2
Krisi aliiŋa iŋarui lupuuŋ to nugh Epesus
1 Ŋeer tawe isaav payau muul ighe: “Aŋela tau iŋgin lupuuŋ tsiau tau tileep izi nugh Epesus na, ubood saveeŋ ila pani tauvene:
‘Ŋeer tau ikis pitum liim ve ru ila niima tapir, ve ilaghlaagh ila lam aia milmilia liim ve ru sosozi na, aliiŋa ilat payo ighe:
2 ‘Ŋgar ve uraat tau yo *Saveeŋ tau Yoan iboode pa lupuuŋ liim ve ru to Krisi na, isaav ighe ughita saveeŋ ‘yo’ igheen ila, na ugham ŋgar ughe saveeŋ iŋarui tamtamon eemon sov. Saveeŋ tooni iŋarui tamtamon tisov to lupuuŋ eŋaeŋa.
ughamgham zi na, yau nawatagh zi tisov. Yo urav taum pa uraat tsiau, ve uyooz ariaaŋ pa badooŋ pataŋani. Ve yes tau tighamgham ŋgar saghati na, yo ughurghur zi mako. Ve yes tau titoom tighe yes mbaŋooŋa to Krisi na, yo ugabiiz katin zi ve ughilaal zi ughe yes zeran to karom. *2Kor 11:13; 1Yo 4:1
3 Pataŋani naol ivotvot payo pasaa, yo utaghon ghau ve uvotia ezag. Eemon umbuzir mako. Tinim izaa ve uyooz ariaaŋ. *Hib 10:36, 12:3+
4 ‘Eemon gabua ee, ta yau narere ghom pani. Ene vene: Saawe tau ughur ilam tsiau imin maata, lolom igheen tsiau kat. Eemon aazne, lolom payau geeg mako. 5 Matam iŋgal ŋgar tau muuŋ ughamghamu na. Pa aazne, yo utap tiina. Tauvene utoor ŋgar tsio, ve utaghon ŋgar tau papazoge ughamghamu na. Ighe mako, yau pale nalat ve napas lam tsio aia ighau pa niia. *Hib 10:32+
6 Ve ŋgar tsio ite tau yau naghita poia, ene vene: Yes tau titaghon eez ru imin Nikolas na, †Nikolas, i ŋeer ee tau isavsaav pa yes Kristen tauvene: Isaav ighe tipaak yes matazi dodoli pa ŋgar toozi, ma tighur boog, ma tighan aniiŋ tau tipakur maaron karomŋa pani, ene kaut sorok. Maaron irau maata ila pa ŋgar toozi tawe mako.
yo ughur koi pa ŋgar toozi tawe imin yau.
7 ‘Tamtamon tau ighe le taliiŋa, i aat ilooŋ saveeŋ tau Maaron Avuvu isasavia pa lupuuŋ to Krisi. Isaav ighe tamtamon eta iyooz ariaaŋ ve iliiv tovaaŋ, yau aat nayok pani to ighan ai anooŋa ila ai tau iyooz izi uum to Maaron loolo. Leso ileep maata yaryaare le alok.’ *Gnp 2:9, 3:22; Syg 22:2, 14
Krisi aliiŋa iŋarui lupuuŋ to nugh Smerna
8 “Aŋela tau iŋgin lupuuŋ tsiau tau tileep izi nugh Smerna na, ubood saveeŋ ila pani tauvene:
‘Ŋeer tau ileep muŋgaaŋ ve ileep murei geeg, aliiŋa ilat payo. I tau imaat ve iburig maata iyaryaar na, isaav payo ighe: *Syg 1:18
9 ‘Yau nawatagh: Pataŋani naol toman mbolaaŋ tiina igham ghom. Eemon yau naghit ghom naghe yo urau kat pa gabua naol to Maaron. Ve yau nawatagh: Yes Yuda siriv tau yamŋa alepleep na tiŋgalŋgal saveeŋ naol payo. Onoon, zeran tawe tipamir tauzi tighe yes Yuda. Eemon yes Yuda tauu mako. Yau naghit zi naghe yes lupuuŋ to Sadan. *Yo 8:39+; Ro 2:28+; Yems 2:5
10 Yau nasaav payo: Malau mako pale pataŋani ite paam ivot payo. Eemon uroi sov. Ŋeer Saghati pale ipazaagh tamtamon ve tighur tamtamon tsio siriv tiloŋ tila ruum to yavyavuuŋ. Pataŋani tana pale itoov ghuruuŋ ila tsiam. Eemoghon pale igham gham irau mboŋ saŋavul mon, ve isov. Isaav ighe akis ghuruuŋ ila tsiam tuŋia le saawe tsiam to mateegh, ene pale nagham lemim atuya to yes tau tiyooz ariaaŋ ve tiliiv tovaaŋ na. Atuya tawe, ene lepoogh to taleep mataan yaryaare le alok. *2Tim 4:8; Yems 1:12
