12
Tutuuŋ to Pasova
1 Mose yesuru Aron tilepleep izi taan to Isip, ve Yoova isaav pazi ighe: 2 “Kaiyo tane, ene iliiv kaiyo tisov. Pasaa, kaiyo tane, yau aat nagham gabua paaghu ivot payam. *Gabua paaghu tau ivot pa saawe to Pasova, ene vene: Maaron igham mulin yes Israela, ve ilup zi timin eemon, ve igham zi timin lupuuŋ tooni. Murei, i isavia tutuuŋ tooni pazi paam. Tauvene saawe tana ve ila, lepoogh toozi imin muuŋ mako. Lepoogh toozi ite.
Tauvene yam Israela aat aghur kaiyo tane imuuŋ pa ndaman tsiam tisov. 3 Yamru ala alup Israela tisov, ve asaav pazi tauvene: Mboŋ imin saŋavul to kaiyo tane, mako zitamoot tisov aat timbit sipsip ma mekmek paghpaaghu eŋaeŋa irau ruum toz toz. 4 Yam eŋaeŋa aat agabiiz poghania sipsip tau ambit zi na: Tamtamon piiz kat ta irau tighani le tipasovu? Isaav ighe ruum eta tamtamona naol mako, ve tigham ŋgar tighe zigazi irau tighan suvinia sipsip toozi mako, yes aat tisaav pa zetazŋa tau tileep tigharau zi na tilam ve yesŋa tilup zi pa ghanghaniiŋ. Leso tipasovu. 5 Yam aat aghita sipsip ma mekmek zitamoot tau popoiazi mon ve ndaman toozi eŋaeŋa, o ambit zi. *1Pe 1:19
6-7 Aŋgin zi poi le mboŋ imin saŋavul ve paaŋ (14) to kaiyo tane, ve ravrav izi, saawe tau taghit sapirin ghiit, mako arav zi. Ve ruum sindei tau aleep ila na, agham gabua tau arav zi na siŋizi, ve akumu izala didiiŋaia to ataman. Ila ziige ru, ve izaa pa saaŋa paam. Leso imin ilaal pa yam tamtamon to Yoova tau alup gham pa ghanghaniiŋ ila ruum tana loolo.
8 “Mboŋ eemon tana, amoz sipsip tana izala yav, ve aghan tomania mberet tau le yis mako na, ve saiŋ papaii. *1Kor 5:8
9 Sipsip miiza tau ighe mbitai ma nazuuŋ, na aghani sov. Aghan moziiŋ mon. Tauvene amoz sipsip anooŋa dodoli, tomania daaba, ve ŋgoi, ve kodkooda izala yav, ve aghan suvinia. 10 Apul sirivu igheen imin ŋaar sov. Isaav ighe aghan le apomim isuŋ, ve sirivu igheen, mako aghuru ila yav ighan suvinia le isov o nughizau.
11 Ve agharaat taumim pataghaaŋ pa laghooŋ. Akat nonoghiiŋa tsiam imin tuuku, aghur zuzuuŋa to aghemim, ve akis titi tsiam paam. Mako mbolemim izi pa ghanghaniiŋ. Eemon aghan rekia. Aniiŋ tana, ene aniiŋ to Pasova. Yam aat aghani, leso matamim iŋgal saawe tau yau Yoova nasal payam, ve nala narav yes Isipa natuzŋa timataar.
12 “Mboŋ tana, yau pale nalaagh irau taan isov to Isip, ve naravuur natuzŋa aidabazŋa, tomania ŋgai toozi natŋa tau tinazŋa tipoop zi imin maata na, le tisov timataar. Leso naghur atuya pa maaron karomŋa toozi, ve natatan tapirizi. Pasaa, yau Yoova nalepleep. 13 Tauvene siŋ tau akumu ila didiiŋaia to ataman to ruum tsiam, ene pale itotoi ruum tsiam payau. Saawe tau nalaghlaagh pa ravuuŋ yes Isipa, ve naghita siŋ tana, yau aat nasal payam ve navool pa ruum ite. Leso nakari gham sov.
14 “Saawe tane, ene saawe tiina ve patabuyaaŋ. Tauvene yam Israela yamŋa paaghu tsiam tau pale tivot murei na, aat apakur saawe tane, ve matamim iŋgalŋgali irau saawe. Yau naghur tutuuŋ payam tauvene: Ndaman isov, isaav ighe azaa pa saawe tane, na yam aat agham lupuuŋ tiina, ve asuŋ payau toman lolomim poia. Tutuuŋ tane pale iyaryaaŋ tauvene taghon taghon gha ila.
