141
Ŋeer ee ighason Maaron to ipaghaua pa tovaaŋ
Mbouŋ to David
1 O Yoova, yau nataŋ rarai ghom naghe uul ghau rekia!
Ughur taliŋam payau ve ulooŋ aliŋag.
2 Yau nait nimag izaa pa suŋuuŋ, ve naghe yo ughita suŋuuŋ tsiau tane imin naunauŋ vaazi poia tau titunu ila naghom,
ve imin watooŋrau tau tighamghamu pa ravrav.
3 Yoova, uŋgin poghania avog ve yamag. Leso saveeŋ saghati eta ivot ila avog sov. *Mbo 34:13; Mt 12:36; Ep 4:29; Yems 1:26, 3:8
4 Ve upul ghau lolog ighaar pa ŋgar saghati eta sov.
Pa aat napaak zeran sasaghati pa ŋgar toozi ma vene.
Upalot ghau nayooz ariaaŋ. Mako pale nala tomani zi pa ghanghaniiŋ toozi ma vene.
5 Isaav ighe ŋeer duduuŋa eta ilos ghau, ma iyaon ghau to ipaduduuŋ ghau, ene itotoi ighe i loolo payau.
Ŋgar tauvene, irau ateg yavyav pani mako. Ene igham ghau lolog poia kat imin tiliŋ ŋgoreeŋ poia izala dabag.
Eemon zeran sasaghati, monmon suŋuuŋ tsiau iŋaŋarui ghom naghe utatan ŋgar toozi tawe.
6 Saawe tau tighur atuya iŋarui zeran sasaghati, ve tisuruuv zi tizila nugh sapsapu, ene pale tighilaal tighe: Saveeŋ tau muuŋ nasasavia pazi to napaduduuŋ zi, ene saveeŋ poia ve saveeŋ onoon.
7 Zeran tawe, irau titavi zi mako. Pale tigham tuazi, ve tivasuruvai zi itaghon nugh to mateegha, imin ai tau tipaalo le izi imin ŋgiriis.
8 Maaron tsiau Yoova, yau naghur matag payo pa uleeŋ, ve nayooŋ ilat tsio.
Upul ghau nasaghat sov.
9 Upaghau agheg pa liis tau zeran sasaghati tighuru payau,
ve upasali ghau pa puugh tau tiraaro payau na.
10 Ugham zeran tawe tighoon ila tauzi puugh toozi.
Ve uul ghau, leso puugh toozi tawe ikis ghau sov, ve naleep poi.