11 ‘Tamtamon tau ighe le taliiŋa, i aat ilooŋ saveeŋ tau Maaron Avuvu isasavia pa lupuuŋ to Krisi. Isaav ighe tamtamon eta iyooz ariaaŋ ve iliiv tovaaŋ, i aat ileep poia. Pasaa, mateegh tau imin ru pani, ene irau igham gabua eta pani mako.’ *Syg 20:6, 14, 21:8
Krisi aliiŋa iŋarui lupuuŋ to nugh Pergamum
12 “Aŋela tau iŋgin lupuuŋ tsiau tau tileep izi nugh Pergamum na, ubood saveeŋ ila pani tauvene:
‘Ŋeer tau aliiŋa ilat payo na, mbuzaagh tooni maata kat. Ve mbuzaagh tawe, maata ru. I isaav payo ighe: *Syg 1:16
13 ‘Yau nawatagh: Sadan niia to ghamuuŋ pooz igheen izi nugh tau yo uleep pani na, ve i ighamgham uraat toman tapiri tiina ta sena. ‡Artaal tiina kat to maaron karom to yes Grika, eeza Zeus, iyooz izi Pergamum. Artaal tawe, ghitooŋa imin kinik niia to ghamuuŋ pooz. Ve rumei tiina ee to yes Roma iyooz izi Pergamum paam. Pasaa, yes Roma tighe tamtamon tisuŋ pa kinik to Rom, ve tipakuru imin i Maaron.
Muuŋ, tamtamon tsio ee, eeza Antipas, loolo eemon ve ipariaaŋ saveeŋ tsiau. Iroi mako, ve ighur muuri payau mako. Tauta tiravu imaat izi nugh tsiam. Eemon saawe tana, yo upul ghuruuŋ ila tsio mako. Ve aazne paam, yo ukiskis ezag soone.
14-15 ‘Eemon ŋgar tsio siriv, yau narere ghom pani. Pasaa, tamtamon tsio siriv titaghon ŋgar to Balam. Ene nasavia yes tau titaghon Nikolas tomania ziŋeera ŋgar toozi. Matam iŋgal. Muuŋ, Balam itotoi Balak pa eez to igherev yes Israela pa ghamuuŋ ŋgar saghati. Tauta igham zi titap pa ghuruuŋ ila toozi, ve tighur murizi pa Maaron gha tighan aniiŋ tau tipakur maaron karomŋa pani na, ve tighur boog. *Nam 22:5, 25:1, 31:16; 2Pe 2:15
16 Tauvene utoor ŋgar tsio. Ighe mako, yau pale nalat tsio rekia mon, ve naparav tomania zeran tawe pa mbuzaagh tau igheen ila avog ne. *Syg 1:16, 19:15, 21
17 ‘Tamtamon tau ighe le taliiŋa, i aat ilooŋ saveeŋ tau Maaron Avuvu isasavia pa lupuuŋ to Krisi. Isaav ighe tamtamon eta iyooz ariaaŋ ve iliiv tovaaŋ, yau aat nagham le aniiŋ manna yoŋgaaŋa tau ighengheen izi nugh sambam. Ve nagham le maet pisosooŋa ee tau tibood eeza paaghu ila. Eeza tawe, eta iwataghi mako. Tamtamon tau igham maet pisosooŋa tawe, i mon ta pale iwataghi.’ *Igham 16:14+; Is 62:2; Yo 6:48+; Syg 3:12, 22:4
Krisi aliiŋa iŋarui lupuuŋ to nugh Tiatira
18 “Aŋela tau iŋgin lupuuŋ tsiau tau tileep izi nugh Tiatira na, ubood saveeŋ ila pani tauvene:
‘Maaron Naatu, maata imin yav yaama, ve aaghe milmilia imin mbaras tau yav ighani le muun ighau ve iŋgalaaŋ kat. Aliiŋa ilat payo ighe: *Syg 1:14+
19 ‘Ŋgar ve uraat tau yo ughamgham zi na, yau nawatagh zi tisov. Yo lolom payau ve tamtamon paam. Ve ughur ilam tsiau ariaaŋ, ve ubesbees payau poi, ve uyooz ariaaŋ pa badooŋ pataŋani. Ve uraat tsio ta aazne, ene iliiv uraat tau ugham zi imin maata na.