Lupuuŋ to mberet tau le yis mako
15 “Saawe to lupuuŋ tiina tane, isaav ighe lolomim pa ghaniiŋ mberet, na aghan mberet tau tighur yis ila mako na. Yam aat aghan mberet tauvene mon irau mboŋ liim ve ru. Tauvene saawe tau lupuuŋ tiina tane ighe ivot, yam aat agham yis †Yes Yuda tigharaat mberet tauvene: Tigham palawa rig, ve tikepu tomania yaa, mako tipuli igheen saawe malau rig, leso iŋaraaŋ. Palawa ŋaraaŋa tana, ene imin yis. English aliŋazi tiwaato tighe ‘leven.’ Mako tigham palawa ŋaraaŋa tana, ve tikepu tomania palawa paaghu, leso ipasaria. Ipasaria le isov, mako tigham palawa tana ŋgiira rig, ve tighuru ila soghan, leso isaŋan pa saawe to tigharaat palawa paaghu muul.
isov tau igheen ila ruum tsiam lolozi na, ve asiki ilale. Apul rigta igheen sov. Mboŋ liim ve ru to lupuuŋ tiina tane, isaav ighe tsiam eta izoor saveeŋ ve ighan mberet tau tikepu tomania yis, na aziire ighau ila soghan pa yam Israela. Ilup ghi tomani gham muul sov. *1Kor 5:6-8
16 Saawe imin maata tau lupuuŋ tiina tane iburig, ve saawe imin liim ve ru tau isov pani, na yam Israela aat asov alam alup gham ve agham suŋuuŋ tiina. Saawe ru tana, ene umbom patabuyaaŋ. Agham uraat eta sov. Eemon aniiŋ, o yam irau agharaata.
17 “Lupuuŋ tiina to mberet tau le yis mako na, ndaman isov, yam aat matamim iŋgali ve ataghoni. Pa saawe duduuŋ tane, ta yau nagham gham alaagh ila sosoor sosoor imin yes zaaba, ve apul taan to yes Isipa. Tauta naghur tutuuŋ ariaaŋa pa yam ve paaghu tsiam tau pale tivot murei na tauvene: Ndaman isov, yam aat matamim iŋgal saawe tane, ve alup gham ve agham suŋuuŋ tiina payau. Tutuuŋ tane aat igheen tauvene taghon taghon gha ila. *Igham 23:15, 34:18
18-19 “Tauvene ndaman isov, kaiyo tau ivot imin maata na, mbooŋi imin saŋavul ve paaŋ (14), ve ravrav tooni, ene saawe tau lupuuŋ tiina tane iburig, ve ila isov pa ravrav to mboŋ imin tamoot ee ve geege ee (21). Mboŋ liim ve ru tana, isaav ighe aghan mberet, na aghan mberet tau tighur yis ila mako na. Tauvene saawe tana, yis eta igheen ruum tsiam lolozi sov. Isaav ighe taumim eta, ma loom eta tau ileep ila sosomim na izoor saveeŋ, ve ighan mberet tau tikepu tomania yis ila saawe tana loolo, na aziire ighau ila soghan pa yam Israela. Ilup ghi tomani gham muul sov. 20 Tauvene mboŋ liim ve ru tana, nugh sindei tau ighe yam aleep pani, na aghan gabua eta tau yis igheen ila na sov. Agharaat mberet tau le yis mako na mon.”
