1 Madeḡa maḡamaḡa i kwa ma muriai God Abraham ana tumaḡana i raudadani. God i riwa i pa, “Abraham!”

Abraham i paribelei i pa, “Tau weka!”

2 Ma God i riwa i pa, “Natum tagotago Isaac nuanuam pouna, ma taravaini ma ona nae au dobu Moriah. Ma ola ana viatataem, kampa natum ma puloei aniamapu.”

3 Mara i tom ma ubaubanai boiboḡi, Abraham i vomairi, ai i edari pulo apunana aubaina ma ana donki i vokaukauei. Ma ana taunola ruaḡa ma natuna Isaac i taravaini ma anatapui i nae gabu God i ririweiana kampa. 4 Taui au pom tonuḡa i babara ma Abraham i taepai ma gabu aueia i ʼnanai. 5 Ana taunola i riwei i pa, “Weka ona mae. Donki ona paini. Tau natu maiteni ana nae nore ma God ana viborumei. Ma airuaḡa ana nememei awarimi.”

6 Ma Abraham ai i tavana Isaac i viavarai. Tauna naipi ma ai mutuara i voai ma i negogona. 7 Taui i nenae ma Isaac i riwa i pa, “Amau!”

Abraham i riwa, “Ee, ma babani natu!”

Isaac i riwa, “Ai ma ai mutuara awarita wate pulo aubaina sipu natuna mepa?”

8 Abraham i paribelei i pa, “Natu, God sipu ina vereta pulo aubaina.” Ma airuaḡa i babara nae. 9 Maranai gabu God i ririweiana i ḡeta, kampa aniamapu ḡaimei i voai ma ai i vatari. Ma natuna Isaac urana ma aena i raḡini ma aniamapu au tepana, ai i vatavataria kampa i vimataveni.

10 Abraham urana i viloloi da naipi i vaia da natuna ita viraḡeni. 11 Wate lamna maranaina Bada ana anela marei i riwa, “Abraham, Abraham!”

Abraham i paribelei, “Tau weka!”

12 Ma Bada ana anela i riwa, “Eḡa natum ma viraḡeni! Eḡa aiwai apoapoena awarina ma kauei! Tam natum tagotago eḡa uta nuanei ma marina a aramanei da tam anina God e vivivirei.” 13 Abraham i taepai ma sipu orotona i ʼnanai, donana ai raḡaraḡai potopotona au orana i tapaiei. Ma i nae ma sipu i viraḡeni ma sia taputapuna i apui ana pulo God awarina, natuna epaiana.

14 Ma lamna aubaina wei dobuna i ḡorei, “Bada ina verena.” Lamna marana da marina rava e ririwa, “Bada ana au ola ina verena.”

15 Ma Bada ana anela marei Abraham i ḡorei 16 “Bada i riwa, ‘Tam u voteleteleu ma natum tagotago eḡa uta nuanei. Tau wavauei a paripari-vainuaḡanim da 17 anina ana viaiainim ma am epaepaia ana vimaḡai me ubona au mara ma bubu au gera. Taui ai ḡavia ina vovaiubai ma ai melagai ina vaia. 18 ✡Act 3:25Ma am epaepaia wavaiei dam anatapui au dobu ana viaiaini. Tam u voteleteleu aubaina wei ana kauei.” 19 Ma Abraham natuna maiteni i nae me ana taunola awari ma anatapui i nae me au Beersheba. Ma kampa i mae.