2
Arua Vivivireina i ḡairai
1 Pentecost torelana i ḡetai ma tauvitumaḡana anatapui numa tagogi au orana i vitagogiei. *Mai Jew ai Raḡona torelana au murina au pom 50 ma Pentecost torelana e vivikarei. Wei riwana anona amapo wei bukana au damona ona iavi ma ona aramanei.
2 Maratagogi gugura ḡaeḡaena, nonorana me ive vivirewapanana marei i ḡairai ma tauvitumaḡana i mamae numana i vioai. 3 Taui purapura inanana me ai menamenana i ʼnanai, i ḡairai ma rava tagotagogi ava au kolai i kiala. 4 Ma Arua Vivivireina anatapui i vioai ma pona taputapunei ava i bababani Arua ana aguei.
5 Nai maranaina mai Jew patupatutui dobu au anatapuna i vitaomana au Jerusalem da Pentecost torelana ita apui. 6 Ma patarai kampa i viruberubei, ma i nonori da gugurana lamna tauvitumaḡana taui tagotagigiava ai ponei i bababani ma taui ai nota i kwa. 7 Taui anatapui i baei ma taui ava i babani vivira i pa, “Wei mai Galili bo? 8 Ma menanarena da anataputa awarita ata ponei e bababani! 9-10 Tauta ḡelauta mai Parthia, Mede ma Elam, ma mai Mesopotamia, Judea, Capadosia, Pontus ma Eisia, Pirijia, Pamphilia, Egypt ma Libya navanavana, au Sairini au ḡereḡerena, ma ḡelauta mai Rome, 11 ḡelaui mai Jew ma ḡelaui Jentail wate inibori i vaia da i vimai Jew. Ma ḡelauta mai Crete ma mai Arabia. Wate God kaua ḡaeḡaena i kaukaueia, ata ponei i bababaniei ma ta nononori!” 12 Taui anatapui i vinuanaina, nuanuai i raḡaraḡa ma i bababani vivira, “Wei aiwai kauana e tuputupua?”
13 Wate ḡelaui taui i vinamei i pa, “Wei ravai i uma bua!”
Peter rava awarii i raugugula
14 Anina ma Peter i vomairi Apasol 11 maiteni, ma ponana ḡaeḡaenei patara awarii i babani,
Au rava mai Jew ma anatapumi au Jerusalem maemaemi, babani ana tere-kauei da ona aramanei. Ona rautaniḡana kaua. 15 Wei marinaota, 9 kilok ubaubanai! †Mai Jew taui au bigai sia e aniani ma wain e umaumai. Wei ravai eḡa ita uma bua me taumi o notanotai nanare,
16 Wei lamna wariaḡa peroveta Joel i ririweia e tuputupua:
17 Mara au damona,
Aruau rava anatapui awari ana iwaḡi.
Ma natunatumi nelarai ma waivinei riwau ina jimei,
ma nelara voui mataiei kaua ina inanai,
ma babada magumaguri rauboniei kaua ina inanai.
18 Wate nanare, Aruau ana iwaḡi au taunola nelarai ma waivinei awarii,
ma ina vitaubabani.
19 Ma kaua babai au mara ana kauei,
ma au dobu mataira ana vieḡai
ai araratana, tara ma bau potopotona.
20 Ma madeḡa ina waguvarei
ma nawaravi ina ravitaratarai,
muriai da Bada ana mara ḡaeḡaena ma boruborumana ina nei.
21 Nai au marana aiavoi da Bada awarina e viviḡore agu aubaina Bada taui ina vilawani. (Joel 2:28-32)
22 Ma Peter i babani me:
Mai Israel ona rautaniḡana: God Iesu Nasaretei i vovai-virewapani da kaua babai, ma mataira ḡaeḡaei i kauei da ita viatataiemi da tauna anina Godei i nei. 23 ✡Mrk 15:24Wate God wariaḡa i viogei ma ana ḡoana nanare da Iesu au urami i terei, ma taumi ḡoʼapoapoe ravai ai aguei, Tauna au korosi o tuparatui da o viraḡeni. 24 ✡Mrk 16:6Wate God, Iesu iraḡelei i vovaimairini, ma iraḡe iniviarana i vaitawanei ma iraḡe eḡa tagotagogina da tauna ita vojijini. 25 Wariaḡa David Iesu i bababaniei maranai i riwa:
Tau a inanai Bada God au naou mara au anatapuna.
