20
Paul i nae au Masedonia ma Greece
1 Vikaruwaḡawaḡa au Ephesus taon i kwa ma au murina Paul kerisiana i raukwatueiai da i vinua-terenei, i viegualauei ma i netawanei da i nae au Masedonia provins. 2 Ma dobuna ḡaeḡaenana i naeni ma kaua maḡamaḡaui kerisiana i vinua-terenei. Anina ma au Akaia*Marina e ḡoreḡorei Greek. i ḡeta. 3 Kampa nawaravi tonuḡa i mae. Tauna i vokaukaua da ita nae au Syria ma wate i nelaḡai da mai Jew ḡelaui viraḡenana i viviogatarei lamna aubaina da i nae me au Masedonia. 4 Nelara ḡelaui i votaḡotaḡo taui lamna Piras natuna Sopater ana dobu Berea; Aristakas ma Sekundus, mai Thesalonika, ma Gaius tauna ana dobu Derbi; ma Tijikus ma Trophimus ai dobu Eisia provins; ma Timothy. 5 Taui wagei i ainae au Troas ma kampa i painiai. 6 Ma palawa bagibagina torelana au murina, wagei Philipai taon au Masedonia provins a netawanei. Ma aupom 5 au murina au Troas a ḡeta ai rava awari, kampa aupom 7 a mae.
Au Troas, Paul Eutikus iraḡelei i vovaimairini
7 Wiki au karena - Sunday tauai a vitagogielai voepaepa ma Bada ana amgogona aubaina, ma kampa Paul i jima da nubautuva, aubaina maratomna da ita nae. 8 Numa vatavatara au tepana a vitagogielai, ma kampa rampa maḡamaḡaui i ararata. 9 Oroto laragana wavana Eutikus au windo i kiakiala ma Paul i raraugugula, ma tauna matana i pota kaua da i raunuavuru, ma kampa au tepa dewadewana i peu-ḡaira da au doa i rauei. Maranai taui i ḡaira da ita voepai, tauna irairaḡena. 10 Paul i ḡaira, i matave-tepani ma i rapai ma rava i riwei i pa, “Eḡa ona vinuabola, tauna lawalawaina!” 11 Anina ma Paul i ḡae me au numa ma kerisiana maiteni Bada ana amgogona amna i ani ma awari i babani maratom. Ma Paul nai dobuna i netawanei. 12 Taui laragana lawalawaina i naiei au numa ma rava orai i rauei.
Paul i amkuka au Miletus
13 Paul aenei i nae au Assos ma tauai i riwelai da wagei ana nae au Assos da tauna kampa ana vigerui. 14 Ma au Assos a vigerui ma a nae au Miletus 15 Maratomna bonabona Kios au ḡereḡerena a nae. Ma marana i tom au Samos a ḡeta, ma maratom ḡela au Miletus a ḡota. 16 Paul i ḡoei da jijimanina ina nae ma avena ita rui au Ephesus, eḡa ita ḡoei da au Eisia provins ina mae-guratana. Tauna i vipaparana ma mepa da tagotagogina au Jerusalem ina ḡeta muriai da Pentecost torelana.
Paul kerisiana au Ephesus i netawanei
17 Au Miletus Paul riwa i paritawanei au Ephesus taon kerisiana babadai awari da ita nebelei. 18 Maranai au Ephesus taon i ḡetai ma taui i riwei i pa:
O aramanei au lawana menanare maranai vovounai weka au Eisia provins a ḡetai. 19 Mai Jew i ḡoei da ita rau-iviapoapoeleu wate tau a vilamolamona ma ana toutou Bada awarina a vivitaunola. 20 O aramanei da maranai God Riwana Aiaina awarimi a raugugulei, riwa aiaina aniaguimi eḡa ata tajijini. Au deba a raraugugula rava maḡamaḡaui au naoi, ma ami au numa a viararamanimi 21 Riwa bagibagina mai Jew ma Jentail a verei, A riwei da ita rupena ma ita mae-tavirei God awarina ma Iesu ita vitumaḡanei.
22 Ma marina Arua Vivivireina i riweu da ana nae au Jerusalem. Eḡa ata aramanei kampa aiwai awariu ina tupua. 23 Wate taon nununai awari a nenae ma Arua Vivivireina e vivieḡeu da amapo ina paniu ma au deri ina tereu ma ina rau-iviapoapoeleu. 24 Ma mepa da ina viraḡeniu, wei lamna eḡa kaua ḡaeḡaena tau awariu. Wate kaua ḡaeḡaena lamna Bada Iesu nola i verevereu da ana vikwai. Wei nolana lamna, God ana iviaiai maemaena, riwana ana raugugulei.
25 Maḡamaḡaumi awarimi a nei ma God ana vigulau a raugugulei wate marina a aramanei da amadodo da i nenae, naou eḡa ona inana-melei. 26-27 God ana vilawana ogatarana rava aubaii eḡa ata govaḡi awarimi lamna aubaina riwa bagibaginei a ririwemi da mepa da rava au babani eḡa ina vitumaḡanei ma ana lawana maemae-nonoana ina vine-boai, lamna eḡa tau au wavu. 28 Taumi babada ma ona paina-melemi, nanare tauvitumaḡana taui aiavoi da Arua vivivireina au urami i teretereia. Ona inana-vaitetei me sipu taupainana ana sipu e paipaini. Taui lamna God ana vinevine taranei i gimarai. 29 A aramanei da ana nae ma au muriu tauraugugula morumorui ina nei awarimi ma rava ai tumaḡana ina viapoapoeni, me auou moduei sipu au boruna viraḡena aubaina. 30 Ma rava ḡelaui ami au dam oina ina vomairi ma ina viararamana ma moruei rava orai ina taini da taui ina votaḡotaḡoi. 31 Lamna aubaina matami ina kala ma ona aramanei da madeḡa tonuḡa marai ma waguvarai a notanotaimi ma ana toutou a viviararamanimi.
32 Ma marina God au urana a tereteremi. Ana agu e verevereoimi ona vivitumaḡanei. Wei aguina e vovaivirewapanimi, ma ami pulo ina veremi, aubaina taumi God natunatuna viaiainai. 33 Ma tau eḡa rava ana mane bo ana purapura ata rauoḡarei 34 Taumi o aramana-kauei da tau nimauei a nola da mane a vaia da tau au taubagibagi turau aubaiai. 35 Nanare, a viatataiemi da ona nola guratana da mane ona vaia ma molaka ona voagui. Iesu ana babani eḡa nuanuami ina vuru, Tauna i riwa i pa, “Verena i ai kaua eḡa me vainana.”
36 Paul i babani vorovei ma anatapui i mae-ḡaira au doa ma i raupari. 37-38 I vinolanola i pa, “Amapo eḡa naou ona inana-melei.” Wei riwana i vinuabolai da i vitouana, Paul i taragwabai ma i vigia-laḡolaḡonei. Ma i naiei da au waga i vigeruei.