Mose ipaesia tutuuŋ siriv to Pasova pa yes Israela
21 Yoova isavsaav tomania Mose le isov, ra Mose ila ve ilup zolmana tisov to Israel, ve isaav pazi ighe: “Ala rekia mon, ve apas lemim sipsip paghpaaghu irau ruum ruum, ve arav zi. Leso agharaat aniiŋ to Pasova. 22 Sipsip tana siŋizi, awatoa ila oon, ve agham ai ‘isop’ booga, ve azeeva ila siŋ tana. Mako akumu ila didiiŋaia to ataman tsiam. Ila ziige ru, ve izala pa saaŋa paam. Tsiam eta ivot ila muuri sov. Yam asov aleep ila ruum tsiam tsiam lolozi mon le nughizau. 23 Saawe tau Yoova izilam, ve ilaagh pa ravuuŋ yes Isipa natuzŋa ve gabua toozi, ighe ighita siŋ tana igheen ila didiiŋaia to ataman tsiam, i pale isal payam, ve ila ivool pa ruum ite. Irau ipul aŋela to ravuuŋ tamtamon iloŋ ilat ruum tsiam ve irav gham mako. *Hib 11:28
24 “Tutuuŋ tau aazne nasavi zi payam ne, ene ariaŋazi. Pale tighengheen tauvene le alok. Tauvene yamŋa paaghu tsiam tau pale tivot murei na matamim kisin zi, ve ataghon duduŋai zi taghon gha ila. 25 Saawe tau ala avot taan tau Yoova imbu saveeŋ ighe igham payam na, matamim iŋgalŋgal lupuuŋ tiina to Pasova, ve ataghon duduŋai ŋgara izi ta sewe. Apuli sov. 26 Ve saawe tau natmimŋa tighason gham pa lupuuŋ tane puughu, mako apaes pazi tauvene. 27 Aghe: ‘Iit tarav gabua tane imin watooŋrau pa Yoova. Leso tapaiti, ve mataan iŋgal saawe to Pasova tau Yoova isal pa ruum toit izi Isip, ve ipul ghiit taleep, ve ila irav yes Isipa natuzŋa.’ ”
Yes Israela tilooŋ saveeŋ tana, ve tiput aghezi, ve tipait Yoova eeza. 28 Ra tila ve titaghon duduŋai tutuuŋ isov tau Yoova isavi zi pa Mose yesuru Aron na.
Pataŋani imin saŋavul: Maaron irav yes Isipa natuzŋa aidabazŋa tisov timataar
29 Yes tileep le mboŋ anooŋa, ra Yoova izilam, ve iravuur yes Isipa natuzŋa aidabazŋa tisov timataar. Ipul eta ileep mako. Kinik tau igham pooz pa taan Isip na naatu aidaaba, ve ila ila le yes tau tileep ila ruum to yavyavuuŋ loolo na natuzŋa aidabazŋa paam, tisov timataar. Ve Isipa ŋgai toozi paam. I iravuur natuzŋa tau tinazŋa tipoop zi imin maata na, le tisov timataar. 30 Tauvene mboŋ tana, kinik tomania uraata tooni ve eval tiina to Isip, tiburig le tighita natuzŋa tau timaat na. Ra taŋiiz tiina iburig irau ruum ruum. Pasaa, mateegh irau ruum to yes Isipa tisov.
Yes Isipa tiziir yes Israela tila
31-32 Mboŋ tana, kinik imbaaŋ pa Mose yesuru Aron tilam tooni, ve isaav pazi ighe: “Rekia mon ve aburig apul nugh tsiau, ve aghau ala! Ve yamru mon mako. Eval tiina to Israel paam. Yam asov ayau sipsip, mekmek, ve makau tsiam, ve ala agham suŋuuŋ pa Yoova itaghon ghasoniiŋ tsiam. Apul tamtamon tsiau, ve aghau ala! Ve aghason Maaron tsiam to igham poghani ghau.”
33 Yes Isipa tipasul yes Israela tighe tipul nugh toozi rekia mon. Pa tigham ŋgar tauvene: “Isaav ighe yes Israela tileep tomani ghiit, ene pale tasov tamatmaat.” 34 Ra yes Israela tigham oon toozi tau palawa igheen iloŋ ila na, ve tizunua zi pa uuli, leso tibaad zi ila avarazi. Palawa tawe, tikepu tomania yis soone. 35 Ve titaghon Mose aliiŋa ve tighason yes Isipa pa lezi kuaz maata maata tau tigharaat zi pa gol ma silva na, ve tighason zi pa lezi nonoghiiŋa paam. *Gnp 15:14; Igham 3:21+
36 Yoova igham yes Isipa lolozi poia pa yes Israela. Tauvene gabua isov tau yes Israela tighason zi pani, yes Isipa tigham pazi mon. Tauta yes Israela tipasov zi kat.
Yes Israela tipul Isip
37 Tauvene yes Israela tiburig gha tipul nugh Ramses, ve tila tivot nugh ee eeza Sukot. Yes eval le eval kat. Zitamoot toozi tau tirao pa malmal, yes irau 600,000 ma vene. Ve yes zilivaa tomania natuzŋa, tinin zi mako. 38 Yes Israela lezi sipsip, mekmek, ve makau katini kat. Tauta tiyauur zi ve tilaagh tomani zi. Ve nugh nugh siriv tau Israela mako na tiburig tila tomani zi paam. 39 Tilaagh tila le tivot nugh ee, ra timariau. Tileep ta sewe, ve tigham palawa toozi tau tigharaata izi Isip na, ve timozi gha imin lezi tamaz. Palawa tawe, ŋginaaŋa. Tikepu tomania yis mako. Pasaa, saawe tau tiburig, yes Isipa tipasul zi. Tauta lezi saawe eta to tigharaat poghania tamaz toozi mako.
