Saveeŋ Tau Ipaghazoŋai Ŋgar Yoŋgaaŋa To Maaron
Kamapim Tok Hait—Revelation
1
1 Saveeŋ tane isavia gabua tau muuŋ tigheen ŋgozaaŋ ila to Maaron mon, ve aazne Yesu Krisi ivoti zi gha tivot tighazooŋ wa. Maaron ighe besooŋa to Krisi tiwatagh gabua tau malau mako pale tivot itaghon ŋgar tooni. Tauta igham saveeŋ tane pa Krisi. Ra Krisi aana imbaaŋ aŋela tooni ilam ivotia saveeŋ tane pa yau Yoan, besooŋa tooni. 2 Gabua naol tau rau tane isavi zi ne, taug naghit zi pa matag. Tauta napariaaŋ saveeŋa naghe ene saveeŋ onoon to Maaron tau ipariaaŋ tamtamon to tighur ila to Yesu Krisi. *Dan 2:28+; Syg 22:16
3 Saveeŋ tau naboode ila rau tane, ene Maaron tauu aliiŋa tau iŋarui ghiit. Sei tau ighe iwaato pa tamtamon, ene pale poia to Maaron izaa tooni. Ve yes tau tilooŋa ve titaghoni na paam, poia to Maaron pale izaa toozi. Pasaa, saawe to saveeŋ tane ighur anooŋa, ene ilam igharau wa. *Lu 11:28; 1Pe 4:7; Syg 22:7, 10
Rau tane iŋarui lupuuŋ liim ve ru to Krisi
4 Yau Yoan. Nabood rau tane ilat pa yam lupuuŋ liim ve ru to Krisi tau aleep izi taan sirivu to Asia na. Maaron toit, i ileep irau saawe. Ileep muuŋ geeg, ileep aazne, ve murei, i pale ilam. I tauu, tomania Yesu Krisi, ve Avuvu liim ve ru *Pai katini, isaav ighe Yoan isavia gabua liim ve ru, ene puughu tauvene. Gabua tana, sirivu mako. Ene gabua eemon, ve dodoli. Ve gabua tana poia kat ve duduuŋa mon. Le sosor eta mako. Zeran ŋgara siriv tighe avuvu liim ve ru tane tizaa to gabua dodoli eemon, ene Avuvu Patabuyaaŋ. Eemon ŋgara siriv tighe avuvu liim ve ru tane, ene aŋela liim ve ru tau timin daaba pa aŋela tisov.
tau tileep ila Maaron naagho igharau niia to ghamuuŋ pooz na, poia toozi pale izaa tsiam, ve tiŋgin gham aleep poia toman lolomim luuma. Onoon. 5 Yesu Krisi, i loolo eemon, ve ipariaaŋ saveeŋ onoon. Leso tamtamon tighur ila. I ta iburig pa mateegh imin maata. Ve i ta imuuŋ pa gabua naol isov, ve iŋginiir kinik tisov to taan. I loolo igheen toit kat. Tauta siŋ tooni imaliŋ pa sosor toit, ve ipas ghiit tavot pa saghati tapiri. *Mbo 89:27; Yo 18:37; 1Kor 15:20; Syg 19:16
6 Ve igham ghiit tamin i tauu le. Leso tatotoi pooz tooni pa tamtamon, ve tabees pa Taama Maaron imin zeran to watooŋrau. Yesu Krisi, i eeza tiina pa tapiri ve poia tooni, ve iŋgin gabua naol isov. Tauvene iit aat tapakuru ta aazne ve taghon taghon gha ila. Onoon. *Igham 19:6; 1Pe 2:9; Syg 5:10
7 Aghita. I pale ileep ila taitai ve ilam, ve tamtamon tisov tighita pa matazi.
Yes tau tiravu imaat na, pale tisov tighita paam.
Tauvene nughmariŋ to taan pale tighita, ve titaŋ tiina.
Onoon kat. Gabua tane pale ivot. *Dan 7:13; Sek 12:10; Mt 24:30
8 Tiina toit Maaron ileep irau saawe. Ileep muuŋ geeg, ileep aazne, ve murei, i pale ilam. I saksaki ve iŋgin gabua naol isov. I isaav ighe: “Yau naleep muŋgaaŋ, ve naleep murei geeg. Namin gabua naol isov puughu, ve yau ta napasov zi.” *Mbo 90:2; Is 41:4; Syg 22:13
Krisi ighur uraat pa Yoan ighe ibood saveeŋ tane
9 Yau Yoan, toŋvetaz tsiam. Yau namin etamim pasaa, Yesu igham ghiit tamin le, ve itiŋa taleep ila pooz tooni loolo wa. Tauta tamtamon tighurghur pataŋani pait. Eemon iit tayooz ariaaŋ pa badooŋ pataŋani tau ighamgham ghiit ne. Aazne, tiziir ghau nalam naleep izi sisi Patmos pasaa, navotia Maaron aliiŋa pa tamtamon, ve napariaaŋ zi to tighur ila to Yesu. *Mbaŋ 14:22; Ro 8:17; 2Tim 1:8, 3:12
10 Saawe patabuyaaŋ ee to Tiina toit, yau nasuŋsuŋ, ve Maaron Avuvu tapiri izaa tsiau. Ra nalooŋ bobaaŋ tiina ee ilam pa murig imin tavuur itaŋ. *Igham 19:16, 19-20
11 Isaav ighe: “Gabua tau yo ughit zi ne, ubood zi ila rau, ve uyambaara ila pa lupuuŋ liim ve ru to Krisi tau tileep izi nugh tane: Epesus, Smerna, Pergamum, Tiatira, Sardis, Piladelpia, ve Laodisia.”
