1 Ephesus kerisiana babadai a viegualauei ma wagei jijimanina a nae au Cous bonabonana ma ubaubanai a nae au Roudes bonabonana, kampa da a damana au Patara taon. 2 Weka waga ḡelauna i nenae au Phonisia a gerui, 3 da au Saipras bonabonana a rubatawanei, au kelakelauai da a nae au Taia au Syria provins a ḡota, da purapura ita viopuni. 4 Kampa tauvitumaḡana a baiei ma aupom 7 maiteni a mae. Arua Vivivireina kerisiana i riwei da Paul awarina aiwai ina tupua, ma lamna aubaina Paul i viḡaei da eḡa ina nae au Jerusalem. 5 Ma mara i ḡetai da ata vomairi, kerisiana awawai maiteni da natunatui taon i voterei ma anatapuiai a ḡaira au gera, a raupari gogona. 6 A viegualau da tauai au waga a geru ma taui i nae-me ai au numa.

7 Au Taia ma a nae au Tolemais taon a ḡeta. Tauvitumaḡana kampa a nebelei ma aupom tagogi maiteni a mae. 8 ✡Act 6:5; 8:5Ma marana i tom ma dobuna a voterei ma a nae au Caesarea, kampa God riwana taujimeina Philip ana au numa a mae, tauna oroto vi-7-na au Jerusalem i vinevinei da lam taupainina. 9 Tauna natunatuna waivinei 4 eḡa tavitavinei, taui God ana riwa i vivieḡai rava awari.

10 ✡Act 11:28Aupom vomaḡaui i kwa, kerisiana wavana Agabas, tauna nanare God riwana i vivieḡai, Judeaei i ḡairai au Caesarea. 11 Ma i nei awariai da Paul ana tairoro i vaia ma tauna urana ma aena i raḡina-melei ma i riwa i pa, “Arua Vivivireina e ririwa, da Jew babadai wei tairorona taniwagana wenanare ina raḡini, ma Jentail au urai ina terei.”

12 Maranai wei riwana a nonori, tauai kerisiana ḡelaui maiteni Paul a vibaḡana-guratei, da avena ita nae au Jerusalem. 13 Wate i pa, “Aiwai aubaina o vivitouana ma orau o viviapoapoeni! Tau a vokaukaua nonoa da ina raḡiniu, wate eḡa lamna ava ma ina viraḡeniu au Jerusalem, Bada Iesu a vovotaḡotaḡoi aubaina.” 14 Tauai a viviḡaei ma eḡa tagotagogina da nuanuana ata sinavirai lamna aubaina riwanana a voterei ma a riwa a pa, “Bada ana ḡoanei nanare ina tupua.”

15 Wei au murina a vokaukaua ma a vomairi au Jerusalem. 16 Kerisiana ḡelaui mai Caesarea I naielai Nason ana au numa ma kampa a mae. Tauna oroto Saiprasiei, ma Iesu votaḡona i vikareni maranaina rava vouvounai i vikarei da Iesu Riwana Aiaina i rarau-gugulei.

17 Maranai au Jerusalem a ḡeta kerisiana ana nuaiaii i nebelelai. 18 Maratom ḡela Paul maiteni a nae da*Wei lamna Iesu ana tevera. Act 12:17; 15:13 ma Mrk 6:3 James a raugenari,†Mane anatapui ai au vaḡai i tami bo rava i puloi i verei damanai mane taupainina i verei dogadogara anatapui kampa. 19 Paul taui i viegualauei ma ana au vaḡai God aiwai i kaukauei Jentail awari anatapuna taui i pariverei.

