Apasol ai kaua
Pariverena
Luke ana buka i giruma vorovei ma muriai Apasol ai kaua bukana i girumi. Tauna ana ano ḡaeḡaena lamna i ḡoei da rava ita vieḡei da menanare Arua Vivivireina Iesu ana tauvotaḡotaḡo i rau-etaraveni da Riwana Aiaina ita vituai,
Au Jerusalem ma au Judea au anatapuna ma au Samaria ma dobu au gia dewadewana.
(1:8)
Kerisiana ai babara ma ai nola i babaniei. Mai Jew awarii i vikarei ma i nae da dobu anatapui i vitumaḡana. Tauamgiruma ana nota ḡaeḡaena da wei bukana tauiavana ita pariverei da kerisiana avena Rome gabemanina ita viviḡaviei. Kerisiana vitumaḡanana lamna mai Jew ai vitumaḡana e kaukauana-paiei. Wei bukana i ḡutai da raḡaraḡana tonuḡa, ma e viviatataieta da dobu au anatapuna Iesu Riwana Aiaina i jimei ma ekalesia i vitupui:
Iesu ana ḡae au murina Ekalesia au Jerusalem ai nola i vikarei;
Palestine taun ḡelaui awari i tua-nae;
Ma i tua-nae au Mediteranean da i nae au Rome paratana. Wei bukana ana kaua ḡaeḡaena lana Arua Vivivireina i nolanola, ma rewapana tauvitumaḡana au Jerusalem i verei au Pentecost. Ma wei au bukana i vieḡeta da Arua vivivireina mara nonoa agu ma rewapana ekalesia ma ai babada i verei ai au aninola au anatapuna. Wariaḡa kerisiana ai pariverena i tere-tagogiei raugugula au maḡamaḡaui, ma kaua ma ai nola i kaukauei anatapui. Wei au bukana i girumi da wei parivai-nuaḡanana ana rewapana tauvitumaḡana ai au lawana ma kerisiana ai au voepaepa i viatataieta.
Buka rereḡana 1.
Vokaukaua tauvimatamata aubai (1:1-26)
Iesu ana tarawatu ma ana parivainuaḡana damona (1:1-11)
Judas Epaiana (1:12-26)
Tauvimatamata au Jerusalem (2:1—8:3)
Tauvimatamata au Judea ma Samaria (8:4—12:25)
Paul ana nola (13:1—28:31)
Paul ana vaḡai tagogi (13:1—14:28)
Boru au Jerusalem (15:1-35)
Paul ana vaḡai viruaina (15:36—18:23)
Paul ana vaḡai vitonuina (18:24—21:16)
Paul i vipanipani au Jerusalem, Caesarea, ma Rome (21:17—28:31)
1
Iesu ana Apasol i parivainuaḡani
1 Egualau Theophilus, buka au naona a girugirumia*Bukana au naona i girugirumi lamna Luke ana Gospel lamna Iesu ana tupua ma ana nola i vikarei da i kaukauei ma i viviararamana a pariverem 2 i nae da ana ḡae au marana. Muriai da Iesu i ḡaiei au mara, Tauna Arua Vivivireinei ana apasol vinevinei riwa bagibaginei i pariverei. 3 Iesu ana iraḡe au murina i vieḡana-melei ana apasol awarii. Ma kaua maḡamaḡaui i kauei da apasol i vitumaḡana kaua da Tauna anina i lawana me. Taui awarii i eḡa au pom 40 au orana ma God ana vigulau i babaniei. 4 Maranai ana apasol maiteni i vitagogiei ma i riwana-guratei i pa, “Eḡa Jerusalem ona oputawanei, wate pulona amau i paripari-vainuaḡanimi ona paini, maraotai a ririwemi nanare. 5 ✡Mrk 1:8John wairei i babataito, wate mara aburuna ava Amau, Arua Vivivireinei taumi ina babataitomi.”
God Iesu i ḡaiei au Mara
6 Muriai maranai Iesu ma Apasol i vitagogiei ma taui Iesu i vitara-virevirei i pa, “Bada! Marina, Israel ana†Rome gabemanina Juda i vibadei wei au marana, Mai Jew wei eḡa ita ḡoei, ma i ḡoei da ita virai. vigulau ma vere-melei bo?”
