3
Yes Galesia tigham Avuvu Patabuyaaŋ ila eez to taghoniiŋ tutuuŋ mako
1 Aa yam kankanooŋa to Galesia, sei ikau ŋgar tsiam? Aazne, avaghamgham imin yes tau mura tivaghamun zi na! Saawe tau nileep tomani gham, yei nipaghazoŋai gham pa Yesu Krisi, le imin ta taumim aleep, ve aghita tiravu izala ai pambarooŋ. *1Kor 1:23; Ga 5:7
2 Aiyo, naghe naghason gham pa gabua ee. Yam agham Maaron Avuvu itaghon saa eez? Eez to taghoniiŋ tutuuŋ, ma eez to alooŋ vaaru poia ve aghur ila? *Mbaŋ 2:38; Ro 10:16+; Ep 1:13
3 Yam aat lemim ŋgar mako taa? Papazoge, Maaron Avuvu ipaburigin gham gha agham lepoogh poia ila tooni. Puughu mindai ta aazne aghe apasov uraat tooni ila taumim tapirimim? 4 Gabua naol tau muuŋ ivotvot payam na, ene ivot payam sorok? Mako! *1Kor 15:2; 2Yo 8
5 Ve puughu mindai ta Maaron irei Avuvu payam, ve ighamgham gabua ŋgeretazi ila sosomim? Yam ataghon duduŋai tutuuŋ tooni, ta ighamgham tauvene payam ne? Mako. Yam alooŋ vaaru poia mon, ve aghur ila.
Abaram itotoi ghiit pa eez to ghuruuŋ ila
6 Matamim iŋgal imuul ila pa Abaram. Maaron aliiŋa tau tiboode na, isaav tauvene:
“Abaram ighur ila to Maaron, tauta Maaron ighita ighe i ŋeer duduuŋa.” *Gnp 15:6; Ro 4:3
7 Tauvene yam irau awatagh aghe yes tau titaghon eez to ghuruuŋ ila, tauta timin Abaram natŋa. *Yo 8:39; Ro 4:11+
8 Maaron iwataghi wa: Murei, nugh nugh tau Yuda mako na, pale tighur ila vaaru poia, ve ghuruuŋ ila toozi tana igham zi tiduduuŋ ila i maata. Pasaa, Maaron aliiŋa tau tiboode na isaav tauvene: Muuŋ kat, Maaron ivotia vaaru poia pa Abaram ighe:
“Yo pale umin eez pa nughmariŋ to taan, leso poia tsiau izaa toozi.” *Gnp 12:3, 18:18, 22:18
9 Tauvene tamtamon tisov tau tighur ila to Krisi na, poia to Maaron aat izaa toozi, imin muuŋ Abaram ighur ila ve poia to Maaron izaa tooni. *Ro 4:16
Eez to taghoniiŋ tutuuŋ, i le pataŋani
10 Yes tau tinumeer tighe ŋgar to taghoniiŋ tutuuŋ pale imin eez pazi to tiduduuŋ ila Maaron maata, ene pale aatyavyav to Maaron izaa toozi ve ivaghamun zi. Saveeŋa tiboode pataghaaŋ wa:
“Saveeŋ naol tau tiboode ila rau to tutuuŋ na, yam aat matamim kisin zi ve ataghoniir zi le tisov. Ve sei tau ighe itaghon suvinia mako, ene pale aatyavyav to Maaron izaa tooni, ve ivaghamunia.” *Lo 27:26
11 Tauvene tutuuŋ irau imin eez pa tamtamon eta to iduduuŋ ila Maaron maata mako. Ene igheen mataghare wa. Pasaa, Maaron aliiŋa tau tiboode ila rau na, isaav tauvene:
“Tamtamon tau ighe ighur ila, ene aat iduduuŋ ila Maaron maata, ve igham lepoogh poia ila tooni.” *Hab 2:4; Ro 1:17; Ga 2:16; Hib 10:38
12 Eemon eez to taghoniiŋ tutuuŋ, ene ŋgara ite pa eez to ghuruuŋ ila. Pasaa, eez to taghoniiŋ tutuuŋ, ene vene:
