5
Sipsip to Maaron irau iraraav rau to Maaron
1 Ra matag ila le naghita Ŋeer tau ileep ila niia to ghamuuŋ pooz na, ikis rau ee ila niima tapir. Rau tawe, tilulunu ve tipaak bagil liim ve ru ila aavo ziige, leso ikaak sov. Bagil liim ve ru tawe, mboom to Maaron igheen ila. Ve rau tawe, tibood saveeŋ ila loolo ve muuri paam. *Rau tau saveeŋ ziiri tane isavia na, ene izaa to ŋgar isov tau Maaron pale igham zi tivot izi sambam ve taan, leso ighur atuya iŋarui tamtamon pa sosor toozi, ve igham mulin tamtamon tooni. Ŋgar tawe, Krisi igham uratoini, leso anooŋa ivot. *Is 29:11; Ezek 2:9+; Dan 7:10, 12:4
2 Ve naghita aŋela ee tau tapiri tiina na iboob aliiŋa tiina ighe: “Sei ta poia kat irau to iwalaav bagil pa rau tawe, ve iraraava?”
3 Tauvene titiir sambam, taan, ve taan loolo paam. Eemon tighita eta tau poia kat irau to iraraav rau tawe ve ighita loolo ne mako. 4 Tauvene yau nataŋ tiina. Pasaa, tindeeŋ eta tau poia kat irau to iraraava ve ighita loolo ne mako.
5 Yau nataŋtaŋ, ve ŋginiiŋa tamoot ee ve paaŋ (24), toozi ee ilam ve isaav payau ighe: “Utaŋ sov. Ughita ŋeer tawe. I Laion tau ivot ila to Yakop naatu Yuda ziiri waaro tooni. I paaghu to kinik David. I iyooz ariaaŋ ve iliiv tovaaŋ wa. Tauvene i poia irau to iwalaav bagil liim ve ru to rau tawe, ve iraraava.” *Gnp 49:9+; Is 11:1, 10; Dan 7:13-14; Ro 15:12; Hib 7:14; Syg 6:1
6 Ra matag ila le naghita Sipsip ee iyozyooz igharau Maaron niia to ghamuuŋ pooz. Ve gabua matazi yaryaare paaŋ tomania yes ŋginiiŋa tamoot ee ve paaŋ (24) tilivuti. Sipsip tawe ghitooŋa imin muuŋ tiravu imaat. I le zooŋa liim ve ru. †Gabua zooŋa imin ilaal pa tapiri. Saveeŋ tane puughu tauvene: Sipsip to Maaron, i saksaki ve tapiri tiina kat iliiv gabua naol isov.
Ve maata paam, liim ve ru. Maata tawe, ene Maaron Avuvu liim ve ru tau i imbaaŋ zi tila tirau taan. *Is 53:7; Yo 1:29; 1Kor 5:7
7 Sipsip tawe ilaagh iŋarui Ŋeer tau ileep ila niia to ghamuuŋ pooz na, ve igham rau tau igheen ila niima tapir. ‡Saveeŋ ziiri tane aat isavia saawe tau Krisi imuul izala sambam ve igham eeza tiina ve tapiri to iŋgin gabua naol isov. *Dan 7:13+; Pil 2:9-11; Hib 2:9
8 I igham rau tawe, ve gabua matazi yaryaare paaŋ tomania ŋginiiŋa tamoot ee ve paaŋ (24) tila titap tizi ila i naagho, ve tipakuru. Yes eŋaeŋa tikis gabua imin gita ve oon geegeu tau tigharaat zi pa gol na le irau zi. Oon tawe tivon pa naunauŋ popoia. Naunauŋ tawe, ene suŋuuŋ to Maaron tamtamon tooni patabuyaaŋa. *Mbo 141:2; Hib 13:15; Syg 4:8, 8:3, 15:2
Tipait Sipsip to Maaron
9 Yes tipait Sipsip to Maaron pa mbouŋ paaghu ee tighe:
“Yo poiam kat irau to ugham rau tana, ve uwalaav bagil pani, ve uraraava.
Pasaa, tirav ghom umaat, ve siŋ tsio igham mulin eval tiina gha timin Maaron le wa.
Tinizi, tomania aliŋazi ve gabuazi, ene ite ite.
Ve yes to nugh mariŋ. *Mbo 96:1, 98:1+; 1Pe 1:18+
10 Ve yo ugham zi tisov timin Maaron le. Leso tileep ila pooz tooni saamba, ve tibees pani imin zeran to watooŋrau.
Ve yes pale tigham pooz izi taan.” *Igham 19:6; 1Pe 2:9; Syg 1:6, 20:6
11 Ra matag ila muul le naghita aŋela katini kat ve nalooŋ aliŋazi. Yes ndiŋndiŋ, ve ndiŋndiŋ, ve ndiŋndiŋ. Irau tanin zi mako. Tilivut Maaron niia to ghamuuŋ pooz, tomania gabua matazi yaryaare paaŋ ve yes ŋginiiŋa tamoot ee ve paaŋ (24) tawe. 12 Yes timbou toman aliŋazi tiina tighe:
“Sipsip to Maaron tau tiravu imaat na, i irau kat pa tapiri, kuaz, ve ŋgar ta naol ne.
I saksaki ve eeza tiina. Ve i mbonari tiina ve poia puughu.
Tauvene tapait eeza, o iduduuŋ.”
13 Ra nalooŋ gabua naol isov tau Maaron ighur zi na tipait Maaron tomania Sipsip tooni ezazi. Yes tau tileep sambam, yes tau tileep taan paavo, yes tau tileep taan loolo, ve yes tau tileep te loolo. Tisov tilup avozi tighe:
“I tau ileep ila niia to ghamuuŋ pooz na, tomania Sipsip tooni, iit aat tapakur zi pa tapirizi ve poia toozi, ve tapait ezazi taghon taghon gha ila!”
14 Ve gabua matazi yaryaare paaŋ tiyolyol saveeŋ tighe: ‘Onoon! Onoon!’ Ve yes ŋginiiŋa tamoot ee ve paaŋ paam, titap tizi ve tipait Maaron tomania Sipsip tooni.
*5:1: Rau tau saveeŋ ziiri tane isavia na, ene izaa to ŋgar isov tau Maaron pale igham zi tivot izi sambam ve taan, leso ighur atuya iŋarui tamtamon pa sosor toozi, ve igham mulin tamtamon tooni. Ŋgar tawe, Krisi igham uratoini, leso anooŋa ivot.
*5:1: Is 29:11; Ezek 2:9+; Dan 7:10, 12:4
*5:5: Gnp 49:9+; Is 11:1, 10; Dan 7:13-14; Ro 15:12; Hib 7:14; Syg 6:1
†5:6: Gabua zooŋa imin ilaal pa tapiri. Saveeŋ tane puughu tauvene: Sipsip to Maaron, i saksaki ve tapiri tiina kat iliiv gabua naol isov.
*5:6: Is 53:7; Yo 1:29; 1Kor 5:7
‡5:7: Saveeŋ ziiri tane aat isavia saawe tau Krisi imuul izala sambam ve igham eeza tiina ve tapiri to iŋgin gabua naol isov.
*5:7: Dan 7:13+; Pil 2:9-11; Hib 2:9
*5:8: Mbo 141:2; Hib 13:15; Syg 4:8, 8:3, 15:2
*5:9: Mbo 96:1, 98:1+; 1Pe 1:18+
*5:10: Igham 19:6; 1Pe 2:9; Syg 1:6, 20:6