7 Ma Iesu i paribelei, “Amau ainelana ana rewapanei mara ma iri e vivibadei, aubaina da taumi eḡa ona aramanei. 8 ✡Mrk 16:15Wate maranaina Arua Vivivireina au orami ina rui, maranaina taumi rewapana ona vaia. Ma aubaiu ona vitaunola au Jerusalem, Judea, au Samaria ma dobu au anatapuna.” 9 ✡Mrk 16:19I babani vorovei ma au matai God Iesu i ḡaiei au mara. Ma apau i nei da i purui ma taui eḡa ita inana-melei.
10 Ma taui i ḡoḡouta au mara ma nelara ruaḡa ai gara ararapoiri au ririvai i raumairiei. 11 Ma i riwa, “Mai Galili, aiwai weka o maimairiei ma o ḡoḡoutatei? Wei ravana menanarena o inanai i ḡaenei, amapo nanare ina nememei.”
Judas epaiana i vinei
12 Anina ma Apasol Ola Olive, i voterei ma i ḡaira me au Jerusalem lamna eḡa uama ma au ḡereḡere. 13 ✡Mrk 3:16-19Ma au Jerusalem i ḡeta ma i ḡae numana i mamae lana au tepana au vatavatara. Taui ai wava, Peter, John, James ma Andrew, Philip ma Thomas, Batolomeo ma Matthew, James - Apius natuna, ma Simon tauna au naona Zealot‡Rava ununurana. Wei ravai mai Rome ai gabemani e viviḡaviei. ma Judas - James natuna. 14 Ma wei ravai mara patapatana i vivitagogiei ma i raraupari gogona, waivine ḡelaui ma Iesu ana roaroa ma aloi Mary maiteni kampa.
15 Wei au marana, tauvitumaḡana 120 i vitagogiei ma Peter i vomairi ma wenanare awari i babani, 16-17 “Varevareiu, Judas Iskariot lamna turata tagogi ma maiteni ta nola gogona, wate muriai i voagu da Iesu i pani. Arua Vivivireina wei riwana wariaḡa gulau David i riwei da ina tupua; ma aiwai i ririwei anina nanare i tupua.” 18 Judas Iesu i amverenei mane vainana aubaina, ma wei manenei doa i gimarai. Ma nai au doana tauna kolanei i peu ma manawana i wanawamai da amoamona i opu. 19 Ma rava anatapui au Jerusalem wei iraḡena riwana i nonori, lamna aubaina taui nai dobuna ai ponei i viwavai Hakeldama, wei anona Tara Doana.
20 “Wariaḡa Gulau David i girugirumia, nanare i tupua,
Ana animae ina kwakwava,
ma eḡa aiai au orana ina mae. (Psalm 69:25)
Ma
rava ḡelauna ana nola ina vaia. (Psalm 109:8)
21 ✡Mrk 1:9; Mrk 16:19Lamna aubaina marina awarita, rava ḡelauna tana vinei da ina raviepaiai. Tauna ravanana Iesu maiteni ta bababara-nae madeḡa tonuḡa au orana, 22 John rava i babataitoi au marana ma i nae da Iesu i ḡaiei au mara. Ma maiteni tana nola ma rava tana riwei menanarena God Iesu iraḡelei i vovaimairini.”
23 Ma taui rava ruaḡa i vinei, Joseph-Barsabas (ana wava ḡelauna Justus) ma Matthias. 24-25 Anina ma taui i raupari, “Bada tam rava anatapui orai u aramanei. Ma vieḡelai da wei ravai ruaḡa, ma metauna u vinei da Judas ana gabu ina vaia da ina viApasol, aubaina Judas i voterelai da i nae ana au gabu.” 26 Anina ma taui i vine, ma vinevine Matthias awarina i peu, ma tauna i vi-Apasol, ma Apasol 11 au orai i rui. §Wei kalona wenanare: mai Jew wava ḡaima muomuoi awari i girugirumi ma e tawatawanei, ma aiai ana namba i eḡa lamna tauna ina vaia. Taui i vitumaḡana da wei kauana awarinei God taui ina viatataiei da aiai ita vinei. (Pro 16:33)
*1:1: Bukana au naona i girugirumi lamna Luke ana Gospel
†1:6: Rome gabemanina Juda i vibadei wei au marana, Mai Jew wei eḡa ita ḡoei, ma i ḡoei da ita virai.
‡1:13: Rava ununurana. Wei ravai mai Rome ai gabemani e viviḡaviei.
§1:26: Wei kalona wenanare: mai Jew wava ḡaima muomuoi awari i girugirumi ma e tawatawanei, ma aiai ana namba i eḡa lamna tauna ina vaia. Taui i vitumaḡana da wei kauana awarinei God taui ina viatataiei da aiai ita vinei. (Pro 16:33)