40 Yes Israela tileep izi Isip irau ndaman 430, ra tipul Isip ve tila. *Gnp 15:13; Ga 3:17
41 Tauvene saawe duduuŋ tau ndaman 430 tana isov, ra yes Israela tisov tiburig, gha tipul Isip ve tila. Tilaagh ila ŋgun toz toz imin yes zaaba. ‡Yes Israela timin zaaba (o ami) to Maaron. Tauvene yes irau tivalaghlaagh mako. Yes aat tilaagh duduuŋ itaghon ŋgun toz toz. Ughita Namba 10:11-33.
42 Mboŋ tawe ta Yoova maata iŋgal yes Israela, ve igham zi tipul Isip itaghon saveeŋ mbuaaŋ tooni. Tauta ndaman isov, saawe to Pasova ighe ivot, yes Israela tisov aat timamaat ve matazi iŋgal gabua tau ivot pa mboŋ tana, ve tipait Yoova. Ŋgar tane aat igheen tauvene taghon gha ila.
Tutuuŋ siriv tau iŋarui Pasova
43 Yoova isaav pa Mose yesuru Aron ighe: “Ene tutuuŋ siriv tau iŋarui ghanghaniiŋ to Pasova.
Nugh nugh tau ighe tilam tileep ila yam Israela sosomim na, toozi eta irau ighan sorokin aniiŋ to Pasova mako. 44-45 Ve isaav ighe agham tamtamon to nugh ite imin lemim uraata, ene i paam, irau ighan sorokin aniiŋ to Pasova mako. Eemon isaav ighe aghol tamtamon to nugh eta imin lemim besooŋa ve arav waaro, ene i irau ighan.
46 Isaav ighe alup gham pa ghanghaniiŋ to Pasova ila ruum eta loolo, na aghan suvinia sipsip tsiam ta sena. Agham miiza sirivu rigta ivot ila muuri sov. Ve tuua tauvene paam, aŋgoor eta sov. *Yo 19:36
47 Tamtamon to Israel tisov irau matazi iŋgalŋgal lupuuŋ tiina to Pasova ve titaghon duduŋai ŋgara.
48 “Isaav ighe ŋeer eta to nugh ite ilam ileep ila sosomim, ve ighe ileep tomani gham pa ghanghaniiŋ to Pasova, na yam aat arav ŋeer tana tomania zeetŋa zitamoot tisov tau tileep ila ruum tooni na warozi. Leso aghit zi aghe yes raratezi imin yam Israela duduuŋ. Le isov o, yes irau tighan. Eemon sei tau ighe tirav waaro mako, ene irau ighan aniiŋ to Pasova mako. 49 Tutuuŋ tane aat igham pooz pa yam asov. Yes tau siŋ duduuŋ to Israel, ve yes loomba tau tileep ila sosomim na paam.”
50 Tauvene yes Israela tisov titaghon duduŋai tutuuŋ isov tau Yoova isavia pa Mose yesuru Aron na. 51 Ve saawe duduuŋ tana, Yoova igham zi tipul Isip. Tilaagh ila ŋgun toz toz, ve tila.
*12:2: Gabua paaghu tau ivot pa saawe to Pasova, ene vene: Maaron igham mulin yes Israela, ve ilup zi timin eemon, ve igham zi timin lupuuŋ tooni. Murei, i isavia tutuuŋ tooni pazi paam. Tauvene saawe tana ve ila, lepoogh toozi imin muuŋ mako. Lepoogh toozi ite.
†12:15: Yes Yuda tigharaat mberet tauvene: Tigham palawa rig, ve tikepu tomania yaa, mako tipuli igheen saawe malau rig, leso iŋaraaŋ. Palawa ŋaraaŋa tana, ene imin yis. English aliŋazi tiwaato tighe ‘leven.’ Mako tigham palawa ŋaraaŋa tana, ve tikepu tomania palawa paaghu, leso ipasaria. Ipasaria le isov, mako tigham palawa tana ŋgiira rig, ve tighuru ila soghan, leso isaŋan pa saawe to tigharaat palawa paaghu muul.
*12:35: Gnp 15:14; Igham 3:21+
‡12:41: Yes Israela timin zaaba (o ami) to Maaron. Tauvene yes irau tivalaghlaagh mako. Yes aat tilaagh duduuŋ itaghon ŋgun toz toz. Ughita Namba 10:11-33.