25
Ŋeer ee isuŋ pa Maaron ighe ireu sosor tooni, ve itotoi eez pani
Mbouŋ to David
1 O Yoova, naghur taug nalat tsio, ve nasuŋ payo.
2 Maaron tsiau, yau nanumeer ghom.
Upul koiagŋa titatan ghau sov.
Pale tipakur zi tighe tiliiv ghau, ve tigham ghau mayag.
3 Tamtamon tisov tau tisaŋan ghom pa uleeŋ na, irau tighur matazi payo sorok ve mayazi ne mako.
Eemon yes tau tighur murizi payo na, yes pale mayazi.
4 Yoova, utotoi eez tsio payau.
Upaghazoŋai ŋgar tsiau pani, leso nataghon duduŋaini.
5 Ugham pooz payau, leso laghooŋ tsiau iduduuŋ pa saveeŋ tsio.
Ve upaghazoŋai ghau pa ŋgar tsio.
Pasaa, yo Maaron tsiau ve Uleeŋa tsiau.
Mboŋoozo ila le ravrav izi, yau naghurghur matag payo.
6 Yoova, muuŋ ve ilam, yo lolom isaghatin tamtamon ve uluul zi.
Ve lolom isaghav tamtamon tsio ariaaŋ ve poia tsio izazaa toozi.
Matam iŋgal ŋgar tsio tana.
7 Sosor ve ŋgar to taliiŋzizi tau yau kukuag ve naghamgham zi na, matam iŋgal zi sov.
Yoova, yo poiam, ve lolom isaghav tamtamon tsio ariaaŋ ve uluul zi itaghon saveeŋ mbuaaŋ tsio.
Tauvene matam iŋgal ghau ve uul ghau!
8 Yoova ŋgar tooni, ene poia ve iduduuŋ mon.
Tauvene zeran tau tisapir pa ŋgar tooni na, i ipapaduduuŋ zi pa eez tooni.
9 Ve yes tau titatan tauzi ve tinumeer Maaron mon na,
i ighegherev zi ve itotoi eez tooni pazi, leso titaghon ŋgar duduuŋa.
10 Yes tau matazi kisin saveeŋ mbuaaŋ toozi tomania Yoova, ve titaghon eez tau i ighuru pa tamtamon tooni na,
i loolo isaghav zi ariaaŋ ve iuluul zi itaghon saveeŋ mbuaaŋ tooni.
11 O Yoova, yau nagham sosor katini kat.
Eemon yo ezam tiina pa ŋgar tsio tau lolom isasaghatin yei tamtamon.
Tauvene ureu sosor tsiau.
12 Tamtamon tisov tau tiroi pa Yoova ve tighe titaghon ŋgar tooni na,
i pale itotoi eez pazi. Leso tiwatagh eez sindei tau yes aat titaghoni.
13 Zeran tauvene, lepoogh toozi pale poia kat.
Ve natuzŋa paam, pale tileep poia izi taan tau Yoova igham pa tamtamon tooni. *Mbo 37:9, 11; Mt 5:5
14 Yes tau tiroi pa Yoova ve titaghon ŋgar tooni na, timin i zeetŋa duduuŋ.
Tauvene i ivovotia ŋgar tooni yoŋgaaŋa pazi, ve ipaghazoŋai zi pa eez to yesŋa tivalupu zi timin eemon itaghon saveeŋ mbuaaŋ tooni.
15 Saawe isov, yau naghurghur matag pa Yoova naghe i aat iuul ghau.
I pale ipas agheg pa liis tau koiagŋa tighuru payau ne.
16 Yoova, yau besooŋa tsio. Tauvene matam imuul ilam payau. Lolom isaghatin ghau, ve uul ghau pa pataŋani tsiau.
Pa yau zigau kat. Leg etag eta to iuul ghau pa pataŋani tsiau tane mako.
17 Lolog ipataŋan kat ve nagham ŋgar naol. Pasaa, yau leg eez eta mako.
Upas ghau navot pa pataŋani tsiau tane loolo.
18 Ughita pataŋani ve saghatiiŋ tiina tau ivot payau ne, ve uul ghau.
Ve ureu sosor tsiau tisov tilalez.
19 Ughita. Koiagŋa, yes eval.
Ve atezi yavyav payau kat. Tighe le tivaghamun ghau.
20 Eemon yau nanumeer ghom naghe yo aat ugham mulin ghau ila koiagŋa nimazi, ve uŋgin ghau naleep poi.
Yau nayooŋ ilat tsio. Tauvene upul zi tiliiv ghau sov. Ighe mako, pale mayag.
21 Yoova, ŋgar tsiau iyaryaaŋ naghe nataghon ŋgar popoia tau iduduuŋ mon ila yo matam. Tauvene yo aat upoon ghau pa gabua sasaghati ta naol ne.
Pasaa, yau naghurghur matag pa uleeŋ tsio.
22 O Maaron, upas tamtamon tsio Israel tivot pa pataŋani toozi naol isov.