12 Tauvene natoor ghau naghe naghita sei tau isavsaav payau. Saawe tau matag imuul, yau naghita lam aiazi liim ve ru tau tigharaat zi pa gol, 13 ve ŋeer ee iyooz ila bodbodaaŋ to lam aiazi tawe. Naagho imin Tamtamon Naatu. I inonogh ghi pa nonoghiiŋa malaua tau ipoon avaara le ila ipas aaghe puughu. Ve gabua milmilia tau tigharaata pa gol na ilivut gargari. 14 Daaba raua moom ve ipisosooŋ kat imin sipsip ooro, ma taitai pisosooŋa. Ve maata imin yav yaama. †Ziiri tane, ŋgara tauvene: Yesu ileep muuŋ ve ilam, ve i le ŋgar tiina kat. Ve i ighita gabua naol isov. Gabua eta irau iyooŋ pani mako.
15 Aaghe milmilia imin mbaras tau yav ighani le muun ighau ve iŋgalaaŋ kat. Ve aliiŋa, ene imin nugh tau yaa tiina iyatyaat izi toman luutu tiina. *Dan 7:9, 13, 10:5+; Syg 19:12
16 I ikis pitum liim ve ru ila niima tapir, ve mbuzaagh ee igheen ila aavo. Mbuzaagh tooni, maata kat. Ve mbuzaagh tawe, maata ru. Ŋeer tawe naagho isul imin aaz tau ighaaz kat. ‡Saveeŋ ziiri tane, ŋgara tauvene: Yesu maata pa lupuuŋ tooni, ve saveeŋ tooni imin mbuzaagh to iparav pani ve itatan ŋgar saghati. *Mt 17:2; Ep 6:17; Hib 4:12
17 Yau naghita ŋeer tawe le tapirig isov, ve natap izi aaghe puughu imin tamtamon tau imaat. Eemon i ikis ghau pa niima tapir, ve isaav payau ighe: “Uroi sov. Yau ta naleep muŋgaaŋ ve naleep murei geeg. Yau namin puughu pa gabua naol isov. Ve yau aat naŋgin zi tauvene le taan saawe. 18 Yau naleep matag yaryaare irau saawe. Muuŋ, yau namaat. Eemon ughita. Aazne, naleep matag yaryaare. Ve yau aat naleep tauvene le alok. Yau ta naŋgin mateegh ve nugh to yes mateegha. 19 Tauvene ubood gabua tau ughit zi ne. Gabua tane, aazne siriv tivotvot. Ve siriv pale tivot murei. 20 Pitum liim ve ru tau yo ughit zi tigheen ila nimag tapir ne, tomania lam aiazi liim ve ru, ene puughu yoŋgaaŋa. Puughu tauvene: Lam aia liim ve ru, ene izaa to lupuuŋ liim ve ru to Asia tau nawaat ezazi na. Ve pitum liim ve ru izaa to aŋela liim ve ru tau tiŋginŋgin lupuuŋ tawe.” §Grika tiwaat ‘mbaŋooŋa’ ila aliŋazi tighe ‘aŋela.’ Tauvene ŋgara siriv tighe aŋela liim ve ru tane tizaa to tamtamon liim ve ru tau tiŋgin lupuuŋ liim ve ru to Krisi tawe. Ve ŋgara siriv tighe aŋela tane, ene tamtamon liim ve ru tau lupuuŋ tawe timbaaŋ zi tila pa Yoan. Ve siriv tighe aŋela tane, ene aŋela duduuŋ tau tiŋgin lupuuŋ to Krisi tawe.
*1:3: Lu 11:28; 1Pe 4:7; Syg 22:7, 10
*1:4: Pai katini, isaav ighe Yoan isavia gabua liim ve ru, ene puughu tauvene. Gabua tana, sirivu mako. Ene gabua eemon, ve dodoli. Ve gabua tana poia kat ve duduuŋa mon. Le sosor eta mako. Zeran ŋgara siriv tighe avuvu liim ve ru tane tizaa to gabua dodoli eemon, ene Avuvu Patabuyaaŋ. Eemon ŋgara siriv tighe avuvu liim ve ru tane, ene aŋela liim ve ru tau timin daaba pa aŋela tisov.
*1:5: Mbo 89:27; Yo 18:37; 1Kor 15:20; Syg 19:16
*1:6: Igham 19:6; 1Pe 2:9; Syg 5:10
*1:7: Dan 7:13; Sek 12:10; Mt 24:30
*1:8: Mbo 90:2; Is 41:4; Syg 22:13
*1:9: Mbaŋ 14:22; Ro 8:17; 2Tim 1:8, 3:12
†1:14: Ziiri tane, ŋgara tauvene: Yesu ileep muuŋ ve ilam, ve i le ŋgar tiina kat. Ve i ighita gabua naol isov. Gabua eta irau iyooŋ pani mako.
*1:15: Dan 7:9, 13, 10:5+; Syg 19:12
‡1:16: Saveeŋ ziiri tane, ŋgara tauvene: Yesu maata pa lupuuŋ tooni, ve saveeŋ tooni imin mbuzaagh to iparav pani ve itatan ŋgar saghati.
*1:16: Mt 17:2; Ep 6:17; Hib 4:12
§1:20: Grika tiwaat ‘mbaŋooŋa’ ila aliŋazi tighe ‘aŋela.’ Tauvene ŋgara siriv tighe aŋela liim ve ru tane tizaa to tamtamon liim ve ru tau tiŋgin lupuuŋ liim ve ru to Krisi tawe. Ve ŋgara siriv tighe aŋela tane, ene tamtamon liim ve ru tau lupuuŋ tawe timbaaŋ zi tila pa Yoan. Ve siriv tighe aŋela tane, ene aŋela duduuŋ tau tiŋgin lupuuŋ to Krisi tawe.