20 ‘Ve gabua eemon ta yau narere ghom pani. Ene vene: Livaa saghati ee ileep tomani ghom. I iwaat tauu ighe i propet to Maaron. Eemon ŋgar tooni, ene imin Yezebel tau muuŋ ikaukau ŋgar to yes Israela na. Saveeŋ karom tau i ivovotia na, ene ipapaghau besooŋa tsiau pa eez tsiau. Tauta matazi saghati imin ŋgavuun, ve tighanghan aniiŋ tau tipakur maaron karomŋa pani na. Ve yo uneneeŋ pani mon. Ugham ŋgar eta pani mako. *1King 16:31+; Mbaŋ 15:29; 1Kor 10:19+
21 Yau naghur sooso pani naghe itoor ŋgar tooni ve ipul ŋgar tooni to ghuruuŋ boog. §Saveeŋ tane, aat saveeŋ palelaaŋ. Saveeŋ ziiri naol to buk tane tau isavia ŋgar to ghuruuŋ boog, ene ŋgara tauvene: Tamtamon tighur murizi pa Krisi ve tibees pa maaron ite paam, imin livaa tau ipul azaawa ileple, ve ighur boog tomania tamoot ite. Livaa saghati tau Krisi isavia na, ighegherev yes Kristen to nugh Tiatira gha tibesbees pa maaron karomŋa siriv, imin muuŋ kinik Ahab azaawa Yezebel igherevu gha ipul muuri pa Yoova, ve ibees pa maaron karom Baal.
Eemon i loolo pa itoor ŋgar tooni ve ipul ŋgar saghati tawe mako. *Ro 2:4; Syg 9:20+
22 Tauvene yau aat nagham moroghooŋ saghati ivot pani. Ve yes tau tipaako pa ŋgar tooni saghati na paam. Isaav ighe titoor ŋgar toozi mako, ene aat naghur pataŋani tiina iŋarui zi. 23 Ve Yezebel natŋa paam, *Yezebel natŋa, ene yes tau tipaako pa ŋgar tooni.
yau aat narav zi tisov timataar. Leso lupuuŋ to Krisi tisov tiwatagh tighe yau natirtiir tamtamon lolozi ve ŋgar toozi. Ve yau aat naghur atuya iŋarui yam eŋaeŋa itaghon ŋgar tsiam tsiam. *Mbo 7:9; Ro 2:6; 2Kor 5:10; Syg 20:12+
24 ‘Eemon yam siriv to nugh Tiatira ataghon Yezebel ŋgar tooni mako. Ve saveeŋ tooni tau tiwaato tighe “Sadan ŋgar tooni yoŋgaaŋa” na, yam awataghi mako. Tauvene yau nasaav payam naghe: Irau naghur pataŋani ite paam izaa tsiam mako. 25 Eemon yam aat ayooz ariaaŋ, ve akis ŋgar to Maaron tau igheen tsiam na tuŋia, le saawe to namuul nalam.
