1 Maaron isavia saveeŋ isov tane iŋarui yes Israela eŋaeŋa ighe:

2 “Yau Yoova, Maaron tsio. Muuŋ, yo umin besooŋa sorok izi taan to Isip. Eemon yau nagham mulin ghom, tauta upul nugh to pataŋani tawe. 3 Yo aat ubees pa yau zigau. Ughur maaron ite paam imuuŋ payau ve ubees pani sov. *Mk 12:30; Lu 10:25+

4 “Ve ugharaat gabua eta ve ughuru imin Maaron payo sov. Saa gabua tau tileep sambam, taan, ma te loolo na, ugharaat eta naagho, ve ughuru imin maaron payo, ve ubees pani sov. *Tutuuŋ tane, ŋgara tauvene: Iit irau tagharaat gabua eta, ve taghe Maaron naagho raraate tauvene ne mako. Pa gabua eta to taan naagho imin Maaron mako. Yesu mon ta itotoi katin Maaron naagho pait (Yo 14:9). *Igham 34:17; 1Kor 10:14; 1Yo 5:21; Syg 21:8

7 “Yau Yoova, Maaron tsio. Uwaat sorokin ezag sov. Pa tamtamon tau ighe iwaat sorokin ezag, ma ipariaaŋ saveeŋ karom ila yau ezag, ene irau naghurghuru mako. Yau aat naghur atuya iŋaruini pa sosor tooni. *Mt 5:33+

8 “Matam iŋgal umbom to Maaron ve upatab pani. *Igham 16:23+

12 “Matam loŋloŋai pa tamam gha tinam, ve utandagh pazi. Leso uleep malau izi taan tau yau Yoova, Maaron tsio, pale nagham payo. *Mt 15:4; Mk 7:10; Ep 6:2+

13 “Urav tamtamon imaat sov. *Mt 5:21; 1Yo 3:15; Syg 21:8

14 “Ughur boog sov. *Mt 5:27+; Ro 13:9; 1Kor 6:15+; Ep 5:5; Hib 13:4; Syg 21:8

15 “Uum sov. *Mt 19:18; Ro 13:9; Ep 4:28

16 “Upariaaŋ saveeŋ karom to uvaghamunia etam ite sov. *Mk 10:19; Lu 18:20; Syg 21:8, 22:15

17 “Lolom ighaar pa zetamŋa ruum toozi sov. *Lu 12:15

“Ve lolom ighaar pa azuwazŋa, besooŋa, ŋgai, ma gabua toozi ite paam sov.” *Ro 7:7, 13:9

18 Yes Israela tilooŋ lalaav luutu, ve tighita nugh ighani milmilia, ve tilooŋ gabua tau itaŋtaŋ imin tavuur na, ve tighita yav mbuasa gabgabuai ikau loloz, le tiroi ve tinizi irur. Tauvene tiyooz soghan pa loloz puughu, 19 ve tisaav pa Mose tighe: “Yo aat ugham Maaron aavo, ve upaesia aliiŋa payei. Pa yei niroi. Isaav ighe i tauu isavsaav tomani ghei, ene pale nisov nimataar!” *Hib 12:18+

20 Mose isaav pazi ighe: “Aroi sov. Aazne, Maaron izilam itaghon eez tane, to itotoi tapiri payam leso awatagh katini ve aroi pani, ve agham sosor muul sov.” 21 Tauvene eval tiina to Israel tiyooz soghan pa loloz puughu, ve Mose zigani imuul izala, le ila igharau taitai gabgabuai tau Maaron ileep ila na.

22 Ra Yoova isaav pa Mose ighe ipaesia aliiŋa pa yes Israela tauvene: “Yam taumim aghita wa. Yau naleep sambam, ve aliŋag izilat payam. 23 Abees payau mon. Alup ghau tomania maaron karom eta sov. Tauvene agharaat maaron karom eta pa silva ma gol ve abees pani sov.

24 “Yam aat andou taan, ve agharaata imin artaal payau, leso agham watooŋrau tsiam izala. Sipsip ve makau tsiam tau arav zi timin watooŋrau na, aghur siriv tizala yav leso yav ighan dodolin zi. Ve siriv, amoz zi ve taumim aghan zi to itiŋa tavalupu ghiit tamin eemon. Nugh sindei tau ighe yau naghuru payam to imin lemim suŋuuŋ niia, yam aat alup gham pa suŋuuŋ ve apait ezag izi ta sewe. Leso matamim iŋgal ghau, ve nalam naleep tomani gham, ve naghur poia tsiau izaa tsiam. 25 Ve isaav ighe andou maet imin artaal payau na, ayau maet tau dodoli mon. Maet tau ighe agharaata ve asap ziige na, aghamu pa artaal tsiau sov. Maet tauvene, ene poia pa artaal mako. Pasaa, ene nugh patabuyaaŋ. 26 Isaav ighe agharaat artaal eta, na izala geeg sov. Pa ighe ataghon ndeet azala, ene pale tighita mbolemim.”