40
Suŋuuŋ to tamtamon tau ipait Maaron pa uleeŋ tooni
Mbouŋ to David
1 Saawe tau pataŋani igham ghau, ateg izi ve nasaŋan Yoova.
Ve i ighur taliiŋa pa taŋiiz tsiau, ve iuul ghau.
2 Muuŋ, lepoogh tsiau imin yau naleep ila puura to yes mateegha loolo.
Eemon Yoova indai ghau nazaa.
Agheg brusia ila tiiŋ tiina, ve naghe pale nazal nazila.
Eemon i ipas ghau nazaa, ve ighur ghau nayooz ila taan ariaaŋa. *Mbo 27:5, 31:8, 69:14
3 Ve ipaburigin ghau ve nambou mbouŋ paaghu.
Ene mbouŋ to tapait Maaron toit eeza.
Ŋgar tau Yoova igham payau na, pale igham eval tiina tighilaal. Tauvene yes pale tiroi, ve tighur ila tooni. *Mbo 96:1; Syg 5:9
4 Tamtamon tau ighe inumeer Yoova, ene pale tintini ve poia to Yoova izazaa tooni.
Tamtamon tauvene, i ipaak yes tau tipapait tauzi ezazi ne mako.
Ve yes tau tipul eez to Maaron, ve tibesbees pa maaron karomŋa na, i ileep soghan pazi. *Mbo 1:1, 84:12; 2Kor 6:14+
5 Yoova, yo Maaron tsiau. Eta irau ghom mako.
Pasaa, yo ughamgham uraat ŋgeretazi naol to uul ghei. Uraat tana, maata ite kat.
Ve lolom ighur pa ŋgar popoia naol tau ughe ugham payei.
Isaav ighe natoova to nanin zi tisov ve nasavi zi, ene aat narao mako.
6 Ŋgar to ravuuŋ gabua imin watooŋrau payo, tomania ŋgar to ghamuuŋ aniiŋ payo imin paitooŋ, ene yo lolom pani mako.
Ve ŋgar to ghuruuŋ gabua izala artaal leso yav ighan dodolini, tomania ŋgar to ravuuŋ gabua pa rewaaŋ sosor to tamtamon, ene paam, yo ughur matam pani mako.
Yo ugham taliŋag ikaak, leso nalooŋ aliŋam. *Mbo 51:16-19; Hib 10:5+
7 Tauta nasaav payo naghe: “Maaron, yau taug ene.
Nataghon saveeŋ tau tiboode iŋarui ghau ila rau tsio, tauta nalam.” *Yo 5:39, 46; Hib 10:7
8 Maaron tsiau, isaav ighe nataghon duduŋai yo lolom, ene igham ghau lolog poia le poia kat.
Pasaa, tutuuŋ tau yo ugham payei na, igheen ariaaŋ ila lolog. *Yer 31:33; Mt 26:39; Ro 7:22
9 Yoova, yo uwatagh: Uleeŋ ve ŋgar tsio duduuŋa, yau naneneeŋ pani mako.
Saawe tau eval tiina tilup zi pa suŋuuŋ, nasasavia varum pazi. *Mbo 22:22, 25
10 Onoon kat, uleeŋ ve ŋgar duduuŋa tau utotoia payau na, yau naŋgooza igheen to taug mon mako.
Ve gabuam tau lolom isaghav tamtamon tsio ariaaŋ ve uluul zi, ene paam, naŋgooza pa tamtamon tsio mako. Saawe tau tilup zi pa suŋuuŋ, yau nasasavia gabuam tana pazi.
Ŋgar tsio tau uluul tamtamon itaghon saveeŋ mbuaaŋ tsio, ene navovotia pazi.
11 Yoova, matam kisin sosor tsiau sov. Lolom isaghatin ghau ve upul sosor tsiau.
Ŋgar tsio tau lolom isaghav tamtamon tsio ariaaŋ ve utataghon saveeŋ mbuaaŋ tsio, ene aat imin sigheu payau.
12 Ughita. Aazne, pataŋani naol tilivutin ghau. Irau nanin zi mako.
Ŋgar tsiau sasaghati atuya, tauta iŋarui ghau ne.
Tauvene naghita naghe leg eez eta muul mako.
Sosor tsiau, katini kat. Iliiv dabag rau.
Tauvene naroi ve tapirig isov kat.
13 O Yoova, lolom isaghatin ghau ve ugham mulin ghau pa pataŋani tane!
Ulam rekia mon ve uul ghau!
14 Yes tau tiliil eez to tirav ghau namaat na, utatan zi ve ugham ŋgar toozi ivaghamgham, leso mayazi.
Ve yes tau tighita pataŋani tsiau tane ve tintinizi pani na paam. Upamuul zi tila toman mayazi.
15 Ve yes tau tisavsaav payau tighe: “Aa, ughita wa? Ŋgar tau nighe ivot payo, tauta ivot wa!”
Zeran tauvene, utatan zi ve ugham zi tivaghamgham. Leso mayazi pa ŋgar tau tighamu na.
16 Eemon tamtamon tisov tau tizuari zi tighe le tiwatagh katin ghom na, yes aat lolozi poia ve tintinizi payo.
Ve yes tau lolozi pa uleeŋ tsio, ene pale lolozi poia kat, ve monmon tisavsaav tighe: “Tapait Yoova. Pa i eeza tiina le tiina kat.”
17 Yoova, matam ilam payau lak!
Pa pataŋani tane itatan ghau le tapirig imbool. Narau gabua eta muul mako.
Yo mon ta irau uul ghau ve ugham mulin ghau.
Maaron tsiau, uzuar sov. Ulam rekia mon ve uul ghau!
*40:2: Mbo 27:5, 31:8, 69:14
*40:4: Mbo 1:1, 84:12; 2Kor 6:14+
*40:6: Mbo 51:16-19; Hib 10:5+
*40:8: Yer 31:33; Mt 26:39; Ro 7:22