“Tamtamon tau ighe itaghoniir tutuuŋ tisov, ene aat ileep poia.” *Wkp 18:5; Ro 10:5
13 Tauvene eez to taghoniiŋ tutuuŋ, ene igham pataŋani pait. Pa ighe tataghon duduŋai tutuuŋ mako, ene pale aatyavyav to Maaron izaa toit ve ivaghamun ghiit. Eemon Yesu igham niaan gha ibaad aatyavyav to Maaron izala ai pambarooŋ. Tauta igham mulin ghiit pa pataŋani tawe. Saveeŋa igheen pataghaaŋ wa:
“Ŋeer tau ighe tiravu ve ituuk ila ai, ene aatyavyav to Maaron igheen izaa tooni.” *Lo 21:23; Ro 8:3; 2Kor 5:21
14 Krisi igham tauvene, leso poia to Maaron tau muuŋ izaa to Abaram na, izaa to yes tau Yuda mako na paam. Tauta aazne, iit tau taghur ila to Krisi na, tagham Maaron Avuvu itaghon saveeŋ mbuaaŋ tooni. *Yo 7:38+; Ro 4:16
Tutuuŋ to Maaron irau ireu saveeŋ mbuaaŋ tooni mako
15 Yam toŋvetaz, yau naghe nagham saveeŋ palelaaŋ pa ŋgar tau monmon iit tamtamon taghamghamu ne. Isaav ighe tambu saveeŋ eta ve tapariaaŋa le iyaryaaŋ kat, ene murei tamtamon ite paam irau ireua, ma iseeŋga pa saveeŋ ite paam mako. Pasaa, saveeŋ mbuaaŋ tana iyaryaaŋ wa. 16 Aiyo, mataan iŋgal saveeŋ tau muuŋ Maaron imbua tomania Abaram ve paaghu tooni. Saveeŋ tawe iŋarui Abaram paaghu tooni tisov mako. Iŋarui ŋeer eemon, ene Krisi. *Gnp 12:7, 22:18, 24:7
17 Saveeŋ tsiau tane, puughu tauvene: Maaron imbu saveeŋ tomania Abaram, ve ipariaaŋa le iyaryaaŋ kat, ve ndaman ndiŋndiŋ paaŋ, tamoot ee, saŋavul (430) ilam ila, ra igham tutuuŋ pa yes Israela. Tauvene tutuuŋ tawe irau ireu saveeŋ mbuaaŋ tau muuŋ Maaron imbua ne mako. Pasaa, tutuuŋ ivot murei. *Igham 12:40+
18 Lepoogh poia tau Maaron ighe igham pa tamtamon tooni na, imin ta ŋgar to taghoniiŋ tutuuŋ irau imin eez pait to taghamu, kanaŋ taghamu ila eez tana, ve saveeŋ mbuaaŋ ileple. Eemon mako. Pasaa, Maaron imbu saveeŋ pa Abaram ighe i pale igham lepoogh poia tawe pani sorok. *Ro 4:13, 11:6
Puughu tau Maaron igham tutuuŋ pait
19 Ighe vene, puughu mindai ta Maaron imbu saveeŋ le isov, ra izi gha igham tutuuŋ pa yes Israela? I igham tutuuŋ pa tamtamon to ipaburigin ŋgar toozi, leso tighilaal sosor toozi. Ve i ighe tutuuŋ tawe iyooz ariaaŋ le irau Abaram paaghu tooni tau i imbu saveeŋ pani na ilam ivot. Tutuuŋ tana, yes aŋela tigham pa Mose, ra i aana isakia ila pa yes Israela. Pasaa, i ta iyooz bodbodaaŋ pa Maaron ve yes Israela. *Yo 1:17; Mbaŋ 7:38; Ro 5:20, 7:7
20 Eemon saawe tau Maaron imbu saveeŋ tomania Abaram, tamtamon eta, ma aŋela eta ileep bodbodaaŋ pa Maaron ve Abaram, ve isakia Maaron aliiŋa ila pa Abaram ne mako. Abaram ilooŋ saveeŋ ila Maaron tauu aavo. Pasaa, Maaron zigani ta ileep, ve isavia.
