25
Esau ma Jacob i tupua
19 Wei lamna Abraham natuna Isaac ana virarautua. Isaac amana Abraham 20 Isaac ana madeḡa 40 ma Rebekah i ravaḡi. Rebekah tauna Leban novuna aburuna; amai Bethuel. Taui mai Aram au Padan-Aram i mamae. 21 Rebekah aipoi ma Isaac i raupari Bada awarina da awana ita voagui. Bada ana pari i nonori ma Rebekah i duama. 22 Raḡaraḡa i vivitua au manawa aubaina Rebekah i nae ma Bada i vibaḡai, “Aiwai aubaina wei e tuputupua awariu?” 23 Bada i riwa i pa:
“Roaroa ruaḡa au manawam ina vidam ruaḡa,
ma vinatuna da dam ruaḡa ma taui ina viḡavia vivira.
Tagogi ina virewapana telara
ma magurina aburuna awarina ina vitaunola.”
24 Ana vinatuna ana mara i ḡeta ma riwa kaua da raḡaraḡa nelarai i ḡuni. 25 Natuevou opina lebalebarina ma inina ororona ma lamna aubaina i viwavai Esau.*Mai Hebrew ai pona, inina ororona nonorana me Esau. 26 Natuna ḡelauna i tuputupua turana au ae karena i vojijina ma i opu ma i viwavai Jacob.†Mai Hebrew ai pona, Jacob anona ae karena i vojijini. Wei lamna awanaina, anona lamna amkwalakwalana. Isaac ana madeḡa 60 ma awana raḡaraḡa i vinatunei.
Esau, natuevou ana buderi i verenei Jacob awarina
27 Maranai raḡaraḡa i vilaraga, Esau tauna rava aroarona. Wate Jacob rava genugenuanana ma au numa maemaena. 28 Isaac ana ḡoana ḡaeḡaena Esau, aubaina sia moduei i vunuvunui amna i ḡoei. Wate Rebekah, Jacob i ḡoana-kauei.
29 Mara tagogi Jacob gwada i vivitavi ma Esau i aroaro da i nei ma inina i garigari ma am i ʼraḡe-kaua. 30 Ma Jacob i riwei i pa, “Tau am a iraḡe kaua. Nai gwada lebalebarina ma taraiḡui da ana ani!” (Wenanare i riwa aubaina wava i verei Edom.‡Mai Hebrew au pona, Edom anona Lebalebarina.)
31 Ma Jacob i riwa i pa, “Tam natuevou, Mara muriai amata ana buderi voḡaeḡaena ma vaia. Marina ma riweu da am buderi tau ma vereu ma gwada ana verem.”
32 Esau i riwa i pa, “Tau am a iraḡe kaua ma natuevou buderina amapo eḡa ina voaguiu, anina ma vaia!”
33 Ma Jacob i riwa i pa, “Marina ma parivai-nuaḡaniu da am buderi tau ma vereu.” Ma Esau i parivainuaḡana da natuevou buderina Jacob ina verei.
34 Ma Jacob gwada i taraiḡui ma palawa da Esau i verei ma Esau i am ma i uma ma i vomairi da i nae. Wenanare i kauei lamna Esau ana buderi eḡa ita vinuabolei.