŋ to suŋuuŋ, ve mbouŋ siriv tau Maaron Avuvu ipaburigin gham ve atoor zi na paam. *1Kor 14:26; Ep 5:19+
17 Saveeŋ tsiam toman uraat tsiam, ve saa ŋgar ite paam tau ighe aghamu, yam aat aghamu ila Tiina toit Yesu eeza to apaiti. Ve lolomim poia pa Tamaan Maaron paam, ve apaiti pa poia tooni ila Yesu eeza. *1Kor 10:31; 1Tes 5:18; Hib 13:15
Saveeŋ tau iŋarui yes vaivaiŋa
(Ep 5:22-33; 1Pe 3:1-7)
18 Yam zilivaa, atatan taumim ve aleep ila azuwamimŋa sambazi. Pa ighe iit tau tamin Tiina toit Krisi le na tataghon ŋgar tauvene, ene iduduuŋ. *Tit 2:5
19 Ve yam zitamoot, lolomim pa azuwamimŋa ve agham poghani zi. Agham saghatin zi sov, ve agham ariaaŋa pazi sov.
Saveeŋ tau iŋarui yes geegeu
(Ep 6:1-4)
20 Yam geegeu, alooŋ tamamimŋa ve tinamimŋa aliŋazi pa gabua naol isov. Pa ŋgar tauvene igham Tiina toit Yesu loolo poia.
21 Ve tamazŋa paam, yam agham ariaaŋa pa natmimŋa sov. Pale agham zi tighita tauzi tighe yes tirau gabua eta mako.
Saveeŋ tau iŋarui yes uraata ve daaba toozi
(Ep 6:5-9; Tit 2:9-10)
22 Yam besooŋa, alooŋ daaba tsiam to taan aliŋazi pa gabua isov. Ve agham karom pa uraat sov. Besooŋa siriv, isaav ighe tighita daaba toozi tilam, mako tigham uraat poi ila matazi, leso tigham zi lolozi poia. Ve saawe tau ighe daaba toozi tipul zi ve tila, mako tigham uraat poi mako. Yam agham tauvene sov. Yam aat abees pazi poi toman lolomim. Pa yam aroi pa Maaron ve aghe ataghon ŋgar tooni. *1Tim 6:1
23 Tauvene saa uraat tau ighe aghamu, na aghamu poi toman lolomim. Aghamu imin agham uraat pa tamtamon mako. Aghamu imin agham uraat pa Tiina toit Yesu. 24 Ve yam awatagh: Murei, Maaron pale igham lemim atuya poia. Ene lepoogh to nugh sambam. Yam ezamim iyooz pa ghamuuŋni wa. Pasaa, yam abesbees pa Tiina toit Krisi. 25 Eemon isaav ighe tamtamon eta igham sosor, ene i aat igham atuya to sosor tooni. Pasaa, Maaron igham ŋgar pa tamtamon ezazi mako, ve ivool to eta mako. Gabizooŋ tooni, ene itaghon eez raraate mon pa tamtamon tisov. *Lo 10:17; Ro 2:11; 2Kor 5:10; 1Pe 1:17
*3:1: Mk 16:19; Ep 1:20, 2:6; Kol 2:12
*3:4: 1Kor 15:43; Ga 2:20; Pil 1:21, 3:21; 1Yo 3:2
*3:5: Ro 8:13; Ga 5:24; Ep 5:3+
*3:7: 1Kor 6:11; Ep 2:2+; 1Pe 4:3
*3:8: 2Kor 7:1; Ep 4:31, 5:4; Hib 12:1
*3:10: Gnp 1:26; Ro 12:2; Ep 4:22+
*3:11: Tamtamon to Sikitia tileep nugh ziige kat. Tauvene tamtamon tisov matazi veleghin zi tighe yes kankanooŋa, tivot soone. Eemon isaav ighe yes Sikitia tighur ila to Krisi, ene Maaron ighit zi raratezi imin yes Grika ve Yuda tau tighur ila tooni.
*3:11: Ro 10:12; 1Kor 7:19; Ga 3:28
*3:13: Mk 11:25; Ga 5:22; Ep 4:2, 32
*3:14: Yo 15:12; Ro 13:8+; Ep 5:2; Kol 2:2
*3:15: Yo 14:27+; Ro 12:5; Pil 4:7
*3:17: 1Kor 10:31; 1Tes 5:18; Hib 13:15
*3:25: Lo 10:17; Ro 2:11; 2Kor 5:10; 1Pe 1:17