26-28 ‘Isaav ighe tamtamon eta iyooz ariaaŋ ve iliiv tovaaŋ, ve itaghon ŋgar tsiau le indeeŋ saawe tooni isov, ene aat naghur nugh nugh tileep ila i saamba ve igham pooz pazi, imin Tamaŋ Maaron ighur zi tileep ila yau sambag. Ve pooz tooni pale ariaaŋa kat. I pale irav matin zeran sasaghati tapirizi, imin tamtamon tau irav valaghin uur gha imbiriis ŋgiira ŋgiira. *Mbo 2:8+; 1Kor 6:2+; Syg 20:4
Ve yau aat nagham pitum zauŋa to mboŋoozo pa tamtamon tana paam. †Pitum zauŋa to mboŋoozo, ene izaa to Krisi ve saawe paaghu tau pale ivot pa Mboŋ Murei. *Nam 24:17; Is 60:1-3; 2Pe 1:19; Syg 22:16
29 ‘Tamtamon tau ighe le taliiŋa, i aat ilooŋ saveeŋ tau Maaron Avuvu isasavia pa lupuuŋ to Krisi.’
*2:2: Saveeŋ tau Yoan iboode pa lupuuŋ liim ve ru to Krisi na, isaav ighe ughita saveeŋ ‘yo’ igheen ila, na ugham ŋgar ughe saveeŋ iŋarui tamtamon eemon sov. Saveeŋ tooni iŋarui tamtamon tisov to lupuuŋ eŋaeŋa.
*2:3: Hib 10:36, 12:3+
†2:6: Nikolas, i ŋeer ee tau isavsaav pa yes Kristen tauvene: Isaav ighe tipaak yes matazi dodoli pa ŋgar toozi, ma tighur boog, ma tighan aniiŋ tau tipakur maaron karomŋa pani, ene kaut sorok. Maaron irau maata ila pa ŋgar toozi tawe mako.
*2:7: Gnp 2:9, 3:22; Syg 22:2, 14
*2:9: Yo 8:39+; Ro 2:28+; Yems 2:5
‡2:13: Artaal tiina kat to maaron karom to yes Grika, eeza Zeus, iyooz izi Pergamum. Artaal tawe, ghitooŋa imin kinik niia to ghamuuŋ pooz. Ve rumei tiina ee to yes Roma iyooz izi Pergamum paam. Pasaa, yes Roma tighe tamtamon tisuŋ pa kinik to Rom, ve tipakuru imin i Maaron.
*2:14-15: Nam 22:5, 25:1, 31:16; 2Pe 2:15
*2:16: Syg 1:16, 19:15, 21
*2:17: Igham 16:14+; Is 62:2; Yo 6:48+; Syg 3:12, 22:4
*2:20: 1King 16:31+; Mbaŋ 15:29; 1Kor 10:19+
§2:21: Saveeŋ tane, aat saveeŋ palelaaŋ. Saveeŋ ziiri naol to buk tane tau isavia ŋgar to ghuruuŋ boog, ene ŋgara tauvene: Tamtamon tighur murizi pa Krisi ve tibees pa maaron ite paam, imin livaa tau ipul azaawa ileple, ve ighur boog tomania tamoot ite. Livaa saghati tau Krisi isavia na, ighegherev yes Kristen to nugh Tiatira gha tibesbees pa maaron karomŋa siriv, imin muuŋ kinik Ahab azaawa Yezebel igherevu gha ipul muuri pa Yoova, ve ibees pa maaron karom Baal.
*2:23: Yezebel natŋa, ene yes tau tipaako pa ŋgar tooni.
*2:23: Mbo 7:9; Ro 2:6; 2Kor 5:10; Syg 20:12+
*2:26-28: Mbo 2:8+; 1Kor 6:2+; Syg 20:4
†2:26-28: Pitum zauŋa to mboŋoozo, ene izaa to Krisi ve saawe paaghu tau pale ivot pa Mboŋ Murei.
*2:26-28: Nam 24:17; Is 60:1-3; 2Pe 1:19; Syg 22:16