Tauna au oieu lamna aubaina eḡa ana rovo.
26 Lamna aubaina nuaiai orau i oai ma menau i morelana,
ana iraḡe ma a aramanei da tupuau ma paina-kauei.
27 Ma aruau eḡa rava irairaḡei ai au dobu ma voterei,
ma tam eḡa am taunola vivivireina tupuana ma voterei da ina buda.
28 Tam lawana etanaina u viatataieu,
ma Tam maiteni a mamae ma a vinuaiai kaua. (Psalm 16:8-11)
29 Au rava, A riwana-kauemi da amata gulau David iʼraḡe da i doboi, ma ana kokoaga weka e mamae. 30 ✡2Sa 7:12-13Wate David lamna peroveta, ma i aramanei da God i parivainuaḡani da ana damei gulau ina opu, me tauna nanare. 31 Ma David i ʼnanai God muriai aiwai ina kauei ma i riwa,
Keriso ina vomairi me,
ma tupuana eḡa rava irairaḡei ai au dobu ina voterei da ina buda. (Psalm 16:10)
32 Ma God Iesu-na tagogina iraḡelei i vovaimairini, ma tauai anatapuiai a vimatamata. 33 Ma God i ḡaiei ma au oiena i vikialai. Ma Arua vivivireina i verei me i parivainuaḡana nanare, ma nai Aruana tagogina Iesu awariai i waḡi, lamna marina o nononori ma o inainanai. 34 ✡Psa 110:1David eḡa ita ḡae au mara, ma wate i riwa, Bada au Bada i riwei, “Au oieu ma kiala 35 ma am ḡavia au ae karem ana terei. (Psalm 110:1)
36 Lamna aubaina mai Israel anatapumi ona aramana-kauei da wei ravana Iesu o tupatuparatuia, God i terei da Bada ma Tauvilawana.
37 Ma maranai rava wei riwana i nononori, taui orai i rautonai da Peter ma Apasol ḡelaui i riwei, “Varevareiai, tauai aiwai ana kauei da ana lawana?”
38 Ma Peter i paribelei, “Taumi tagotagogi ava Iesu Keriso wavanei ona rupena ma ona babataito ma ami ḡoʼapoapoei ina nota-tawanei, ma God ana pulo Arua Vivivireina ona vaia. 39 Wei parivai-nuaḡanana lamna taumi natunatumi maiteni aubaimi. Ma wate nanare mai jentail - aiavoi da e kwatukwatuei ina nei Tauna awarina.”
40 Ma Peter riwa ḡelaui maiteni rava i vinua-terenei, ma i egari, “God ona vianinei da ina vilawanimi, ma eḡa kovoḡa ona vaia.” 41 Ma rava maḡamaḡaui Peter ana babani i vitumaḡanei ma i babataito ma nai au marana rava 3,000 ai au boru i rui.
Tauvitumaḡana i mae gogona
42 Ma tauvitumaḡana Apasol ai viararamana i nononori, ma i viboruboru, i amam ma i raraupari gogona. 43 Apasol kaua babai ma mataira ḡaeḡae maḡamaḡaui i kaukauei ma anatapui i rovo ma God i vivirana-kauei. 44 ✡Act 4:32-35Ma tauvitumaḡana anatapui gabu tagogi i vivitagogiei ma aiwai ḡariei ai rava maiteni i ḡutaḡutai. 45 Taui ai doa, ai numa, ai wapu ma ai purapura i gimagimarei ma manena ai rava ḡelaui maiteni i ḡutaḡutai. 46 Taui mara patapatai au tempol i vivitagogiei, ma ai au numa ana nuaiaii ma ana morelanai i amam gogona. 47 Ma taui God i vovoepaepai ma rava anatapui i vivinuaiaini. Ma marana patapatai rava voui i neneiai Iesu awarina ma tauvitumaḡana ai boru i viviratai.