21 Ma mindai? Saveeŋ mbuaaŋ to Maaron iparav tomania tutuuŋ tooni? Mako kat! Imin ta tutuuŋ eta irau imin eez pait to tagham lepoogh poia ila to Maaron, kanaŋ ŋgar to taghoniiŋ tutuuŋ irau igham ghiit taduduuŋ ila Maaron maata. 22 Eemon mako. Pasaa, Maaron aliiŋa tau tiboode na, isaav ghazooŋa tauvene: Ŋgar saghati ikau iit tasov, le tamin yes tau tileep ila ruum to yavyavuuŋ loolo. Saveeŋ tane ipaghazoŋai ghiit pa sosor toit. Leso taghur ila to Yesu Krisi, ve ghuruuŋ ila toit imin eez pait to taghita saveeŋ mbuaaŋ to Maaron anooŋa. *Mbo 14:3; Ro 3:9+
23 Muuŋ, saawe tau taleep ila tutuuŋ saamba, lepoogh toit imin yes tau tileep ila ruum to yavyavuuŋ loolo. Pasaa, tutuuŋ iŋgin ghiit pa gabua naol isov. Taleep tauvene le Maaron ipaghazoŋai eez to ghuruuŋ ila ivot ighazooŋ. *Ga 4:3; Hib 9:10
24 Agham ŋgar pa yes besooŋa tau tiŋgin geegeu ve tipaduduuŋ zi le timin zolman. *Yes Grika lezi besooŋa siriv tau tiŋginŋgin natuzŋa. Yes tigham payamyam pa yes geegeu, ve murei tipaduduuŋ zi pa ŋgar le timin zolman. Mako tipul zi, ve geegeu tawe tiŋgin tauzi.
Muuŋ, iit taleep ila tutuuŋ saamba, ve tutuuŋ iŋgin ghiit imin yes besooŋa tawe le Krisi ilam ivot. Leso igherev ghiit tala to Krisi, ve taghur ila tooni, ve i igham ghiit taduduuŋ ila Maaron maata. *Mbaŋ 13:39
25 Ve aazne, eez to ghuruuŋ ila ivot ighazooŋ wa. Tauta taleep ila tutuuŋ saamba muul mako, ve tutuuŋ imin paduduŋaaŋ pait muul mako. *Ro 7:6, 10:4; Kol 2:16+; Hib 8:13
Yes tau tighur ila to Krisi na timin Maaron natŋa
26 Yam asov tau ghuruuŋ ila tsiam isaghav Yesu Krisi na, Maaron natŋa yam. *Yo 1:12; Ro 8:14+
27 Pasaa, yam tamtamon tau agham yaa gha amin Krisi le na, asov agham ŋgar to Krisi imin lemim wa, imin anonogh gham pa nonoghiiŋa paaghu. *Ro 13:14; Kol 3:12
28 Ve yam asov raratemim ila Maaron maata. Isaav ighe yam Yuda, ma Yuda mako, ma yam besooŋa sorok, ma yam besooŋa mako ve aŋgin taumim, ma yam zilivaa, ma zitamoot, gabua naol tauvene, iit tagham ŋgar pani sov. Pasaa, yam aleep ila to Yesu Krisi, ve i ilup gham asov amin eemon wa. *Yo 10:16; Ro 10:12+; 1Kor 12:13; Kol 3:11
29 Tauvene aazne, yam amin Krisi le wa. Ve amin Abaram paaghu tooni paam. Tauta ezamim pa ghamuuŋ lepoogh poia ila to Maaron, itaghon saveeŋ mbuaaŋ tau muuŋ i imbua tomania Abaram na. *Gnp 21:12; Ro 9:7+
*3:2: Mbaŋ 2:38; Ro 10:16+; Ep 1:13
*3:8: Gnp 12:3, 18:18, 22:18
*3:10: Lo 27:26
*3:11: Hab 2:4; Ro 1:17; Ga 2:16; Hib 10:38
*3:13: Lo 21:23; Ro 8:3; 2Kor 5:21
*3:16: Gnp 12:7, 22:18, 24:7
*3:18: Ro 4:13, 11:6
*3:19: Yo 1:17; Mbaŋ 7:38; Ro 5:20, 7:7
*3:24: Yes Grika lezi besooŋa siriv tau tiŋginŋgin natuzŋa. Yes tigham payamyam pa yes geegeu, ve murei tipaduduuŋ zi pa ŋgar le timin zolman. Mako tipul zi, ve geegeu tawe tiŋgin tauzi.
*3:25: Ro 7:6, 10:4; Kol 2:16+; Hib 8:13
*3:28: Yo 10:16; Ro 10:12+; 1Kor 12:13; Kol 3:11