24
Maaron, i kinik tau eeza tiina pa tapiri ve poia tooni
Mbouŋ to David
1 Taan tomania gabua naol isov tau tileep ve tigheen ila, ene to Yoova.
Nugh tisov tomania tamtamon tau tilepaar ila, ene i tooni mon. *Mbo 50:12, 89:11; 1Kor 10:26
2 Pasaa, i ta ighur taan ipot izala te paavo.
Ve ipariaaŋ taan puughu igheen tuŋia izila te loolo ta siiŋa geeg. *Yes Kanaana tighur ila tighe te, i le maaron. Ve lezi maaron ite paam eeza Baal. Yes tighur ila tighe muuŋ geeg, yesuru tiparav, le Baal iliiv maaron to te tapiri, ve ighur taan igheen tuŋia izala te paavo. Ŋeer tau itoor mbouŋ tane isaav tauvene: Yoova ta ighur taan ve te. *Gnp 1:9; 2Pe 3:5
3 Sei irau izala loloz to Yoova ve isuŋ pani?
Ve sei irau iloŋ ila rumei tooni patabuyaaŋ ve iyooz ila i naagho? *Mbo 15:1
4 Tamtamon tauvene: I igham sosor eta mako. Ve ŋgar isov tau igheen ila loolo na, ene iŋgalaaŋ mon.
I ipait maaron karomŋa mako,
ve iwaat Maaron eeza sorok to ipalot saveeŋ karom mako. *Igham 20:16; Mbo 51:10; Mt 5:8
5 Tamtamon tauvene, poia to Yoova aat izaa tooni.
Maaron tau Uleeŋa tooni na, pale igham mulini ve ileep poi, ve ipaghazoŋaini ighe i ŋeer duduuŋa.
6 Zeran tauvene tizuari zi pa Maaron.
Yes tighe tila tivot to Maaron to Yakop naagho, ve tisuŋ pani.
7 O yam ataman, akaak ve tinimim izaa.
Yam ataman to muuŋ geeg, tinimim izaa, ve akaak le akaak kat.
Leso sooso irau kinik tau eeza tiina pa tapiri ve poia tooni na itaghoni iloŋ ila. †Ughita 2Sam 6:1-19. Bokis to Saveeŋ Mbuaaŋ tau muuŋ igheen ila balbaal patabuyaaŋ to Maaron ve yes Israela tibadbaado na, yes tighita tighe Maaron tauu ilepleep ila. Tauvene saawe tau tibaad bokis tawe ve tiloŋ tila pa Yerusalem na, tigham ŋgar tighe Maaron tauu iloŋ ila pa Yerusalem. *Mt 21:5
8 Laak, kinik tau eeza tiina pa tapiri ve poia tooni na, ene sei?
Ene Yoova.
I saksaki, ve tapiri tiina.
Ve i irau kat pa ghamuuŋ malmal. *Igham 15:3+
9 O yam ataman, akaak ve tinimim izaa.
Yam ataman to muuŋ geeg, tinimim izaa, ve akaak le akaak kat.
Leso sooso irau kinik tau eeza tiina pa tapiri ve poia tooni na itaghoni iloŋ ila.
10 Laak, kinik tau eeza tiina pa tapiri ve poia tooni na, ene sei?
Ene Yoova.
I Maaron saksaki, ve iŋgin gabua naol isov.
Onoon kat, i kinik tau eeza tiina pa tapiri ve poia tooni.
*24:1: Mbo 50:12, 89:11; 1Kor 10:26
*24:2: Yes Kanaana tighur ila tighe te, i le maaron. Ve lezi maaron ite paam eeza Baal. Yes tighur ila tighe muuŋ geeg, yesuru tiparav, le Baal iliiv maaron to te tapiri, ve ighur taan igheen tuŋia izala te paavo. Ŋeer tau itoor mbouŋ tane isaav tauvene: Yoova ta ighur taan ve te.
*24:4: Igham 20:16; Mbo 51:10; Mt 5:8
†24:7: Ughita 2Sam 6:1-19. Bokis to Saveeŋ Mbuaaŋ tau muuŋ igheen ila balbaal patabuyaaŋ to Maaron ve yes Israela tibadbaado na, yes tighita tighe Maaron tauu ilepleep ila. Tauvene saawe tau tibaad bokis tawe ve tiloŋ tila pa Yerusalem na, tigham ŋgar tighe Maaron tauu iloŋ ila pa Yerusalem.