20 Maranaina wei riwai i nonori, taui God i voepaepai ma Paul i riwa i pa, “Turaiai u aramanei mai Jew ai maḡa tausan nanare weka Iesu e vivitumaḡanei, ma God ana tarawatu e vovotaḡo-kauei. 21 Wate rava Jew kerisiana weka au Jerusalem am kaua i vibenabenaei, da tam Jew Jentail maiteni e mamae e viararamani da Moses ana tarawatu ina gedugeduaiei. Ma u riwei da natunatui ini eḡa ina bori ma ai kaua ḡelaui eḡa ina votaḡotaḡoi. 22 Taui i aramanei da tam u ḡetai, Marina aiwai tana kauei? 23 Aiwai a ririwemi ona kauei. Au nelara 4, taui parivainuaḡana bagibagina God awarina i kauei. 24 Ma taravaini ma ona nae au Tempol ma ona viaiaina-melemi ma ma vimaia da taui ai viaiaina pulona ina kauei. Anina ma taui kolai ina ḡari ma rava anatapui ina aramanei da tam Moses ana tarawatu anina e vovotaḡotaḡoi, ma babani au naona lamna anatapuna moru kaua. 25 ✡Act 15:29Ma Jentail marina i vivitumaḡana aubaii pepa a girumi ma wenanare a riwei, sia e pulopuloei kokoitau awarii eḡa ina ani, Tara eḡa ina umai, Rava ḡamoḡamo uai e kikiki tarai eḡa ita toi-tawanana, eḡa ona ani. Eḡa ona viawawana labalababa.”‡Viawawana labalababa wei anatapuna e vaivaipai: Rava ḡela awana oroto bo wavine maiteni e viawawana (Exo 20:14, Deu 5:18); Rava ḡela maiteni e viawawana mane bo purapura aubaina (Lev 19:29, 1 Cor 6:15); Natuoim maiteni e viawawana, me oroto natuna wavinena maiteni bo wavine natuna orotona maiteni (Lev 18:6); Oroto ma oroto bo wavine ma wavine e viawawana (Lev 18:22, Rom 1:26-27); Rava ma ḡamoḡamo e viviawawana (Lev 18:23); Rava ḡela, eḡa awaoim maiteni e viawawana (Eph 5:3); Rava ḡelaui e gaegari da maiteni ma viawawana. (Gen 34:7, Deu 22:25-28).

26 Anina ma marana i tom Paul nai nelarai 4 maiteni i viaina-melei God au matana. Muriai Paul i rui Tempol au orana ma i vinolanola pirisi awarii da mara aiwai taui ai viaiaina ina voterei. Ma maranaina pulo ita terei taui tagotagogi ava aubai.

27-29 ✡Act 20:4Ma aupom 7 aburuna ava da ita kwa ma Jew ḡelaui au Eisia provins maemae taui Paul i ʼnanai Tempol au orana. Au naonei taui Paul i ʼnanai oroto Ephesusei wavana Trophimus maiteni, au taon i bababara ma i notai da tauna Trophimus i ruiei Tempol au orana. Taui Paul i vojijini ma i garara i pa, “Nelara mai Israel ona nei, ona voaguiai! Wei orotona dobu anatapuna e nenaeni ma rava anatapui e viviararamani da mai Jew ma ata tarawatu ma Tempol i parivirevirei. Tauna Jentail i neiai gabuna au vivivireina ma i tuvaidoedoei God au matana!”

30 Ma rava anatapui i nonori da au Tempol viḡaiḡaiawa i tupua ma anatapui kampa i ruba. Ma Paul i vojijini ma i taina-opunei au doa ma Tempol metaetana i gudui. 31 Maranai taui Paul viraḡenana i kaukauei, Mai Rome sorodia ai bada ḡaeḡaena i nonori da viḡaiḡaiawa ḡaeḡaena i tupua au Tempol. 32 Tauna laḡilaḡina ana sorodia ma ai babada i vaini ma i ruba kampa, maranai rava taui i ʼnanai, Taui Paul vunuana i voterei.

33 Sorodia ai bada i nei Paul awarina da i vojijini ma ana sorodia ruaḡa i riwei da seinei Paul urana au urai i pani jijini. Anina ma tauna patara i vitara-virevirei i pa, “Wei aiai orotona? Aiwai i kauei?” 34 Patara au orana rava ḡelaui babani tagogi i gararei, ma rava ḡelaui babani tapuna i gararei. Rava were da nare i garagarara da sorodia ai bada menanare ita nelaḡai gaiawa karena aiwai, lamna aubaina ana sorodia i egari da Paul ita naiei, ai au bareki. 35 Maranai Paul bareki tetena i tutuḡereḡerei, patara i ḡaiawa guratana aubaina sorodia Paul i voepai da i avarai da ita gagaloei. 36 Patara amapo da taui i vovotaḡotaḡoi ma i garagarara i pa, “Ona viraḡeni, ona viraḡeni!”

37 Maranai taui aburuna ava da au bareki ita rui, Paul Greekei sorodia ai bada i riwei i pa, “Anina bo eḡa da awarim ata babani?”

Ma tauna i auepai ma i riwa i pa, “Tam Greek u aramanei bo? 38 Tau a notai da tam Egyptei, rorova ai babada u viḡaviei, Ma rava 4,000 orai potapotai u opunei au mutulua, Tam nai ravana bo?”

39 Paul i paribelana i pa, “Eḡa! Tau Jew ei, au taon Tarsus a tupua, au Silisia provins, a vivibaḡaim da rava awari ana babani.”

40 Tauna i vianina ma Paul au tete i mairi. Tauna urana i voepai da patara garara i voterei. Maranai taui i genuana, Paul taui awarii ai ponanei i babani i pa.